ದಸರಾ : ಬೆಂಗಳೂರು-ಮೈಸೂರು ಸಂಪರ್ಕಿಸಲಿದೆ ಅಲಯನ್ಸ್ ಏರ್

ಮೈಸೂರು, ಅಕ್ಟೋಬರ್ 04 : ಮೈಸೂರು ದಸರಾ ಹಿನ್ನಲೆಯಲ್ಲಿ ಬೆಂಗಳೂರು-ಮೈಸೂರು ನಡುವೆ ವಿಮಾನ ಸೇವೆ ಆರಂಭವಾಗಲಿದೆ. ಅಕ್ಟೋಬರ್ 10ರಿಂದ ಹತ್ತು ದಿನಗಳ ಕಾಲ ಮಾತ್ರ ವಿಮಾನ ಸೇವೆ ಒದಗಿಸಲು ಅಲಯನ್ಸ್ ಏರ್ ಮುಂದಾಗಿದೆ.

ಏರ್ ಇಂಡಿಯಾದ ಅಂಗ ಸಂಸ್ಥೆಯಾದ ಅಲಯನ್ಸ್ ಏರ್ ಅಕ್ಟೋಬರ್ 10 ರಿಂದ 20ರ ತನಕ ಬೆಂಗಳೂರು-ಮೈಸೂರು ನಡುವೆ ವಿಮಾನ ಹಾರಾಟವನ್ನು ನಡೆಸಲಿದೆ. ದಸರಾದಲ್ಲಿ ಪಾಲ್ಗೊಳ್ಳಲು ಪ್ರವಾಸಿಗರಿಗೆ ಸಹಾಯಕವಾಗಲಿ ಎಂದು ವಿಮಾನ ಹಾರಾಟ ಆರಂಭಿಸಲಾಗುತ್ತಿದೆ.

70 ಸೀಟುಗಳ ಎಟಿಆರ್-72 ವಿಮಾನ ಉಭಯ ನಗರಗಳ ನಡುವೆ ಸಂಚಾರ ನಡೆಸಲಿದೆ. ಸದ್ಯದ ವೇಳಾಪಟ್ಟಿಯಂತೆ ಪ್ರತಿದಿನ ಮಧ್ಯಾಹ್ನ 3 ಗಂಟೆಗೆ ಬೆಂಗಳೂರಿನಿಂದ ಹೊರಡುವ ವಿಮಾನ 3.30ಕ್ಕೆ ಮೈಸೂರಿಗೆ ತಲುಪಲಿದೆ.

ಮೈಸೂರಿನಿಂದ ಮಧ್ಯಾಹ್ನ 4 ಗಂಟೆಗೆ ಹೊರಡಲಿರುವ ವಿಮಾನ 4.30ಕ್ಕೆ ಬೆಂಗಳೂರಿಗೆ ವಾಪಸ್ ಆಗಲಿದೆ. ಬೆಂಗಳೂರು-ಮೈಸೂರು ನಡುವೆ ಎಷ್ಟು ಪ್ರಯಾಣ ದರ ನಿಗದಿ ಮಾಡಬೇಕು ಎಂದು ಸಂಸ್ಥೆ ಇನ್ನೂ ನಿರ್ಧರಿಸಿಲ್ಲ.

ಟ್ರೂಜೆಟ್ ಸಂಸ್ಥೆ ಹೈದರಾಬಾದ್-ಮೈಸೂರು-ಚೆನ್ನೈ ನಡುವೆ ಕಳೆದ ವರ್ಷದ ದಸರಾದಿಂದ ಸೇವೆ ಒದಗಿಸುತ್ತಿದೆ. ಈ ಸೇವೆ ಜನರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ವಾರದ ರಜೆ ದಿನಗಳಲ್ಲಿ ವಿಮಾನ ಸಂಪೂರ್ಣವಾಗಿ ಭರ್ತಿ ಆಗಿರುತ್ತದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

English summary

Alliance Air will connect Bengaluru and Mysuru for 10 days starting October 10. Airline will operate a 70 seater ATR-72 aircraft from October 10 to 20 during Mysuru Dasaara 2018.