ಕ್ರೀಡಾಭಾರತಿಯಿಂದ ದೇಶಿ ಆಟ ಲಗೋರಿ ಪಂದ್ಯಾವಳಿ ಆಯೋಜನೆ
ಬೆಂಗಳೂರು, ಜೂನ್ 5: ಗ್ಯಾಜೆಟ್ಗಳು ನಮ್ಮ ಎಲ್ಲಾಸಮಯವನ್ನು ಕಸಿದುಕೊಳ್ಳುವ ಮೊದಲು, ಕಡಿಮೆ ಸಮಯದಲ್ಲಿ ಆಡಬಹುದಾದ ಈ ಆಟವನ್ನು ಅನೇಕರು ಅನುಭವಿಸಿದ್ದಾರೆ. ಆದರೆ ಈ ಕಾಲದಲ್ಲೂ ನಿಮ್ಮ ಬಾಲ್ಯದ ಆಟವನ್ನು ಆಡುವ ಅವಕಾಶ ಒದಗಿ ಬಂದಿದೆ. ಮತ್ತು ಅದಕ್ಕಾಗಿ ಬಹುಮಾನವನ್ನು ಗೆಲ್ಲುವ ಅವಕಾಶ ಕೂಡ ಇದೆ.
ಕ್ರೀಡಾ ಭಾರತಿ (ಬೆಂಗಳೂರು ಮಹಾನಗರ) ಕ್ರೀಡಾ ಸಂಸ್ಥೆಯು ನಗರದಲ್ಲಿ ಜೂ.19 ರಂದು ಲಗೋರಿ ಪಂದ್ಯಾವಳಿಯನ್ನು ಪದ್ಮನಾಭನಗರದ ಎ.ಬಿ. ವಾಜಪೇಯಿ ರಂಗಮಂದಿರದಲ್ಲಿ ಆಯೋಜಿಸುತ್ತಿದೆ. ಈಗಾಗಲೆ ಕಾರ್ಯಕ್ರಮಕ್ಕೆ ನೋಂದಣಿ ಪ್ರಕ್ರಿಯೆ ಆರಂಭವಾಗಿದೆ ಆಸಕ್ತರು ನೋಂದಾಯಿಸಿಕೊಳ್ಳಬಹುದಾಗಿದೆ.
ಭಾರತ ಶ್ರೀಮಂತ ಸಂಸ್ಕೃತಿಯನ್ನು ಹೊಂದಿದ ರಾಷ್ಟ್ರ, ಭಾರತೀಯರ ಒಂದೊಂದು ಆಚರಣೆಯ ಹಿಂದೆ ತನ್ನದ್ದೇ ಆದ ಒಂದು ಇತಿಹಾಸವಿದೆ. ನದಿ ಕಣಿವೆಗಳಲ್ಲಿ ಮಾನವ ಸಂಸ್ಕೃತಿ ಅರಳಿದಾಗ ಕ್ರೀಡೆಗೂ ಪ್ರಾಧ್ಯಾನತೆ ದೊರೆಯಿತು. ಇಂದು ಕ್ರೀಡೆಗಳು ಮಾನವನ ಅವಿಭಾಜ್ಯ ಅಂಗವಾಗಿ ಹೋಗಿದೆ. ಕ್ರೀಡೆ ಮನುಷ್ಯನ ಬೌದ್ಧಿಕ ಬೆಳವಣಿಗೆಗೆ ಔಷಧಿಯೂ ಕೂಡ. ಮಕ್ಕಳ ಜಾಣ್ಮೆ, ಚಾತುರ್ಯ, ಧೈರ್ಯಶಕ್ತಿ ಹಾಗೂ ಕುತೂಹಲ ದೃಷ್ಟಿಗೆ ಅನುಗುಣವಾಗಿ ವಿವಿಧ ಆಟಗಳು ಬೆಳಕಿಗೆ ಬಂದಿದೆ ಲಗೋರಿ ಎಂಬುದು ಭಾರತದ ಒಂದು ಜಾನಪದ ಕ್ರೀಡೆಯಾಗಿದೆ. ಇದನ್ನು ಲಿಂಗೋಚ ಎಂದೂ ಕರೆಯುತ್ತಾರೆ. ಇದು ಹೊರಾಂಗಣ ಆಟವಾಗಿದೆ. ಇದು ನಾಲ್ಕು ಅಥವಾ ಅದಕ್ಕಿಂತಲೂ ಹೆಚ್ಚು ಜನ ಆಡುವ ಆಟ. ಇದಕ್ಕೆ ಬೇಕಾದ ಪರಿಕರಗಳೆಂದರೆ, ಚೆಂಡು, ಚಪ್ಪಟೆ ಕಲ್ಲುಗಳು. ಸರಳವಾದ ಆಟವನ್ನು ಸಮಯದ ಮಿತಿ ಇಲ್ಲದೆ ಆಡಬಹುದು.
'ದೇಸಿ'(ಜಾನಪದ) ಆಟಗಳನ್ನು ಉತ್ತೇಜಿಸುವ ಉದ್ದೇಶದಿಂದ ಕ್ರೀಡಾ ಭಾರತಿ ಈ ಪಂದ್ಯಾವಳಿಯನ್ನು ಆಯೋಜಿಸಿದೆ. ಈ ಹಿಂದೆ ರಾಜ್ಯದಲ್ಲಿ ಕಬಡ್ಡಿ, ಹಗ್ಗಜಗ್ಗಾಟ ಮತ್ತು ಇತರ ಕ್ರೀಡೆಗಳಿಗಾಗಿ ಪಂದ್ಯಾವಳಿಗಳನ್ನು ಆಯೋಜಿಸಲಾಗಿದೆ. ಬೆಂಗಳೂರಿನಲ್ಲಿ ತಮ್ಮ ನೆರೆಹೊರೆಯಲ್ಲಿ ಲಗೋರಿ ಆಡದೆ ಬೆಳೆದವರು ಯಾರೂ ಇಲ್ಲ. ಈ ಪಂದ್ಯಾವಳಿಯೊಂದಿಗೆ ಸ್ವಲ್ಪ ಹೆಚ್ಚು ಔಪಚಾರಿಕ ರಚನೆಯನ್ನು ನೀಡಲಾಗಿದ್ದು, ಸ್ಪರ್ಧೆ ಮತ್ತು ಬಹುಮಾನಗಳಿಗಿಂತ ಹೆಚ್ಚಾಗಿ, ಈ ಕಲ್ಲುಗಳನ್ನು ಕಟ್ಟುವ ರೀತಿಯಲ್ಲಿ, ಒಟ್ಟಾಗಿ ಸಮಾಜವನ್ನು ಭದ್ರವಾಗಿ ಕಟ್ಟಬೇಕೆಂದು ಭಾವಿಸಬಹುದು.
ಪುರುಷ ಮತ್ತು ಮಹಿಳೆಯರ ಎರಡು ಪ್ರತ್ಯೇಕ ವಿಭಾಗಗಳಲ್ಲಿ ಆಟಗಳನ್ನು ಆಯೋಜಿಸಲಾಗಿದೆ ಮತ್ತು 18 ರಿಂದ 50 ವರ್ಷದೊಳಗಿನ ನಗರದ ಎಲ್ಲಾ ಭಾಗಗಳ ಜನರಿಗೆ ನೋಂದಣಿ ಮುಕ್ತವಾಗಿದೆ. ಪ್ರತಿ ತಂಡವು ಮೂರು ರಿಸರ್ವ್ ಒಳಗೊಂಡಂತೆ ಒಟ್ಟು ಹತ್ತು ಆಟಗಾರರನ್ನು ಹೊಂದಿರಬೇಕು. ಒಟ್ಟು ತಂಡಗಳು ಮತ್ತು ಪಂದ್ಯಗಳ ಸಂಖ್ಯೆಯನ್ನು ಜೂನ್ 6 (ನೋಂದಣಿಗೆ ಕೊನೆಯ ದಿನ) ನಂತರ ನಿರ್ಧರಿಸಲಾಗುತ್ತದೆ.
ಹೆಚ್ಚಿನ ಮಾಹಿತಿಗಾಗಿ ಸಂಪರ್ಕಿಸಿ
+91 98455 12621 ,
+91 99805 65685
(ಒನ್ಇಂಡಿಯಾ ಸುದ್ದಿ)
Click it and Unblock the Notifications
Sign in with Google