IPL 2023: ಅತಿ ಶೀಘ್ರದಲ್ಲೇ ಈತ ಭಾರತ ತಂಡಕ್ಕೆ ಆಡುತ್ತಾನೆ; ಯುವ ಆಟಗಾರನ ಕುರಿತು ಅನಿಲ್ ಕುಂಬ್ಳೆ ಭವಿಷ್ಯ

ಶನಿವಾರ, ಏಪ್ರಿಲ್ 8ರಂದು ಗುವಾಹಟಿಯ ಬರ್ಸಾಪರ ಸ್ಟೇಡಿಯಂನಲ್ಲಿ ನಡೆದ 2023ರ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್)ನ 11ನೇ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ವಿರುದ್ಧ ರಾಜಸ್ಥಾನ ರಾಯಲ್ಸ್ ತಂಡ 57 ರನ್‌ಗಳ ಅಂತರದ ಭಾರೀ ಗೆಲುವು ಸಾಧಿಸಿತು.

ರಾಜಸ್ಥಾನ ರಾಯಲ್ಸ್ ತಂಡದ ಪರ ಯಶಸ್ವಿ ಜೈಸ್ವಾಲ್ ತಮ್ಮ ಭರ್ಜರಿ ಫಾರ್ಮ್‌ ಮುಂದುವರೆಸಿದ್ದು, ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ 31 ಎಸೆತಗಳಲ್ಲಿ 1 ಸಿಕ್ಸರ್ ಮತ್ತು 11 ಬೌಂಡರಿಗಳ ನೆರವಿನಿಂದ 60 ರನ್ ಬಾರಿಸಿದರು. ಇದು 2023ರ ಐಪಿಎಲ್ ಋತುವಿನಲ್ಲಿ ಅವರ ಎರಡನೇ ಅರ್ಧಶತಕವಾಗಿದೆ.

ಇದೆ ವೇಳೆ ಭಾರತ ತಂಡದ ಮಾಜಿ ಲೆಗ್ ಸ್ಪಿನ್ನರ್ ಅನಿಲ್ ಕುಂಬ್ಳೆ ಅವರು ಯಶಸ್ವಿ ಜೈಸ್ವಾಲ್ ಅವರನ್ನು ಶ್ಲಾಘಿಸಿದ್ದು, ರಾಜಸ್ಥಾನ ರಾಯಲ್ಸ್ ತಂಡದ ಈ ಯುವ ಆರಂಭಿಕ ಆಟಗಾರ ಭಾರತೀಯ ಆಯ್ಕೆ ಸಮಿತಿಯ ಗಮನದಲ್ಲಿದ್ದಾನೆ ಮತ್ತು ಆತ ಶೀಘ್ರದಲ್ಲೇ ಭಾರತ ತಂಡಕ್ಕೆ ಆಯ್ಕೆಯಾಗುತ್ತಾನೆ ಎಂದು ಹೇಳಿದರು.

ಡೇವಿಡ್ ವಾರ್ನರ್ ಟಾಸ್ ಗೆದ್ದು ಮಧ್ಯಾಹ್ನದ ಪಂದ್ಯದಲ್ಲಿ ಬೌಲಿಂಗ್ ಆಯ್ಕೆ ಮಾಡಿಕೊಂಡ ನಂತರ, ದೆಹಲಿ ಕ್ಯಾಪಿಟಲ್ಸ್ ತಂಡದ ವೇಗದ ಮತ್ತು ಸ್ಪಿನ್ ಬೌಲಿಂಗ್ ದಾಳಿಯನ್ನು ಸಮರ್ಥವಾಗಿ ಎದುರಿಸಿದ ಯಶಸ್ವಿ ಜೈಸ್ವಾಲ್ ಸ್ಫೋಟಕ ಆರಂಭ ನೀಡಿದರು.

ರಾಜಸ್ಥಾನ ರಾಯಲ್ಸ್ ಪರ ಯಶಸ್ವಿ ಜೈಸ್ವಾಲ್ ಮತ್ತು ಜೋಸ್ ಬಟ್ಲರ್ ಮೊದಲ ವಿಕೆಟ್‌ಗೆ ಕೇವಲ 8.3 ಓವರ್‌ಗಳಲ್ಲಿ 98 ರನ್‌ಗಳ ಆರಂಭಿಕ ಜೊತೆಯಾಟ ನೀಡಿದರು. ಪವರ್‌ಪ್ಲೇ ನಂತರ ದೊಡ್ಡ ಹೊಡೆತಕ್ಕೆ ಮುಂದಾಗಿ ಯಶಸ್ವಿ ಜೈಸ್ವಾಲ್ ವಿಕೆಟ್ ಒಪ್ಪಿಸಿದರು.

ದೇಶೀಯ ಋತುವಿನಲ್ಲಿ ಅತ್ಯಂತ ಸ್ಥಿರವಾದ ಪ್ರದರ್ಶನದ ನಂತರವೂ, ಐಪಿಎಲ್ 2023ರ ಋತುವಿನಲ್ಲಿ ಯಶಸ್ವಿ ಜೈಸ್ವಾಲ್ ಅವರ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ಮುಂದುವರೆದಿದೆ. ರಣಜಿ ಟ್ರೋಫಿ ಋತುವಿನ ನಂತರ ಇರಾನಿ ಕಪ್‌ನಲ್ಲಿ ಶೇಷ ಭಾರತ ತಂಡಕ್ಕಾಗಿ 213 ಮತ್ತು 144 ರನ್ ಗಳಿಸಿದರು. ಅಲ್ಲದೇ, ಡಿಸೆಂಬರ್ 2022ರಲ್ಲಿ ಬಾಂಗ್ಲಾದೇಶ ಎ ಪ್ರವಾಸದಲ್ಲಿ ಯಶಸ್ವಿ ಜೈಸ್ವಾಲ್ ಭಾರತ ಎ ಪರ ಶತಕ ಬಾರಿಸಿದ್ದರು.

"ನನ್ನ ಪ್ರಕಾರ, ವೇಗದ ಬೌಲಿಂಗ್‌ಗೆ, ವಿಶೇಷವಾಗಿ ಸ್ಪಿನ್‌ ಬೌಲಿಂಗ್ ವಿರುದ್ಧ ಯಶಸ್ವಿ ಜೈಸ್ವಾಲ್ ಆಟ ಸೊಗಸಾಗಿತ್ತು. ಅವರು ಲೆಂಗ್ತ್ ಬೌಲಿಂಗ್‌ ಅನ್ನು ಚೆನ್ನಾಗಿ ಅರಿತಿದ್ದಾರೆ, ಜೈಸ್ವಾಲ್ ಕ್ರೀಸ್‌ನಲ್ಲಿ ಓಡಲು ಹೆದರುವುದಿಲ್ಲ ಮತ್ತು ಆ ಉತ್ತಮ ಎಸೆತಗಳನ್ನು ಬೌಂಡರಿಗೆ ಕಳಿಸುತ್ತಾರೆ. ಅದು ತುಂಬಾ ವಿಶೇಷವಾಗಿದೆ".

"ಆರಂಭಿಕ ಬ್ಯಾಟರ್ ಆಗಿ ರನ್ ಕಲೆ ಹಾಕುವ ಸಾಮರ್ಥ್ಯ ಯಶಸ್ವಿ ಜೈಸ್ವಾಲ್ ಅವರಿಗಿದೆ. ಆತನ ಆಟವನ್ನು ಭಾರತೀಯ ತಂಡದ ಆಯ್ಕೆಗಾರರು ಗಮನಿಸುತ್ತಾರೆ ಮತ್ತು ಕೆಲವೇ ದಿನಗಳಲ್ಲಿ ಭಾರತ ರಾಷ್ಟ್ರೀಯ ತಂಡಕ್ಕಾಗಿ ಆಡುವ ಅವಕಾಶವನ್ನು ಪಡೆಯುತ್ತಾರೆ," ಎಂದು ಅನಿಲ್ ಕುಂಬ್ಳೆ ಶನಿವಾರ ಜಿಯೋ ಸಿನಿಮಾಗೆ ತಿಳಿಸಿದರು.

ಇದೇ ವೇಳೆ, ವೆಸ್ಟ್ ಇಂಡೀಸ್‌ನ ಲೆಜೆಂಡ್ ಕ್ರಿಸ್ ಗೇಲ್ ಕೂಡ ಯಶಸ್ವಿ ಜೈಸ್ವಾಲ್ ಬ್ಯಾಟಿಂಗ್ ಪ್ರದರ್ಶನವನ್ನು ಮೆಚ್ಚಿದರು. ಯಶಸ್ವಿ ಜೈಸ್ವಾಲ್ ಅವರ ಸ್ಟ್ರೋಕ್ ಮಾಡುವ ಕೌಶಲ್ಯದಿಂದ ಕ್ರಿಸ್ ಗೇಲ್ ಕೂಡ ಪ್ರಭಾವಿತರಾದರು.

"ಯುವ ಆಟಗಾರ ಯಶಸ್ವಿ ಜೈಸ್ವಾಲ್ ಉತ್ತಮವಾಗಿ ಬ್ಯಾಟಿಂಗ್ ಮಾಡಿದ ಮತ್ತು ಜೋಸ್ ಬಟ್ಲರ್ ಅವರಂತಹ ಆಟಗಾರನೊಂದಿಗೆ ಉತ್ತಮ ಜೊತೆಯಾಟ ನೀಡಿದರು. ಜೋಸ್ ಬಟ್ಲರ್ ಕೂಡ ಯುವ ಆಟಗಾರನನ್ನು ಬೆಂಬಲಿಸಿದರು. ಸ್ಫೋಟಕ ಬ್ಯಾಟಿಂಗ್ ಮೂಲಕ 60 ರನ್ ಗಳಿಸಿದ್ದಾನೆ. ಇವರ ಆಟದಿಂದ ಮಧ್ಯಮ ಕ್ರಮಾಂಕ ನಿರಾಳವಾಗಿದೆ. ಅವರ ಬ್ಯಾಟಿಂಗ್ ವೀಕ್ಷಿಸಲು ಅದ್ಭುತವಾಗಿತ್ತು," ಎಂದು ಕ್ರಿಸ್ ಗೇಲ್ ತಿಳಿಸಿದರು.

English summary

IPL 2023: Rajasthan Royals opener Yashasvi Jaiswal will soon play for the Indian team, Anil Kumble said.