ಸಮುದ್ರದಲ್ಲಿ ಉರುಳಿದ ನೌಕೆ: ಮೂವರು ನೌಕಾಧಿಕಾರಿಗಳ ಕೋರ್ಟ್ ಮಾರ್ಷಲ್
ನವದೆಹಲಿ, ಜುಲೈ 30: ನೌಕಾಪಡೆಯ ಯುದ್ಧನೌಕೆ ಐಎನ್ಎಸ್ ಬೆಟ್ವಾ 2016ರಲ್ಲಿ ಮುಳುಗಿದ ಪ್ರಕರಣದಲ್ಲಿ ನಿರ್ಲಕ್ಷ್ಯದ ಆರೋಪದಲ್ಲಿ ಮೂವರು ಹಿರಿಯ ನೌಕಾ ಅಧಿಕಾರಿಗಳನ್ನು ಸಾಮಾನ್ಯ ಕೋರ್ಟ್ ಮಾರ್ಷಲ್ಗೆ ಒಳಪಡಿಸಲಾಗಿದೆ.
ಭಾರತೀಯ ನೌಕಾಪಡೆಯ ಕ್ಯಾಪ್ಟನ್ (ಸೇನಾ ಕರ್ನಲ್ಗೆ ಸಮಾನವಾದ ಹುದ್ದೆ) ಸೇರಿದಂತೆ ಮೂವರು ಮುಂಬೈ ನೌಕಾ ನೆಲೆಯಲ್ಲಿ ಜನರಲ್ ಕೋರ್ಟ್ ಮಾರ್ಷಲ್ ಎದುರಿಸುತ್ತಿದ್ದಾರೆ. ನೌಕಾನೆಲೆಯ ಡಕ್ಯಾರ್ಡ್ನಲ್ಲಿ ಸುಮಾರು 2,000 ಕೋಟಿ ರೂ. ವೆಚ್ಚದ ನೌಕೆಯು ದುರಸ್ತಿ ಮಾಡುವ ಸಂದರ್ಭದಲ್ಲಿ ಒಂದು ಬದಿ ಉರುಳಿಬಿದ್ದಿತ್ತು.
ನೌಕಾಪಡೆಯ ಕಮಾಡೋರ್ ಶ್ರೇಣಿಯ ಅಧಿಕಾರಿಯ ನೇತೃತ್ವದಲ್ಲಿ ಒಂದು ವಾರದಿಂದ ಕೋರ್ಟ್ ಮಾರ್ಷಲ್ ವಿಚಾರಣೆ ಪ್ರಕ್ರಿಯೆ ನಡೆಯುತ್ತಿದೆ.
ಐಎನ್ಎಸ್ ಬೆಟ್ವಾ ನೌಕೆಯನ್ನು ಬಂದರಿನಿಂದ ತೆಗೆಯುತ್ತಿದ್ದಾಗ ಉರುಳಿ ಬಿದ್ದಿತ್ತು. ಘಟನೆಯಲ್ಲಿ ಇಬ್ಬರು ನಾವಿಕರು ಮೃತಪಟ್ಟಿದ್ದರೆ, 14 ಮಂದಿ ಸಣ್ಣ ಪುಟ್ಟ ಗಾಯಗಳಿಂದ ಬಚಾವಾಗಿದ್ದರು.
ನೀರಿನ ಅಡಿಭಾಗದ ದುರಸ್ತಿಗಾಗಿ ಅದನ್ನು ಬಂದರಿನಲ್ಲಿ ನಿಲ್ಲಿಸಲಾಗಿತ್ತು. 3,850 ಟನ್ ತೂಕದ ಶಿಪ್ ಒಂದು ಬದಿ ಮಗುಚಿ ಬಿದ್ದಿತ್ತು. ಬಳಿಕ ಅದನ್ನು ಎತ್ತಿ ಸರಿಪಡಿಸಲಾಗಿತ್ತು. ಪ್ರಸ್ತುತ ಅದು ಕಾರ್ಯಾಚರಣೆ ನಡೆಸುತ್ತಿದೆ. ಈ ಘಟನೆಗೆ ನೌಕಾಪಡೆಯ ಅಧಿಕಾರಿಗಳನ್ನು ಹೊಣೆಗಾರರನ್ನಾಗಿ ಮಾಡುವಂತೆ ಸರ್ಕಾರ ಸೂಚನೆ ನೀಡಿತ್ತು.
Click it and Unblock the Notifications
Sign in with Google