ವಿಕ್ರಮ ಹತ್ವಾರ, ನ್ಯೂಜೆರ್ಸಿ

ನೀಳಾಭಿಸಾರ

• ವಿಕ್ರಮ ಹತ್ವಾರ, ನ್ಯೂಜೆರ್ಸಿ
  [email protected]

ಹಾಲು ರಾತ್ರಿಯ ಬೃಂದಾವನದೊಳು

ನಿನ್ನಾಗಮನಕೆ ಕಾದಿರಲು,

ಹಳದಿ ಪೀತಾಂಬರ-ಶಲ್ಯ;

ನವಿರಾದ ನವಿಲುಗರಿ

ಮೋಹನ ರಾಗವೇರಿ ಸಮೀಪಿಸಿದೆ

ವನಕುಸುಮಗಳ ಪುಳಕಿಸಿದೆ!

ಕೆಂಗುಲಾಬಿ ತುಟಿಗಳು
ಸುಧೆ ಹರಿಸುವ ಕಂಗಳು
ಚಂದನದ ಘಮ ಮಿಗುವ-
ಕೃಷ್ಣ ವರ್ಣದ ಒಡಲು

ಪೊದೆಮೀಸೆಯೊಳಗಿಂದ
ಕಿರುನಗೆಯ ಚೆಲ್ಲಿದಾಗ-
ಆನಂದ ಅನವರತ!
ಏನಿತ್ತರೂ ಮತ್ತಷ್ಟು ಬೇಡುವ ಮನಸು
ನಿನ್ನ ಕಂಡೊಡನೆ ಸಂತೃಪ್ತ!

***

ಉಡಿ ಮಂಚದ ಮೇಲೆ
ಸೆರಗಿನೊಳು ತುಂಬಿರಿಸಿ
ಕದಳಿ ಎಳೆ ನುಸುಳಿಸಿ
ಕೊರಳಿಗರ್ಪಿಸಿದ
ಅಡವಿ ಹೂಗಳ ಹಾರ-
ಬಳುಕಿ ಹಾರುತಿದೆ

ಸಂಪಿಗೆಯ ಟೊಂಗೆಯಡಿ
ಹೂಮಂಚ ತೂಗುತಿರೆ
ಎದೆಗೊರಗಿ ಮುಖವಿಟ್ಟು;
ತೋಳಪ್ಪಿ ಕಣ್ಮುಚ್ಚಿ
ಹಾರುತೇರುವಾಗ,
ಕ್ಷೀರಸುಮಗಳು ಸುರಿದು
ಮುಂಗುರುಳ ಸುಳಿಯೊಳು
ಸಿಕ್ಕು, ಮೂಗಿನಂಚನು ತಾಕಿ,
ಕೆನ್ನೆ ಸವರಿ, ಕೊರಳ ಮುದ್ದಿಸಿ,
ಎದೆ ಮೇಲೆ ಇಳಿಜಾರಿ,
ಸೊಂಟಕೆ ಕಚಗುಳಿಯಿತ್ತು-
ನಯಮಿಂಚು ಹರಿಸಿ; ಅಲುಗಿಸಿ
ನಿಕಟದೊಳು ನಿಕಟವಾಗಿಸಿದೆ!
ನಿನ್ನೊಳು ಬೆರೆಯುವಾಸೆ ಹೆಚ್ಚಿಸಿದೆ!

***

ಮುರಳಿಗದರವನೊತ್ತಿ
ನಿನ್ನುಸಿರ ತುಂಬಿಸಿ
ನಾದದಲೆಗಳನೆಬ್ಬಿಸಲು
ಸ್ತಬ್ಧವಾದವು ಸಮಸ್ತ!
ಮಡಿಲಲಿ ಮಲಗಿರುವೆ,
ರಾಗತರಂಗಗಳೊಡನೆ
ತೇಲಿ ಸಾಗುವ ಚಂದ್ರಶ್ವೇತಕೆ
ಪ್ರಸ್ತ ಪ್ರಶಸ್ತ ಮುಹೂರ್ತ!

ನನ್ನೆರಡು ಕೈಪಿಡಿದು
ಗಿರಗಿರನೆ ತಿರುಗಿಸಿ
ನಿನ್ನೆಡೆಗೆ ಬರಸೆಳೆದು
ಸಿಹಿಯಾಗಿ ಚುಂಬಿಸಿ
ಸ್ಪರ್ಶ ಸಮ್ಮೋಹಗೊಳಿಸಿ
ಜಗ ಮರೆಸಿ; ಅಂತರಿಕ್ಷದಿ ರಮಿಸಿ
ಎದೆಗೆ ಮುತ್ತಿಟ್ಟು
ಅಂತಃಚಕ್ಷುವ ತೆರೆಸಿ
ಈ ಪರಿ ಪ್ರೀತಿಸುವ ಕಲೆ
ನಿನಗಲ್ಲದಿನ್ಯಾವ ಮನ್ಮಥನಿಗಿದೆಯೋ?

***

ಶ್ಯಾಮ ನಿನ್ನ ಕಣ್ಣಿನಲ್ಲಿ
ಆಯಸ್ಕಾಂತ ಸೆಳವಿದೆ
ನಿನ್ನ ತುಟಿಯ ತೇವದಲ್ಲಿ
ಸಂಜೀವಿನಿ ಮಧುವಿದೆ

ಮರೆಯಲಾರೆ ತೊರೆಯಲಾರೆ
ಚಂದ್ರ-ವೇಣು-ಹೂವು-ಮಂಚ
ಯಾವುದಿಲ್ಲದಿದ್ದರೂನು
ನಿನ್ನ ಬಿಟ್ಟು ಹೋಗಲಾರೆ

ದೂರ ಮಾಡಿ ಹುಚ್ಚು ಹಿಡಿಸಿ
ಹೋಗಬೇಡ ಮಾಧವ!
ಬೇಡಲಾರೆ ಏನನೊಂದು
ಬಳಿಯಲಿರು ಪ್ರೇಮಸಿಂಧು
ನಿನ್ನ ನಗೆಯ ನಾಕದಲ್ಲಿ
ನಡೆಯುತಿರಲಿ ಉತ್ಸವ!
ಸೋತು ಸೊರಗದಂತೆ ಸತತ
ಸಲಹುತಿರು ಪ್ರೇಮವ!

ಮುಖಪುಟ / ಎನ್‌ಆರ್‌ಐ