ಮರುಳು ಜಾತ್ರೆಯ ಜನಗಳು

• ವಿಕ್ರಂ ಹತ್ವಾರ್‌, ನ್ಯೂಜರ್ಸಿ

ಒಂದೊಂದು ಹನಿಯೂ ಮನಸಿಗೆ ಸಿಹಿ ಮೆತ್ತಿಸುವಾಗ,

ನಿನ್ನ ಮುತ್ತಿನ ಪಸೆ ಸಾಗರವಾಗಿ,

ಮತ್ತೆ ಮತ್ತೆ ಬಂದಪ್ಪಲಿಸುವಾಗ,

ಈ ಮಧುವನ್ನೇಕೆ ಕಹಿಯೆನ್ನುತ್ತಾರೆ?

ನಖಶಿಖಾಂತ ಜೀವಸೆಳೆಯಾಗಿ ಸಂಚರಿಸಿ,
ನಿನ್ನ ಹಾಸದ ಮಿಂಚು ಗುಣಿಗುಣಿಸಿ,
ಮೃತ್ಯುವಿನಿಂದೆಳೆತಂದು ಅಮರ್ತ್ಯಗೊಳಿಸುವ
ಸಂಜೀವಿನಿಯನ್ನೇಕೆ ವಿಷವೆನ್ನುತ್ತಾರೆ?

ಒಂದೊಂದೇ ಗುಟುಕು ಸಾಯುಜ್ಯವಾಗುವ ದಿವ್ಯ ಮುಹೂರ್ತದಲ್ಲಿ ಪ್ರಿಯೆ,
ನಿನ್ನ ಆಲಿಂಗನದಲೆಗಳು ಆವರಿಸಿ
ಬ್ರಹ್ಮಾಂಡವನ್ನೇ ತೇಲಿಸಿ ಹಾರಿಸುವಾಗ,
ಜನರೇಕೆ ನನ್ನನ್ನು
ಕುಡುಕನೆನ್ನುತ್ತಾರೆ?