Viral Video: ಭಾರತೀಯರ ಲೈಫ್ಸ್ಟೈಲ್ಗೆ ಅಡ್ಜಸ್ಟ್ ಆಗಲು ರಷ್ಯಾ ಮಹಿಳೆ ಪಟ್ಟ ಪಾಡೇನು? ಆ 11 ಸಾಂಸ್ಕೃತಿಕ ಭಿನ್ನತೆಗಳು ಇಲ್ಲಿವೆ
ಭಾರತವು ತನ್ನ ವೈವಿಧ್ಯಮಯ ಸಂಸ್ಕೃತಿ, ಆಚಾರ-ವಿಚಾರ ಮತ್ತು ಆತಿಥ್ಯಕ್ಕೆ ಜಗತ್ತಿನಾದ್ಯಂತ ಹೆಸರುವಾಸಿಯಾಗಿದೆ. ಇಲ್ಲಿಗೆ ಬರುವ ವಿದೇಶಿಗರು ನಮ್ಮ ಸಂಸ್ಕೃತಿಗೆ ಮನಸೋಲುವುದು ಸಾಮಾನ್ಯ. ಆದರೆ, ವಿದೇಶಿ ಮಹಿಳೆಯೊಬ್ಬರು ಭಾರತೀಯ ಕುಟುಂಬದ ಜೊತೆ ಬಾಳುವಾಗ ಎದುರಾಗುವ ಸಾಂಸ್ಕೃತಿಕ ಭಿನ್ನತೆಗಳು ಮತ್ತು ರಷ್ಯಾ ಹಾಗೂ ಭಾರತದ ನಡುವಿನ ಜೀವನಶೈಲಿಯ ವ್ಯತ್ಯಾಸಗಳನ್ನು ಹಾಸ್ಯಭರಿತವಾಗಿ ವಿವರಿಸಿದರೆ ಹೇಗಿರುತ್ತದೆ? ಹೌದು, ಪ್ರಸ್ತುತ ಸಾಮಾಜಿಕ ಜಾಲತಾಣದಲ್ಲಿ ಅಂತಹದ್ದೇ ಒಂದು ವಿಡಿಯೋ ಭಾರಿ ಸದ್ದು ಮಾಡುತ್ತಿದ್ದು, ನೆಟ್ಟಿಗರ ಗಮನ ಸೆಳೆಯುತ್ತಿದೆ. ಭಾರತದಲ್ಲಿ ವಾಸಿಸುತ್ತಿರುವ ರಷ್ಯಾ ಮೂಲದ ಮಹಿಳೆ ಅನಾಸ್ತಶಿಯಾ ಶರೋವಾ ಸಿಂಗ್ ಅವರು ಹಂಚಿಕೊಂಡಿರುವ ಈ ವಿಡಿಯೋ ಈಗ ಸಖತ್ ವೈರಲ್ ಆಗಿದೆ.
ಸಾಮಾನ್ಯವಾಗಿ ಜನರು ಅನಾಸ್ತಶಿಯಾ ಅವರ ಬಳಿ "ನೀವು ಭಾರತದ ಸಾಂಸ್ಕೃತಿಕ ವ್ಯತ್ಯಾಸಗಳನ್ನು ಹೇಗೆ ನಿಭಾಯಿಸುತ್ತೀರಿ?" ಎಂದು ಕೇಳುತ್ತಿರುತ್ತಾರಂತೆ. ಆದರೆ ಈ ಬಾರಿ ಅವರು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಅಪ್ಲೋಡ್ ಮಾಡಲಾದ ವಿಡಿಯೋದಲ್ಲಿ, ತಮ್ಮ ಭಾರತೀಯ ಕುಟುಂಬವು ತಮ್ಮೊಂದಿಗೆ ವಾಸಿಸುವಾಗ ಎದುರಿಸಬೇಕಾದ 11 ಪ್ರಮುಖ ವ್ಯತ್ಯಾಸಗಳನ್ನು ಪಟ್ಟಿ ಮಾಡಿದ್ದಾರೆ.
ರಷ್ಯಾ ಸೊಸೆ ಹಂಚಿಕೊಂಡ 11 ಸಾಂಸ್ಕೃತಿಕ ವ್ಯತ್ಯಾಸಗಳು:
1. ಮುಂಚಿತವಾಗಿಯೇ ಅಡುಗೆ ಮಾಡುವುದು: ರಷ್ಯಾದಲ್ಲಿ 3 ರಿಂದ 5 ದಿನಗಳವರೆಗೆ ಆಗುವಷ್ಟು ಸೂಪ್ ಅಥವಾ ಆಹಾರವನ್ನು ಮೊದಲೇ ತಯಾರಿಸಿ ತಿನ್ನುತ್ತಾರೆ. ಆದರೆ ಭಾರತದಲ್ಲಿ ಪ್ರತಿದಿನ ತಾಜಾ ಆಹಾರವನ್ನು ಬೇಯಿಸುವುದು ಅತ್ಯಂತ ಮುಖ್ಯವಾಗಿದೆ.
2. ಗಂಭೀರ ಮುಖಭಾವ: ರಷ್ಯನ್ನರ ಸಾಮಾನ್ಯ ಮುಖಭಾವವು ಕೊಂಚ ಗಂಭೀರವಾಗಿ ಕಾಣುವುದರಿಂದ ಭಾರತೀಯರು ಇವರನ್ನು ನೋಡಿ ಹೆದರುತ್ತಾರಂತೆ. ಆದರೆ ಅದು ತಮ್ಮ ಸಹಜ ಮುಖಭಾವ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
3. ಲಿವ್-ಇನ್ ರಿಲೇಷನ್ಶಿಪ್: ಇದು ಭಾರತದಲ್ಲಿ ಕುಟುಂಬದ ಹಿನ್ನೆಲೆಯನ್ನು ಅವಲಂಬಿಸಿರುತ್ತದೆ, ಆದರೆ ರಷ್ಯಾದಲ್ಲಿ ಇದು ಸಾಮಾನ್ಯ.
4. ಆತಿಥ್ಯದ ವ್ಯತ್ಯಾಸ: ಭಾರತೀಯರ ಮನೆಗೆ ಹೋದ ತಕ್ಷಣ ಕೇಳದಿದ್ದರೂ ತಣ್ಣಗಿನ ನೀರು ಕೊಡುತ್ತಾರೆ. ಆದರೆ ರಷ್ಯಾದಲ್ಲಿ ಚಹಾವನ್ನು ಕೇವಲ ಆಪ್ತ ಸ್ನೇಹಿತರಿಗೆ ಮಾತ್ರ ನೀಡಲಾಗುತ್ತದೆ.
5. ನೇರ ನುಡಿ: ಯಾವುದೇ ವಿಷಯಕ್ಕೆ "ಇಲ್ಲ" ಎಂದು ನೇರವಾಗಿ ಹೇಳುವುದು ರಷ್ಯಾದಲ್ಲಿ ಸಾಮಾನ್ಯ, ಆದರೆ ಭಾರತದಲ್ಲಿ ಇದನ್ನು ಅಸಭ್ಯ ಎಂದು ಭಾವಿಸುವ ಸಾಧ್ಯತೆ ಇರುತ್ತದೆ.
6. ಹೆಸರಿಟ್ಟು ಕರೆಯುವುದು: ಶಿಕ್ಷಕರು ಮತ್ತು ಹಿರಿಯರನ್ನು ಗೌರವಯುತವಾಗಿಯೇ ಹೆಸರಿಟ್ಟು ಕರೆಯುವ ಪದ್ಧತಿ ರಷ್ಯಾದಲ್ಲಿದೆ.
7. ಸೌನಾ (Sauna) ಸಂಸ್ಕೃತಿ: ರಷ್ಯಾದಲ್ಲಿ ಪುರುಷರು ಮತ್ತು ಮಹಿಳೆಯರು ಒಟ್ಟಿಗೆ ಸೌನಾದ ಸಾಮಾನ್ಯ ಕೋಣೆಯಲ್ಲಿ ಚಹಾ ಕುಡಿಯುತ್ತಾ ಮಾತುಕತೆ ನಡೆಸುತ್ತಾರೆ.
8. ಮುಂಚಿತವಾಗಿ ಯೋಜನೆ ರೂಪಿಸುವುದು: ಯಾವುದೇ ಭೇಟಿಯನ್ನು ಮೊದಲೇ ಕ್ಯಾಲೆಂಡರ್ನಲ್ಲಿ ಗುರುತಿಸಿ ಯೋಜಿಸಲಾಗುತ್ತದೆ. ಭಾರತದಲ್ಲಿ ಇಂತಹ ಭೇಟಿಗಳು ಇದ್ದಕ್ಕಿದ್ದಂತೆ ನಡೆಯುತ್ತವೆ.
9. ದೀರ್ಘ ಭಾಷಣ: ಪಾರ್ಟಿಗಳಲ್ಲಿ ಪಾನೀಯ ಸೇವಿಸುವ ಮುನ್ನ ದೀರ್ಘವಾಗಿ ಮಾತನಾಡುವ ಪದ್ಧತಿ ಇವರಲ್ಲಿದೆ.
10. ಮನೆಗೆಲಸದವರ ನೆರವು ಇಲ್ಲದಿರುವುದು: ಗಂಡ-ಹೆಂಡತಿ ಇಬ್ಬರೂ ಕೆಲಸ ಮಾಡುತ್ತಿದ್ದರೂ ರಷ್ಯಾದಲ್ಲಿ ಸ್ವತಃ ತಾವೇ ಮನೆಗೆಲಸ ಮಾಡಿಕೊಳ್ಳುತ್ತಾರೆ.
11. ನೆರೆಹೊರೆಯವರೊಂದಿಗೆ ಕಡಿಮೆ ಸಂಪರ್ಕ: ಆಧುನಿಕ ಜಗತ್ತಿನಲ್ಲಿ ನೆರೆಹೊರೆಯವರೊಂದಿಗೆ ಹೆಚ್ಚು ಬೆರೆಯದಿರುವ ಅಭ್ಯಾಸ ಇವರಿಗಿದೆ.
ನೆಟ್ಟಿಗರ ಆಸಕ್ತಿದಾಯಕ ಕಾಮೆಂಟ್ಗಳು
ಈ ವಿಡಿಯೋ ವೀಕ್ಷಿಸಿದ ಅನೇಕ ಭಾರತೀಯ ಮತ್ತು ವಿದೇಶಿ ನೆಟ್ಟಿಗರು ಕಮೆಂಟ್ ಬಾಕ್ಸ್ನಲ್ಲಿ ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡಿದ್ದಾರೆ. ಒಬ್ಬ ಬಳಕೆದಾರರು, "ಪ್ರತಿದಿನ ತಾಜಾ ಆಹಾರ ತಯಾರಿಸುವುದು ನಮ್ಮ ಸಂಸ್ಕೃತಿಯ ಜೀವಾಳ, ನಿಮ್ಮ ವಿಡಿಯೋ ತುಂಬಾ ನಿಜ!" ಎಂದು ಬರೆದಿದ್ದಾರೆ. ಮತ್ತೊಬ್ಬರು, "ಆ ಗಂಭೀರ ಮುಖಭಾವದ ಬಗ್ಗೆ ನೀವು ಹೇಳಿದ್ದು ನೂರಕ್ಕೆ ನೂರು ನಿಜ, ಆರಂಭದಲ್ಲಿ ನಮಗೂ ಹಾಗೇ ಅನಿಸಿತ್ತು, ಆದರೆ ನಿಮ್ಮ ಕುಟುಂಬದೊಂದಿಗಿನ ಈ ಹೊಂದಾಣಿಕೆ ಅದ್ಭುತವಾಗಿದೆ" ಎಂದು ಶ್ಲಾಘಿಸಿದ್ದಾರೆ. ಒಟ್ಟಾರೆಯಾಗಿ, ಈ ವಿಡಿಯೋ ಎರಡು ವಿಭಿನ್ನ ದೇಶಗಳ ಸಂಸ್ಕೃತಿಯನ್ನು ಬೆಸೆಯುವ ಸುಂದರ ಪ್ರಯತ್ನವಾಗಿ ಹೊರಹೊಮ್ಮಿದೆ.
Click it and Unblock the Notifications
Sign in with Google