ಆನ್ ಲೈನ್ ವಂಚನೆ ಪ್ರಕರಣ; ಎಂಇಪಿ ಅಧ್ಯಕ್ಷೆ ನೌಹೀರ ಶೇಖ್ ಶಿವಮೊಗ್ಗ ಪೊಲೀಸ್ ಕಸ್ಟಡಿಗೆ
ಶಿವಮೊಗ್ಗ, ಜುಲೈ 29: ಆನ್ ಲೈನ್ ನಲ್ಲಿ ಹಣ ವಂಚನೆ ಮಾಡಿರುವ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮಹಿಳಾ ಎಂಪವರ್ ಮೆಂಟ್ ಪಾರ್ಟಿ ಅಧ್ಯಕ್ಷೆ ಹಾಗೂ ಹೀರಾ ಗ್ರೂಪ್ ನ ಸಂಸ್ಥಾಪಕ ಅಧ್ಯಕ್ಷೆ ನೌಹೀರಾ ಶೇಖ್ ಅವರನ್ನು ಶಿವಮೊಗ್ಗ ಸಿಇಎನ್ ಪೊಲೀಸರು ವಶಪಡಿಸಿಕೊಂಡು ಶಿವಮೊಗ್ಗಕ್ಕೆ ಕರೆತಂದಿದ್ದಾರೆ.
ಈಚೆಗಷ್ಟೆ ಆರ್ಥಿಕ ಅವ್ಯವಹಾರಗಳ ಆರೋಪದ ಮೇಲೆ ನೌಹೀರಾ ಶೇಖ್ ಅವರನ್ನು ತೆಲಂಗಾಣ ಪೊಲೀಸರು ಬಂಧಿಸಿದ್ದರು.
"ಆನ್ ಲೈನ್ ಮೂಲಕ ಹಣ ವಂಚಿಸಿರುವ 20ಕ್ಕೂ ಹೆಚ್ಚು ಪ್ರಕರಣಗಳು ಇವರ ವಿರುದ್ಧ ದಾಖಲಾಗಿದೆ. ಈ ಸಂಬಂಧ ಹೈದರಾಬಾದ್ ನಿಂದ ಶಿವಮೊಗ್ಗಕ್ಕೆ ಕರೆತರಲಾಗಿದ್ದು, ಇಂದು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗುವುದು" ಎಂದು ಶಿವಮೊಗ್ಗ ಜಿಲ್ಲಾ ಹೆಚ್ಚುವರಿ ರಕ್ಷಣಾಧಿಕಾರಿಗಳು ತಿಳಿಸಿದ್ದಾರೆ.
ಶಿವಮೊಗ್ಗದ ಮಂಜುನಾಥ ಬಡಾವಣೆ ನಿವಾಸಿ ಮಹ್ಮದ್ ಅತೀಕ್ ನೌಹೀರಾ ವಿರುದ್ಧ ದೂರು ದಾಖಲಿಸಿದ್ದಾರೆ. ಹೀರಾ ಗ್ರೂಪ್ ಕಂಪನಿಗೆ ಒಟ್ಟು 25 ಲಕ್ಷ ಹಣವನ್ನು ಹೂಡಿಕೆ ಮಾಡಿದ ಮಹ್ಮದ್ ಅವರಿಗೆ ಕೆಲ ತಿಂಗಳು ಶೇಕಡಾ 3ರಂತೆ ಲಾಭಾಂಶ ದೊರೆತಿದೆ. ನಂತರ ಲಾಭಾಂಶ ಬಾರದೆ ವಂಚಿಸಿರುವುದು ತಿಳಿದಾಗ ನಗರದ ಸಿ.ಈ.ಎನ್ ಪೋಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು.
ಆರೋಪಿಯನ್ನು ಇಂದು ನ್ಯಾಯಾಲಯಕ್ಕೆ ಹಾಜರುಪಡಿಸಿ ಪೊಲೀಸ್ ಕಸ್ಟಡಿಗೆ ತೆಗೆದುಕೊಂಡು ತನಿಖೆ ಮುಂದುವರಿಸಲಾಗುವುದು.
Click it and Unblock the Notifications
Sign in with Google