ಯಶಸ್ವಿ ಜೈಸ್ವಾಲ್ ನಿಮ್ಮಿಂದ ಕಲಿತಿಲ್ಲ; ಬೆನ್ ಡಕೆಟ್ ಹೇಳಿಕೆಗೆ ಇಂಗ್ಲೆಂಡ್ ಮಾಜಿ ನಾಯಕನ ತಿರುಗೇಟು
ರಾಜ್ಕೋಟ್ ಟೆಸ್ಟ್ನಲ್ಲಿ ಭಾರತದ ಯುವ ಬ್ಯಾಟಿಂಗ್ ಸೆನ್ಸೇಷನ್ ಯಶಸ್ವಿ ಜೈಸ್ವಾಲ್ ಅವರ ಆಕ್ರಮಣಕಾರಿ ವಿಧಾನ ಇಂಗ್ಲೆಂಡ್ನ ಬ್ಯಾಜ್ಬಾಲ್ ತಂತ್ರದಿಂದ ಪ್ರಭಾವಿತವಾಗಿದೆ ಎಂದು ಬೆನ್ ಡಕೆಟ್ ಅವರ ಹೇಳಿಕೆಗೆ ಇಂಗ್ಲೆಂಡ್ ಮಾಜಿ ನಾಯಕ ನಾಸರ್ ಹುಸೇನ್ ವಿರೋಧ ವ್ಯಕ್ತಪಡಿಸಿದ್ದಾರೆ.
ಜೈಸ್ವಾಲ್ ಅವರ ಅಜೇಯ ದ್ವಿಶತಕದ ಅಮೋಘ ದ್ವಿಶತಕವು ಭಾರತವನ್ನು ಅದ್ಭುತ ಗೆಲುವಿನತ್ತ ಮುನ್ನಡೆಸಿತು, ಸರಣಿಯ ಮೂರನೇ ಟೆಸ್ಟ್ನಲ್ಲಿ ಇಂಗ್ಲೆಂಡ್ 434 ರನ್ಗಳ ಹೀನಾಯ ಸೋಲನ್ನು ಕಂಡಿತು.
ರಾಜ್ಕೋಟ್ ಟೆಸ್ಟ್ನ ಮೂರನೇ ದಿನದ ಆಟದ ಬಳಿಕ ಮಾತನಾಡಿದ ಡಕೆಟ್ ಅವರು ಜೈಸ್ವಾಲ್ ಅವರ ಶತಕವನ್ನು ಹೊಗಳಿದ್ದರು, ಜೈಸ್ವಾಲ್ ಹಾಗೆ ಆಡುವುದನ್ನು ನೀವು ನೋಡಿದಾಗ, ನಾವು ಸ್ವಲ್ಪಮಟ್ಟಿಗೆ ಕ್ರೆಡಿಟ್ ತೆಗೆದುಕೊಳ್ಳಬೇಕು ಎಂದು ಅನಿಸುತ್ತದೆ. ಇತರ ಜನರು ಟೆಸ್ಟ್ ಕ್ರಿಕೆಟ್ ಆಡುವುದಕ್ಕಿಂತ ವಿಭಿನ್ನವಾಗಿ ಆಡುತ್ತಾರೆ ಎಂದು ಹೇಳಿದ್ದರು.
ಇಂಗ್ಲೆಂಡ್ ಮಾಜಿ ನಾಯಕನ ಕಿಡಿ
ಬೆನ್ ಡಕೆಟ್ ಅವರ ಹೇಳಿಕೆಗೆ ಬಲವಾಗಿ ಪ್ರತಿಕ್ರಿಯಿಸಿದ ಹುಸೇನ್, ಜೈಸ್ವಾಲ್ ಅವರ ಯಶಸ್ಸು ಇಂಗ್ಲೆಂಡ್ನ ತಂತ್ರಗಳಿಂದ ಯಾವುದೇ ಪ್ರಭಾವಕ್ಕಿಂತ ಹೆಚ್ಚಾಗಿ ಐಪಿಎಲ್ನಂತಹ ಪಂದ್ಯಾವಳಿಗಳಲ್ಲಿನ ಅವರ ಸ್ವಂತ ಪಾಲನೆ, ಕಠಿಣ ಪರಿಶ್ರಮ ಮತ್ತು ಅನುಭವಗಳಿಂದ ಬಂದಿದೆ ಎಂದು ಹೇಳಿದರು.
"ಜೈಸ್ವಾಲ್ ನಿಮ್ಮಿಂದ ಕಲಿತಿಲ್ಲ, ಅವನು ತನ್ನ ಪಾಲನೆಯಿಂದ ಕಲಿತಿದ್ದಾನೆ ಮತ್ತು ಬೆಳೆಯುವಾಗ ಅವನು ಪಟ್ಟ ಕಷ್ಟದಲ್ಲಿ ಅವನು ಕಲಿತಿದ್ದಾನೆ. ಏನಾದರೂ ಇದ್ದರೆ, ನಾನು ಅವನನ್ನು ನೋಡಿ ಅವನಿಂದ ಕಲಿಯುತ್ತೇನೆ" ಎಂದು ಸ್ಕೈ ಸ್ಪೋರ್ಟ್ಸ್ನಲ್ಲಿ ಮಾಜಿ ಇಂಗ್ಲೆಂಡ್ ಕ್ರಿಕೆಟಿಗ ಮೈಕೆಲ್ ಅಥರ್ಟನ್ ಜೊತೆಗಿನ ಚರ್ಚೆಯಲ್ಲಿ ಹುಸೇನ್ ಹೇಳಿದರು.
ಇಂಗ್ಲೆಂಡ್ ವಾಪಸಾತಿ ಮಾಡಲಿದೆ
ಸರಣಿಯಲ್ಲಿ ಇಂಗ್ಲೆಂಡ್ನ ನೀರಸ ಪ್ರದರ್ಶನವನ್ನು ಉದ್ದೇಶಿಸಿ ಮಾತನಾಡಿದ ಹುಸೇನ್, ಬೆನ್ ಸ್ಟೋಕ್ಸ್ ನೇತೃತ್ವದ ತಂಡವು ತಮ್ಮ ತಪ್ಪುಗಳನ್ನು ತಿದ್ದಿಕೊಳ್ಳಲು ಮತ್ತು ರಾಂಚಿಯಲ್ಲಿ ನಾಲ್ಕನೇ ಟೆಸ್ಟ್ಗೆ ಮುಂಚಿತವಾಗಿ ಅಗತ್ಯ ಹೊಂದಾಣಿಕೆಗಳನ್ನು ಮಾಡುವಂತೆ ಸಲಹೆ ನೀಡಿದ್ದಾರೆ.
5 ಪಂದ್ಯಗಳ ಸರಣಿಯಲ್ಲಿ ಭಾರತ 2-1 ಮುನ್ನಡೆ ಪಡೆದುಕೊಂಡಿದೆ. ಆದರೆ ಇಂಗ್ಲೆಂಡ್ ಮುಂದಿನ ಎರಡು ಪಂದ್ಯಗಳಲ್ಲಿ ಗೆಲುವು ಸಾಧಿಸಿದರೆ, ಸರಣಿ ಗೆಲ್ಲುವ ಅವಕಾಶ ಇದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
ಸರಣಿಯಲ್ಲಿ ಮಿಂಚಿದ ಜೈಸ್ವಾಲ್
ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಯಶಸ್ವಿ ಜೈಸ್ವಾಲ್ ಅತ್ಯುತ್ತಮ ಪ್ರದರ್ಶನ ನೀಡಿದ್ದಾರೆ. 109 ಸರಾಸರಿಯಲ್ಲಿ 80ಕ್ಕಿಂತ ಅಧಿಕ ಸ್ಟ್ರೈಕ್ ರೇಟ್ನಲ್ಲಿ 545 ರನ್ ಗಳಿಸಿದ್ದಾರೆ. ಸರಣಿಯಲ್ಲಿ 22 ಸಿಕ್ಸರ್ ಬಾರಿಸುವ ಮೂಲಕ, ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲೇ ಸರಣಿಯಲ್ಲಿ ಅತ್ಯಧಿಕ ಸಿಕ್ಸರ್ ಬಾರಿಸಿದ ಕ್ರಿಕೆಟಿಗ ಎನಿಸಿಕೊಂಡಿದ್ದಾರೆ.
Click it and Unblock the Notifications
Sign in with Google