‘ತಾಯ್ತನ ಎಂಬುದು ವೃತ್ತಿಜೀವನದ ಪೂರ್ಣವಿರಾಮವಲ್ಲ’: ಹೆರಿಗೆಯ ನಂತರ ಡಿಜಿಟಲ್ ಉದ್ಯಮದಲ್ಲಿ ಮಿಂಚಿದ ಪ್ರಿಯಾ ಪೋರ್ವಾಲ್

ಇಂದಿನ ದಿನಗಳಲ್ಲಿ ಮಹಿಳೆಯರ ವೃತ್ತಿಜೀವನದಲ್ಲಿ ಈ ಹೆರಿಗೆ ಮತ್ತು ಉದ್ಯೋಗ ಕಡಿತ ಬಹುದೊಡ್ಡ ಸವಾಲಾಗಿ ಪರಿಣಮಿಸುತ್ತಿವೆ. ಆದರೆ ಇಲ್ಲೊಬ್ಬರು ಮಹಿಳೆ ಸತತ ಎರಡು ಬಾರಿ ಕೆಲಸ ಕಳೆದುಕೊಂಡು, ತಾಯ್ತನಕ್ಕಾಗಿ ವೃತ್ತಿಜೀವನಕ್ಕೆ ವಿರಾಮ ನೀಡಿದರೂ ಕೂಡ ಛಲ ಬಿಡದೆ ಇದೀಗ ಡಿಜಿಟಲ್ ಉದ್ಯಮದಲ್ಲಿ ಅಪಾರ ಯಶಸ್ಸು ಸಾಧಿಸಿದ್ದಾರೆ. 39 ವರ್ಷದ ಡಾ. ಪ್ರಿಯಾ ಪೋರ್ವಾಲ್ ಅವರು ತಮ್ಮ ಜೀವನವನ್ನು ಮರುರೂಪಿಸಲು ತೆಗೆದುಕೊಂಡ ದಿಟ್ಟ ನಿರ್ಧಾರವು ಇದೀಗ ಆನ್‌ಲೈನ್‌ನಲ್ಲಿ ಅನೇಕರಿಗೆ ಸ್ಫೂರ್ತಿಯಾಗಿದೆ.

ಇನ್‌ಸ್ಟಾಗ್ರಾಮ್‌ನಲ್ಲಿ ತಮ್ಮ ಕಥೆಯನ್ನು ಹಂಚಿಕೊಂಡಿರುವ ಡಾ. ಪ್ರಿಯಾ ಪೋರ್ವಾಲ್, ಎರಡು ಬಾರಿ ಉದ್ಯೋಗ ಕಳೆದುಕೊಂಡ ನಂತರ ಮತ್ತು ತಾಯಿಯಾದ ಬಳಿಕ ಕೆಲಸದಿಂದ ದೂರ ಉಳಿದಿದ್ದು ತಮ್ಮ ವೃತ್ತಿಪಥವನ್ನು ಮರುಚಿಂತನೆ ಮಾಡಲು ಹೇಗೆ ಕಾರಣವಾಯಿತು ಎಂಬುದನ್ನು ವಿವರಿಸಿದ್ದಾರೆ. 39ನೇ ವಯಸ್ಸಿನಲ್ಲಿ ಅವರು ತಮ್ಮ ವೃತ್ತಿಜೀವನವನ್ನು ಹಿಂತಿರುಗಿ ಒಮ್ಮೆ ನೋಡಿದಾಗ, ಅವರು ಹತ್ತು ವರ್ಷಗಳಿಗೂ ಹೆಚ್ಚು ಕಾಲ ಸಹಾಯಕ ಪ್ರಾಧ್ಯಾಪಕಿಯಾಗಿ ಕೆಲಸ ಮಾಡಿದ್ದರು. ಆದರೆ ಆ ಬಳಿಕ ಅವರ ಜೀವನ ಅನೇಕ ಅನಿರೀಕ್ಷಿತ ತಿರುವುಗಳನ್ನು ಪಡೆದುಕೊಂಡಿತ್ತು.

ತಮ್ಮ ಪೋಸ್ಟ್‌ನಲ್ಲಿ, ಅವರು 35ನೇ ವಯಸ್ಸಿನಲ್ಲಿ ತಾಯಿಯಾದದ್ದಾಗಿ ಬಹಿರಂಗಪಡಿಸಿದ್ದಾರೆ. ಈ ಮಹತ್ವದ ಘಟ್ಟವು ಅವರ 12 ವರ್ಷಗಳ ಸುದೀರ್ಘ ವೃತ್ತಿಜೀವನವನ್ನು ತಾತ್ಕಾಲಿಕವಾಗಿ ನಿಲ್ಲಿಸುವಂತೆ ಮಾಡಿತು. ಅದೇ ಸಮಯದಲ್ಲಿ, ಅವರು ತಮ್ಮ ಉದ್ಯೋಗವನ್ನೂ ಕಳೆದುಕೊಳ್ಳಬೇಕಾಯಿತು. ಈ ಅನುಭವವು ಅವರನ್ನು ತೀವ್ರವಾಗಿ ಘಾಸಿಗೊಳಿಸಿತ್ತು. ಆ ಕಷ್ಟದ ದಿನಗಳನ್ನು ನೆನಪಿಸಿಕೊಳ್ಳುತ್ತಾ, "ಅದರಿಂದ ಚೇತರಿಸಿಕೊಳ್ಳಲು ತಿಂಗಳುಗಳೇ ಬೇಕಾಯಿತು, ನನ್ನ ಕಾಲ ಕೆಳಗಿನ ನೆಲವೇ ಕುಸಿದು ಹೋದಂತೆ ಭಾಸವಾಗಿತ್ತು" ಎಂದು ಅವರು ಭಾವನಾತ್ಮಕವಾಗಿ ಬರೆದುಕೊಂಡಿದ್ದಾರೆ.

ಮತ್ತೆ ಶೂನ್ಯದಿಂದ ಆರಂಭಿಸಲು ನಿರ್ಧರಿಸಿದ ಪ್ರಿಯಾ, ವಿವಿಧ ಶಿಕ್ಷಣ ಸಂಸ್ಥೆಗಳಲ್ಲಿ ಅತಿಥಿ ಉಪನ್ಯಾಸಕಿಯಾಗಿ ಅವಕಾಶಗಳನ್ನು ಹುಡುಕಿದರು. ನಂತರ ಮತ್ತೊಂದು ಶೈಕ್ಷಣಿಕ ಹುದ್ದೆಯನ್ನು ಗಿಟ್ಟಿಸಿಕೊಂಡರು. ಆದರೆ, ಅಲ್ಲಿನ ಕೆಲಸದ ವಾತಾವರಣವು ಅವರ ನಿರೀಕ್ಷೆಗಳನ್ನು ಪೂರೈಸಲಿಲ್ಲ. ಹೀಗಾಗಿ ಅವರು ಮತ್ತೆ ಕೆಲಸದಿಂದ ದೂರ ಉಳಿಯಬೇಕಾಯಿತು. ಎಂಟೆಕ್ (MTech), ಎಂಬಿಎ (MBA) ಮತ್ತು ಪಿಎಚ್‌ಡಿ (PhD) ಯಂತಹ ಉನ್ನತ ಶೈಕ್ಷಣಿಕ ಅರ್ಹತೆಗಳನ್ನು ಹೊಂದಿದ್ದರೂ, ವೃತ್ತಿಜೀವನವನ್ನು ಮರುಪ್ರಾರಂಭಿಸುವುದು ಅವರಿಗೆ ಸುಲಭವಾಗಿರಲಿಲ್ಲ.

ಆದರೆ ಕೋವಿಡ್-19 ಸಾಂಕ್ರಾಮಿಕ ರೋಗದ ಸಮಯದಲ್ಲಿ ಅವರ ಜೀವನದಲ್ಲಿ ಬಹುದೊಡ್ಡ ತಿರುವು ಸಿಕ್ಕಿತು. 37ನೇ ವಯಸ್ಸಿನಲ್ಲಿ, ಸಣ್ಣ ಮಗುವನ್ನು ಬೆಳೆಸುವ ಜವಾಬ್ದಾರಿ ಮತ್ತು ಭವಿಷ್ಯದ ಅನಿಶ್ಚಿತತೆಯ ನಡುವೆಯೂ, ಅವರು ತಮ್ಮ ವೃತ್ತಿಜೀವನದ ನಿಯಂತ್ರಣವನ್ನು ತಮ್ಮ ಕೈಗೇ ತೆಗೆದುಕೊಳ್ಳುವ ದಿಟ್ಟ ನಿರ್ಧಾರ ಮಾಡಿದರು. "ನಾನು ನನ್ನದೇ ಷರತ್ತುಗಳ ಮೇಲೆ ಹೊಸದಾಗಿ ನನ್ನ ವೃತ್ತಿ ಜೀವನ ಪ್ರಾರಂಭಿಸಲು ನಿರ್ಧರಿಸಿದೆ" ಎಂದು ಅವರು ಹೇಳಿದ್ದಾರೆ. ಆರ್ಥಿಕ ಸ್ವಾತಂತ್ರ್ಯವು ಅವರಿಗೆ ಅತಿದೊಡ್ಡ ಪ್ರೇರಕ ಶಕ್ತಿಯಾಯಿತು.

ಆರಂಭದಲ್ಲಿ ಕ್ಯಾಮೆರಾ ಮುಂದೆ ಬರಲು ನಾಚಿಕೆಪಡುತ್ತಿದ್ದರು ಮತ್ತು ತಮ್ಮ ವೃತ್ತಿಪಯಣವನ್ನು ಸಾರ್ವಜನಿಕವಾಗಿ ಹಂಚಿಕೊಳ್ಳಲು ಹಿಂಜರಿಯುತ್ತಿದ್ದ ಅವರು, ಆ ಎಲ್ಲಾ ಭಯಗಳನ್ನು ಮೆಟ್ಟಿ ನಿಂತು ತಮ್ಮದೇ ಆದ ಸ್ವಂತ ವ್ಯವಹಾರವನ್ನು ಕಟ್ಟಲು ಡಿಜಿಟಲ್ ಜಗತ್ತಿಗೆ ಕಾಲಿಟ್ಟರು. "ಇದು ಕೇವಲ ಹಣಕ್ಕಾಗಿ ಮಾತ್ರವಲ್ಲ, ನನಗಾಗಿ" ಎಂದು ಬರೆದುಕೊಳ್ಳುವ ಮೂಲಕ ಈ ನಡೆಯ ವೈಯಕ್ತಿಕ ಪ್ರಾಮುಖ್ಯತೆಯನ್ನು ಅವರು ಒತ್ತಿ ಹೇಳಿದ್ದಾರೆ.

ಇಂದು ಅವರ ಆ ದಿಟ್ಟ ನಿರ್ಧಾರವು ದೊಡ್ಡ ಪ್ರತಿಫಲವನ್ನು ನೀಡಿದೆ. ಕಳೆದ ವರ್ಷ ಅವರು ಯುಎಸ್‌ಡಿ ಲೆಕ್ಕದಲ್ಲಿ ಐದು-ಅಂಕಿಯ ಆದಾಯವನ್ನು ಗಳಿಸಿರುವುದಾಗಿ ಬಹಿರಂಗಪಡಿಸಿದ್ದಾರೆ. ಇತರ ಮಹಿಳೆಯರಿಗೆ ಅವರ ಸಂದೇಶವು ಅತ್ಯಂತ ಸ್ಪಷ್ಟವಾಗಿದೆ: "ತಾಯ್ತನ ಎಂಬುದು ವೃತ್ತಿಜೀವನದ ಪೂರ್ಣವಿರಾಮವಲ್ಲ ."

English summary

Read the inspiring story of Dr Priya Porwal, a 39-year-old woman who bounced back from two layoffs and a maternity break to build a successful digital business.