ಗೇಟ್ ತೆರೆಯಲು ವಿಳಂಬ: ಭದ್ರತಾ ಸಿಬ್ಬಂದಿಗೆ ಅಸಭ್ಯ ಸನ್ನೆ ಮಾಡಿ ನಿಂದಿಸಿದ ಮಹಿಳೆ

Published: Monday, August 22, 2022, 9:33 [IST]

ನವದೆಹಲಿ ಆಗಸ್ಟ್ 22: ಇತ್ತೀಚೆಗೆ ವಸತಿ ಕಟ್ಟಡಗಳ ಭದ್ರತಾ ಸಿಬ್ಬಂದಿಗಳ ಮೇಲೆ ದೌರ್ಜನ್ಯ ಮತ್ತು ನಿಂದನೆಯಂತಹ ಪ್ರಕರಣಗಳು ಹೆಚ್ಚಾಗಿ ಕಂಡು ಬರುತ್ತಿವೆ. ದೆಹಲಿಯಲ್ಲಿ ಇಂತಹದ್ದೇ ಪ್ರಕರಣ ಬೆಳಕಿಗೆ ಬಂದಿದೆ. ದೆಹಲಿ ಸಮೀಪದ ಗೌತಮ್ ಬುದ್ಧ ನಗರದಲ್ಲಿ ಮಹಿಳೆಯೊಬ್ಬರನ್ನು ತಮ್ಮ ವಸತಿ ಕೊಠಡಿಗಳ ಭದ್ರತಾ ಸಿಬ್ಬಂದಿಯೊಂದಿಗೆ ವಾಗ್ವಾದ ನಡೆಸಿದ್ದರಿಂದ ಬಂಧಿಸಲಾಗಿದೆ.

ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ಹರಡಿದ ವಿಡಿಯೊದಲ್ಲಿ ಭವ್ಯಾ ರೈ ಎಂಬ ಮಹಿಳೆ ಭದ್ರತಾ ಸಿಬ್ಬಂದಿಗೆ ಅವಾಚ್ಯ ಶಬ್ದಗಳಿಂದ ಬೈಯುವುದು, ಅಸಭ್ಯ ಸನ್ನೆಗಳನ್ನು ಮಾಡುವುದು ಮತ್ತು ಸಿಬ್ಬಂದಿಗೆ ಬೆದರಿಕೆ ಹಾಕುವುದನ್ನು ಕಾಣಬಹುದು. ವಿಡಿಯೋ ವೈರಲ್ ಆದ ಬಳಿಕ ಆಕೆಯ ವಿರುದ್ಧ ಕ್ರಮಕ್ಕೆ ಒತ್ತಡ ಹೆಚ್ಚಾಗಿದ್ದು ಆಕೆಯನ್ನು ಬಂಧಿಸಲಾಗಿದೆ. ಆಕೆಯನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿ 14 ದಿನಗಳ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಮಹಿಳೆ ನಿನ್ನೆ ಭಾನುವಾರ ನೋಯ್ಡಾದ ಸೆಕ್ಟರ್ 126 ರಲ್ಲಿ ಜೇಪೀ ವಿಶ್‌ಟೌನ್ ಸೊಸೈಟಿಯಿಂದ ನಿರ್ಗಮಿಸಲು ಪ್ರಯತ್ನಿಸುತ್ತಿದ್ದಾಗ, ಗೇಟ್ ತೆರೆಯಲು ವಿಳಂಬವಾಯಿತು. "ಗೇಟ್ ತೆರೆಯಲು ಸ್ವಲ್ಪ ಸಮಯ ಹಿಡಿಯಿತು ಮತ್ತು ಮೇಡಂ ಕಾಯುತ್ತಿದ್ದರು. ಬೇರೇನೂ ಇರಲಿಲ್ಲ. ಹಾಗಾಗಿ ಅವರು ಕಿರುಚಲು ಮತ್ತು ನಿಂದನೆಗಳನ್ನು ಪ್ರಾರಂಭಿಸಿದರು," ಎಂದು ಭದ್ರತಾ ಸಿಬ್ಬಂದಿ ಕರಣ್ ಚೌಧರಿ ಸುದ್ದಿಗಾರರಿಗೆ ತಿಳಿಸಿದರು.

बदतमीजी और गुंडागर्दी का अंत कुछ ऐसे हुआ... pic.twitter.com/fPoqkOiXVk
— Swati Maliwal (@SwatiJaiHind) August 21, 2022

ಮಹಿಳೆ ಪಾನಮತ್ತಳಾಗಿದ್ದಳು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಆಕೆಗೆ ಇನ್ನೂ ಪರೀಕ್ಷೆ ನಡೆಯಬೇಕಿದೆ. "ಭವ್ಯ ರೈ ಎಂಬ ಮಹಿಳೆಯು ವಸತಿ ಕೊಠಡಿಯ ಭದ್ರತಾ ಸಿಬ್ಬಂದಿಯೊಂದಿಗೆ ಅನುಚಿತವಾಗಿ ವರ್ತಿಸುವ ವಿಡಿಯೊದಲ್ಲಿ ಸಿಕ್ಕಿಬಿದ್ದಿದ್ದಾಳೆ" ಎಂದು ಪೊಲೀಸ್ ಹಿರಿಯ ಅಧಿಕಾರಿ ಭಾರ್ತಿ ಸಿಂಗ್ ಹೇಳಿದ್ದಾರೆ. "ಸೆಕ್ಯುರಿಟಿ ಗಾರ್ಡ್‌ನ ದೂರಿನ ಆಧಾರದ ಮೇಲೆ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ. ಆಕೆಯ ವಾಹನವನ್ನು ಪೊಲೀಸ್ ಠಾಣೆಗೆ ತರಲಾಗಿದೆ ಮತ್ತು ಆಕೆಯನ್ನು ಬಂಧಿಸಲಾಗಿದೆ" ಎಂದು ಅವರು ಹೇಳಿದರು.

Delay in Gate Opening- Delhi Woman Insults Security Guard

ಭಾರತೀಯ ದಂಡ ಸಂಹಿತೆ 153ಎ (ಸಾಮರಸ್ಯಕ್ಕೆ ಧಕ್ಕೆ ತರುವಂತಹ ಕೃತ್ಯಗಳು), 323 (ಸ್ವಯಂಪ್ರೇರಿತವಾಗಿ ನೋವುಂಟು ಮಾಡುವುದು), 504 (ಸಾರ್ವಜನಿಕ ಶಾಂತಿ ಭಂಗವನ್ನು ಪ್ರಚೋದಿಸುವ ಉದ್ದೇಶಪೂರ್ವಕ ಅವಮಾನ), 506 (ಅಪರಾಧ ಬೆದರಿಕೆ) ಅಡಿಯಲ್ಲಿ ಪ್ರಕರಣವನ್ನು ದಾಖಲಿಸಲಾಗಿದೆ.