ಟ್ರಂಪ್ 70 ದಿನದಲ್ಲಿ ನಿರ್ಗಮಿಸುತ್ತಾರೆ, ಆದರೆ ನಾವಿಲ್ಲಿ ಕೊನೆವರೆಗೂ ಉಳಿಯುತ್ತೇವೆ: ಇರಾನ್
ಟೆಹರಾನ್, ನವೆಂಬರ್ 9: ಡೊನಾಲ್ಡ್ ಟ್ರಂಪ್ ಅವರ ಅಧ್ಯಕ್ಷಗಿರಿ ಅಂತ್ಯಗೊಳ್ಳುವ ಮೊದಲು ಇರಾನ್ ಮೇಲೆ ಹೊಸದಾಗಿ ಹಲವು ಕಠಿಣ ನಿರ್ಬಂಧಗಳನ್ನು ಹೇರಲು ಚಿಂತನೆ ನಡೆಸಿದೆ ಎಂಬ ವರದಿಯ ನಡುವೆಯೇ ಇರಾನ್, ಭವಿಷ್ಯದಲ್ಲಿ ಸಹಾಯಕ್ಕಾಗಿ ಅಮೆರಿಕ ಮೇಲೆ ಅತಿಯಾಗಿ ಅವಲಂಬಿತವಾಗಬಾರದು ಎಂದು ಮಧ್ಯಪ್ರಾಚ್ಯದಲ್ಲಿರುವ ತನ್ನ ವೈರಿ ದೇಶಗಳಿಗೆ ಹೇಳಿದೆ.
'ಟ್ರಂಪ್ ಇನ್ನು 70 ದಿನಗಳಲ್ಲಿ ಹೋಗಿಬಿಡುತ್ತಾರೆ. ಆದರೆ ನಾವು ಇಲ್ಲಿ ಕೊನೆಯವರೆಗೂ ಇರುತ್ತೇವೆ' ಎಂದು ಇರಾನ್ನ ವಿದೇಶಾಂಗ ಸಚಿವ ಮೊಹಮ್ಮದ್ ಜಾವೇದ್ ಜಾರಿಫ್ ಸೋಮವಾರ ಟ್ವೀಟ್ ಮಾಡಿದ್ದು, 'ಇದು ನಮ್ಮ ನೆರೆಹೊರೆಯವರಿಗೆ ಪ್ರಾಮಾಣಿಕ ಸಂದೇಶ' ಎಂದಿದ್ದಾರೆ.
ಒಂದು ಇಂಗ್ಲಿಷ್ ಮತ್ತು ಇನ್ನೊಂದು ಅರೇಬಿಕ್ ಭಾಷೆಗಳಲ್ಲಿ ಟ್ವೀಟ್ ಮಾಡಿರುವ ಜಾರಿಫ್, ಭದ್ರತೆ ಒದಗಿಸುವ ಸಲುವಾಗಿ ಹೊರಗಿನವರನ್ನು ಬೇಡುವುದನ್ನು ನಿಲ್ಲಿಸುವಂತೆ ಮತ್ತು ಭಿನ್ನಾಭಿಪ್ರಾಯಗಳನ್ನು ಪರಿಹರಿಸಲು ಮಾತುಕತೆಯನ್ನು ಆರಂಭಿಸುವಂತೆ ನೆರೆಯ ದೇಶಗಳಿಗೆ ಕರೆ ನೀಡಿದ್ದಾರೆ.
ಇರಾನ್ ಮೇಲೆ ಅಮೆರಿಕವು ಹೊಸ ಹೊಸ ನಿರ್ಬಂಧಗಳ ಪ್ರವಾಹವನ್ನೇ ಹರಿಸಲು ಚಿಂತನೆ ನಡೆಸಿದೆ ಎಂಬ ಮಾಧ್ಯಮ ವರದಿಗಳ ಮರುದಿನ ಜಾರಿಫ್ ನೆರೆಯ ದೇಶಗಳಿಗೆ ಈ ಸಂದೇಶ ರವಾನಿಸಿದ್ದಾರೆ.
'ನಮ್ಮ ನೆರೆಹೊರೆಯವರಿಗೆ ಒಂದು ಪ್ರಾಮಾಣಿಕ ಸಂದೇಶ. ಟ್ರಂಪ್ ಇನ್ನು 70 ದಿನಗಳಲ್ಲಿ ಹೋಗುತ್ತಾರೆ. ಆದರೆ ನಾವು ಇಲ್ಲಿ ಕೊನೆಯವರೆಗೂ ಉಳಿಯುತ್ತೇವೆ. ಭದ್ರತೆ ಒದಗಿಸಲು ಹೊರಗಿನವರೊಂದಿಗೆ ಪಂಥ ಕಟ್ಟುವುದು ಸರಿಯಾದ ಕ್ರಮವಲ್ಲ. ಭಿನ್ನಾಭಿಪ್ರಾಯಗಳನ್ನು ಪರಿಹರಿಸಲು ನಮ್ಮ ನೆರೆಯ ದೇಶಗಳೊಂದಿಗೆ ನಮ್ಮ ಕೈಜೋಡಿಸುತ್ತೇವೆ. ಜತೆಯಾಗಿ ಮಾತ್ರವೇ ನಾವು ಎಲ್ಲರಿಗೂ ಉತ್ತಮ ಭವಿಷ್ಯ ರೂಪಿಸಬಹುದು' ಎಂದು ಅವರು ಹೇಳಿದ್ದಾರೆ.
Click it and Unblock the Notifications
Sign in with Google