ಹತ್ತನೇ ಅಂತಸ್ತಿನ ಕಟ್ಟಡದಿಂದ ಎಸೆದು ಮಗುವನ್ನು ಬದುಕಿಸಿದ ಮಹಿಳೆ
ಲಂಡನ್, ಜೂನ್ 14: ಬುಧವಾರ ಪಶ್ಚಿಮ ಲಂಡನ್ ನ ಗ್ರೆನ್ ಫೆಲ್ ಟವರ್ ನಲ್ಲಿ ಭಾರೀ ಬೆಂಕಿ ಕಾಣಿಸಿಕೊಂಡ ಸುದ್ದಿ ನಿಮಗೆ ಗೊತ್ತೇ ಇರುತ್ತದೆ. ಈ ವೇಳೆ ಒಳಗೆ ಸಿಕ್ಕಿಕೊಂಡ ಮಗುವನ್ನು ಒಂಬತ್ತು ಅಥವಾ ಹತ್ತನೇ ಅಂತಸ್ತಿನ ಕಿಟಕಿಯಿಂದ ಹೊರಗೆ ಹಾಕಿದ್ದು, ಕೆಳಗೆ ಇದ್ದ ವ್ಯಕ್ತಿಯೊಬ್ಬರು ಆ ಮಗುವನ್ನು ಕೈಯಲ್ಲಿ ಹಿಡಿಯುವಲ್ಲಿ ಸಫಲರಾಗಿದ್ದಾರೆ.
ಪ್ರತ್ಯಕ್ಷದರ್ಶಿ ಸಮಿರಾ ಲಮ್ರಾನಿ ಈ ಬಗ್ಗೆ ಮಾತನಾಡಿದ್ದು, ತಮ್ಮ ಮಗುವನ್ನು ಕಾಪಾಡಿಕೊಳ್ಳುವ ಸಲುವಾಗಿ ಮಗುವನ್ನು ಕಿಟಕಿಯಿಂದ ಹೊರಗೆ ಹಾಕಿದ್ದು, ಒಂಬತ್ತು ಅಥವಾ ಹತ್ತನೆ ಅಂತಸ್ತಿನಿಂದ ಕೆಳಗೆ ಹಾಕಿದ್ದಾರೆ ಎಂದು ಹೇಳಿದ್ದಾರೆ.
ಜನರು ಕಿಟಕಿ ಕಡೆಗೆ ನೋಡುತ್ತಿದ್ದರು. ಆಗ ಅಲ್ಲಿಂದ ಮಹಿಳೆಯೊಬ್ಬರು ಗಾಬರಿಯಿಂದ ಕೂಗುತ್ತಿದ್ದರು. ಸ್ವಲ್ಪ ಮಟ್ಟಿಗೆ ತೆರೆದಿದ್ದ ಕಿಟಕಿಯಿಂದ ಕಾಣುತ್ತಿದ್ದ ಹಾಗೆ ಆ ಮಹಿಳೆ ತನ್ನ ಮಗುವನ್ನು ಅಲ್ಲಿಂದ ಹೊರಗೆ ಹಾಕುವುದರಲ್ಲಿದ್ದರು. ಯಾರಾದರೂ ತಮ್ಮ ಮಗುವನ್ನು ಹಿಡಿದುಕೊಳ್ಳಲಿ ಎಂಬಂತೆ ನೋಡುತ್ತಿದ್ದರು ಎಂದು ಲಮ್ರಾನಿ ಹೇಳಿದ್ದಾರೆ.
ಅಷ್ಟರಲ್ಲಿ ವ್ಯಕ್ತಿಯೊಬ್ಬರು ಮುಂದೆ ಬಂದು ಮಗುವನ್ನು ಹಿಡಿದುಕೊಳ್ಳಲು ಯಶಸ್ವಿಯಾದರು ಎಂದು ತಿಳಿಸಿದರು.