Madikeri Dasara 2022 : ಮಡಿಕೇರಿ ದಸರಾ ಲಾಂಛನ ಲೋಕಾರ್ಪಣೆ

Updated: Wednesday, September 14, 2022, 9:50 [IST]

ಮಡಿಕೇರಿ, ಸೆಪ್ಟೆಂಬರ್ 12: 2022ನೇ ಸಾಲಿನ ಮಡಿಕೇರಿ ದಸರಾ ಸಿದ್ಧತೆಗಳು ಆರಂಭಗೊಂಡಿವೆ. ದಸರಾದ ಲಾಂಛನ ಮತ್ತು ವೆಬ್‌ಸೈಟ್ ಬಿಡುಗಡೆ ಮಾಡಲಾಗಿದೆ.

ಮಂಗಳವಾರ ಮಡಿಕೇರಿ ನಗರಸಭೆ ಅಧ್ಯಕ್ಷರಾದ ಅನಿತಾ ಪೂವಯ್ಯ, ಪ್ರಧಾನ ಕಾರ್ಯದರ್ಶಿ ರಾಜೇಶ್ ಯಲ್ಲಪ್ಪ, ಕಾರ್ಯಾಧ್ಯಕ್ಷರಾದ ಕೆ. ಎಸ್. ರಮೇಶ್ ಲಾಂಛನ ಬಿಡುಗಡೆ ಮಾಡಿದರು.

ಸೆಪ್ಟೆಂಬರ್ 2ರಂದು ಸಾಂಪ್ರದಾಯಿಕ ಪೂಜೆಯೊಂದಿಗೆ ಮಡಿಕೇರಿ ಜನೋತ್ಸವ ದಸರಾ ಆಚರಣೆಗೆ ಚಾಲನೆ ಕೊಡಲಾಗಿದೆ. ದಸರಾ ಸಮಿತಿ ಕಾರ್ಯಾಧ್ಯಕ್ಷ ಕೆ. ಎಸ್. ರಮೇಶ್ ಮಾತನಾಡಿ, "ಈ ಬಾರಿ ವಿಜೃಂಭಣೆಯಿಂದ ದಸರಾ ಹಬ್ಬವನ್ನು ಆಚರಣೆ ಮಾಡಲಾಗುತ್ತದೆ. ಸರ್ಕಾರ 1 ಕೋಟಿ ರೂ. ಅನುದಾನ ನೀಡಿದೆ" ಎಂದು ಹೇಳಿದ್ದಾರೆ.

ಅನುದಾನ ಹಂಚಿಕೆ ಬಿಕ್ಕಟ್ಟು; ಮಡಿಕೇರಿ ದಸರಾಕ್ಕೆ ನೀಡಿರುವ ಅನುದಾನ ಹಂಚಿಕೆಯಲ್ಲಿ ಬಿಕ್ಕಟ್ಟು ಉಂಟಾಗಿದೆ. ಸರ್ಕಾರ ದಸರಾ ಆಚರಣೆಗೆ 1 ಕೋಟಿ ರೂ. ಅನುದಾನ ನೀಡಿದೆ. ಆದರೆ ದಶಮಂಟಪ- ನಾಲ್ಕು ಕರಗಗಳಿಗೆ ಹೆಚ್ಚಿನ ಅನುದಾನ ನೀಡಬೇಕು ಎಂಬ ಬೇಡಿಕೆ ಕೇಳಿ ಬಂದಿದೆ. ಮಂಟಪಗಳಿಗೆ ತಲಾ 3.30 ಲಕ್ಷ ಮತ್ತು ಕರಗಗಳಿಗೆ 2 ಲಕ್ಷ ದಸರಾ ಸಮಿತಿ ಕಾರ್ಯಾಧ್ಯಕ್ಷ ಕೆ. ಎಸ್. ರಮೇಶ್ ಘೋಷಣೆ ಮಾಡಿದ್ದರು.

ಕಳೆದ ವರ್ಷ ಸಹ ಮಡಿಕೇರಿ ದಸರಾಕ್ಕೆ ಸರ್ಕಾರ 1 ಕೋಟಿ ರೂ. ಅನುದಾನ ಮಂಜೂರು ಮಾಡಿತ್ತು. ಶಾಸಕರ ಸೂಚನೆಯಂತೆ ಇದರಲ್ಲಿ 75 ಲಕ್ಷ ರೂ.ಗಳನ್ನು ಗಾಂಧಿ ಮೈದಾನದಲ್ಲಿ ಸಭಾಂಗಣ ನಿರ್ಮಾಣ ಮಾಡಲು ಬಳಕೆ ಮಾಡಲಾಗಿದೆ. ಕಾಮಗಾರಿ ನಡೆಯುತ್ತಿದ್ದು, ಸೆ. 25ರೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆ ಇದೆ.

ಮಂಟಪಗಳಿಗೆ 3.50 ಲಕ್ಷ, ಕರಗಗಳಿಗೆ 2.25 ಲಕ್ಷ ರೂ. ನೀಡುವ ಭರವಸೆಯನ್ನು ಕೆ. ಎಸ್. ರಮೇಶ್ ನೀಡಿದ್ದರು. ಕಲಾಕೃತಿ ಸಿದ್ಧಪಡಿಸಿ ಹೆಚ್ಚು ಹಣ ಖರ್ಚಾಗುತ್ತದೆ. ಅನುದಾನ ಕಡಿತ ಮಾಡಿದಲ್ಲಿ ಪ್ರತಿಭಟನೆ ಮಾಡಬೇಕಾಗುತ್ತದೆ ಎಂದು ದಶಮಂಟಪ ಸಮಿತಿ ಅಧ್ಯಕ್ಷ ಮಜು ಮಂಜುನಾಥ್ ಹೇಳಿದ್ದಾರೆ.

ಮಡಿಕೇರಿ ದಸರಾ ಲಾಂಛನ ಹಾಗೂ ವೆಬ್ ಸೈಟ್ ಬಿಡುಗಡೆ, ಅಧ್ಯಕ್ಷರಾದ ಅನಿತಾ ಪೂವಯ್ಯ, ಕಾರ್ಯಾಧ್ಯಕ್ಷರಾದ ಕೆಎಸ್ ರಮೇಶ್ ಅವರು ಉದ್ಘಾಟನೆ ಮಾಡಿದರು. pic.twitter.com/h3GQBCyjnQ
— Coorgthekashmirofkarnataka (@Coorgthekashmir) September 13, 2022