ಮಾಧ್ಯಮಕ್ಕೆ ಆಮ್ ಆದ್ಮಿ ಅರವಿಂದ್ ಕೇಜ್ರಿವಾಲ್ ಪ್ರಲೋಭೆ

ನವದೆಹಲಿ, ಮಾರ್ಚ್ 10: ಆಮ್ ಆದ್ಮಿ ಪಕ್ಷದ ನಾಯಕ, ದೆಹಲಿ ಮಾಜಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲಾರ ಮತ್ತೊಂದು ಮುಖವಾಡ ಬಯಲಿಗೆ ಬಂದಿದೆ. ಹೇಳಿಕೇಳಿ ಇದು ಚುನಾವಣಾ ಸಂದರ್ಭ. ರಾಜಕೀಯ ನಾಯಕರು ಮಾಧ್ಯಮಗಳಲ್ಲಿ ಹೆಚ್ಚು ಮಿಂಚಲು ಹಪಹಪಿಸುತ್ತಾರೆ. ಇದಕ್ಕೆ ನವ ರಾಜಕೀಯ ನಾಯಕ ಕೇಜ್ರಿವಾಲಾರು ಹೊರತಾಗಿಲ್ಲ. ವಿಷಯ ಅಷ್ಟೇ ಆಗಿದ್ದರೆ ಎಲ್ಲರೊಳಗೊಬ್ಬ ಮಂಕುತಿಮ್ಮ ಅನ್ನಬಹುದಿತ್ತು.

ಆದರೆ ನಾಜೂಕಯ್ಯನಾಗಲು ಹೊರಟ ಕೇಜ್ರಿವಾಲ್, ತನ್ನನ್ನು ಸಂದರ್ಶಿಸಿದ ಟಿವಿ ವಾಹಿನಿಯ ಆ್ಯಂಕರ್ ಗೆ ಪ್ರಲೋಭೆ ಒಡ್ಡಿ, ನನ್ನ ಸಂದರ್ಶನದ ಇಂತಿಂತಹ ಮಾತುಗಳನ್ನು ನಿರ್ದಿಷ್ಟವಾಗಿ ಹೈಲೈಟ್ ಮಾಡು ಎಂದಿದ್ದಾರೆ. ಇದು ಈಗ ತೀವ್ರ ಚರ್ಚೆ ಮತ್ತು ವಿವಾದಕ್ಕೆ ಕಾರಣವಾಗಿದೆ.

ಇದು ಕ್ಯಾಮರಾದಲ್ಲಿ ದಾಖಲಾಗಿದ್ದು, ಸದರಿ ವಿಡಿಯೋ ಭಾನುವಾರ ರಾತ್ರಿ Youtubeಗೆ ಅಪ್ ಲೋಡ್ ಆಗಿದ್ದು, ಜನ ಮುಗಿಬಿದ್ದು ನೋಡುತ್ತಿದ್ದಾರೆ.

ಸುಮಾರು 1 ನಿಮಿಷಕ್ಕಿಂತ ಹೆಚ್ಚು ಅವಧಿಯ ಈ ವಿಡಿಯೋದಲ್ಲಿ ಕೇಜ್ರಿವಾಲ್ ಮತ್ತು ಆತನನ್ನು interview ಮಾಡಿದ ಆ್ಯಂಕರ್, ಇಬ್ಬರೂ ಸಂದರ್ಶನ ಮುಗಿದ ಮೇಲೆ ಸೌಹಾರ್ಧ ಮಾತುಕತೆ ನಡೆಸುವುದು ಕಂಡುಬರುತ್ತದೆ. ಆದರೆ ಕೇಜ್ರಿವಾಲ್ ಇದಕ್ಕಿದ್ದಂತೆ ಬೇಡಿಕೆಯ ಧ್ವನಿಯಲ್ಲಿ ಸಂದರ್ಶನದ ಇಂತಿಂಥ ಭಾಗಗಳಿಗೆ ಹೆಚ್ಚು ಪ್ರಾಮುಖ್ಯತೆ ನೀಡುವಂತೆ (Please play it up more) ಮೊರೆಹೋಗುತ್ತಾರೆ.

ಅರವಿಂದ್ ಕೇಜ್ರಿವಾಲಾ ಅವರು ದೆಹಲಿ ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಿದ ಸಂದರ್ಭದಲ್ಲಿ ಈ ಸಂದರ್ಶನ ಮಾಡಲಾಗಿದೆ. ಆದರೆ ಮಾಧ್ಯಮಗಳು ತನ್ನ ವಿರುದ್ಧ ಪಕ್ಷಪಾತ ಧೋರಣೆ ಅನುಸರಿಸುತ್ತಿವೆ ಎಂದು ಕೇಜ್ರಿವಾಲ್ ಮಾಧ್ಯಮಗಳ ಮೇಲೆ ಶನಿವಾರ ಗೂಬೆ ಕೂರಿಸಿದ್ದರು. ಅದಾಗುತ್ತಿದ್ದಂತೆ 'ಅರವಿಂದ್ ಕೇಜ್ರಿವಾಲಾ ಸಂದರ್ಶನ' Youtubeನಲ್ಲಿ ನಿರಂತರವಾಗಿ ಪ್ರಸಾರವಾಗುತ್ತಿದೆ. (ಪಿಟಿಐ)

English summary

Aam Aadmi chief Arvind Kejriwal asks TV anchor to play up sections of interview. A video showing AAP leader Arvind Kejriwal asking a TV news anchor to emphasise on certain sections of his interview went viral on Youtube on Sunday night. The video, which is over a minute long, shows Kejriwal and the news anchor in a conversation after the interview.