ನಮ್ಮ ನಡುವಿನ ನಿತ್ಯ ಸುಮಂಗಲಿಯರು!

ಮಲ್ಲಿಗೆ, ಸಂಪಿಗೆ, ಗುಲಾಬಿಗಳ ಜೊತೆಗೆ ಗಲ್ಲಿ-ಗಲ್ಲಿಗಳ ‘ಸೇವಂತಿ’ಯರು.... ರಾಜಸ್ಥಾನದ ‘ರುಡಾಲಿ’ಯರು.... ‘ಮಂಗಳ’ ಕಾರ್ಯಕ್ಕೆ ಸಿಂಗರಿಸಲು ಬರುವ ದೇವಳಗಳ ‘ದೇವದಾಸಿ’ಯರು.... ಇಲ್ಲಿ ನಿಮಗೆ ಯಾರು ಗೋಚರಿಸುತ್ತಾರೆ?

ಪದ್ಯ 8 : ಮಾರಾಟಕ್ಕಿವೆ...

• ಸುಪ್ತದೀಪ್ತಿ

ನಮ್ಮ-ನಿಮ್ಮೂರಿನಲಿ ಸಂತೆ ಸೇರುವ ದಿನ,

ಘಮಘಮಿಸಿ ನಳನಳಿಸಿ ಕಣ್ಸೆಳೆವ ಗಲ್ಲಿ;

ಹೂವಾಡಿಗರೆಲ್ಲ ಮಾರುವರು ಹೊರೆ ತಂದು -

ಚಂಪ, ಮಲ್ಲಿಗೆ, ಜಾಜಿ, ಗುಲಾಬಿಗಳನಿಲ್ಲಿ.

‘ಹೂವು ಬೇಕೇ, ಹೂವು....’ ಭಾವ-ಬಣ್ಣವು ನೂರು,
ಯಾವ ದೇವನ ಪಾದ, ಮತ್ತಾರ ಮುಡಿಗೆ!
ಕಣ್ಣು-ಮನಗಳ ತಣಿಸಿ, ನಲ್ಮೆ-ಪ್ರೀತಿಯ ಉಣಿಸಿ,
ಅಲ್ಪ ಬಾಳಿನ ಚಣವ ಸಾರ್ಥಗೊಳಿಸಿ.

ಹೊತ್ತ ಗಿಡಕೊಂದೊಂದೂ ಹೆಸರಾಗಿ ಅರಳಿದವು,
ಹೆತ್ತಬ್ಬೆಗೆಂದೆಂದು ತನ್ನ ಕುಡಿ ಭಾರವೆ?
ಚಿತ್ತ ಕಲಕಿದ ಕೈಗೆ ಸೇರಿದಾ ಕ್ಷಣದಲ್ಲಿ -
ಅತ್ತವೆ? ನಕ್ಕವೆ - ಸಾಫಲ್ಯವೆಂದು?

ಸೃಷ್ಟಿ ಲೀಲೆಯ ನೋಡ, ಫಲ ಹೊರುವ ಕ್ಷೇತ್ರವದು,
ಯಾರ್ಯಾರ ಕೈಸೇರಿ ನಲುಗಿ ಕರಗಿದವು;
ದೇವ ಪೂಜೆಯ ಪುಣ್ಯ ಯಾವ ಪಾಪದ ಲೆಕ್ಕ?
ಮಂಗಲೆಯ ಸಿಂಗರಕೆ ಮೀಸಲೇ ಬಾಳು?

ಅರೆಬಿರಿದ ನಸುನಗೆಯ ಕನಸಲ್ಲಿ ಹಿಡಿವರೆ,
ಕನಸುಗಳ ಶವಯಾತ್ರೆಗೂ ಬೇಕಾದವು.
ಚೈತ್ರ ಚೈತನ್ಯದೊಳು ಚಂದಗಾಣುವರೆಲ್ಲ,
ಮಾಘ ಮಘ ಮಘಿಸದೆಯೆ ಬಾಳು ಬೋಳು.