ಸತತ 2ನೇ ದಿನವೂ ಅಮೆರಿಕಕ್ಕಿಂತ ಭಾರತದಲ್ಲೇ ಹೆಚ್ಚು ಕೊವಿಡ್ ಕೇಸ್!

ದೆಹಲಿ, ಆಗಸ್ಟ್ 04: ಭಾರತದಲ್ಲಿ ಸೋಮವಾರ 50 ಸಾವಿರಕ್ಕಿಂತ ಹೆಚ್ಚು ಕೊವಿಡ್ ಪ್ರಕರಣಗಳು ದಾಖಲಾಗುವ ಸಾಧ್ಯತೆ ಹೆಚ್ಚಿದೆ. ಈಗಾಗಲೇ ರಾಜ್ಯವಾರು ಅಂಕಿ ಅಂಶಗಳು ಪ್ರಕಟಗೊಂಡಿದ್ದು, ಸೋಮವಾರದ ಒಟ್ಟಾರೆ ಸೋಂಕು 50 ಸಾವಿರ ಗಡಿ ದಾಟಿದೆ ಎಂಬ ಅಂದಾಜು ಸಿಕ್ಕಿದೆ.

ಈ ಮೂಲಕ ಸತತ ಎರಡನೇ ದಿನವೂ ಅಮೆರಿಕ ಮತ್ತು ಬ್ರೆಜಿಲ್‌ ದೇಶಗಳನ್ನು ಭಾರತ ಹಿಂದಿಕ್ಕಿದೆ. ಸೋಮವಾರವೂ ಅಮೆರಿಕ-ಬ್ರೆಜಿಲ್‌ ದೇಶವನ್ನು ಹೊಸ ಕೇಸ್ ಹಾಗೂ ಸಾವಿನ ಸಂಖ್ಯೆಯಲ್ಲಿ ಭಾರತ ಹಿಂದಿಕ್ಕಿದೆ.

ಆಗಸ್ಟ್ 3ರಂದು ಅಮೆರಿಕದಲ್ಲಿ 48,622 ಮಂದಿಗೆ ಕೊರೊನಾ ಸೋಂಕು ಕಾಣಿಸಿಕೊಂಡಿದೆ. ಬ್ರೆಜಿಲ್‌ನಲ್ಲಿ 17,988 ಜನರಿಗೆ ಕೊವಿಡ್ ತಗುಲಿದೆ. ಪ್ರಸ್ತುತ ಮೊದಲೆರಡು ಸ್ಥಾನದಲ್ಲಿದ್ದ ಈ ದೇಶಗಳನ್ನು ಭಾರತ ಹಿಂದಿಕ್ಕಿ ಮೊದಲ ಸ್ಥಾನಕ್ಕೆ ಏರಿದೆ.

ಸಾವಿನ ಸಂಖ್ಯೆಯಲ್ಲೂ ಅಮೆರಿಕ ಹಾಗೂ ಬ್ರೆಜಿಲ್‌ಗಿಂತ ಭಾರತದಲ್ಲೇ ಹೆಚ್ಚು. ಸದ್ಯದ ವರದಿ ಪ್ರಕಾರ, ಭಾರತದಲ್ಲಿ ಸೋಮವಾರ ಸುಮಾರು 800 ಮಂದಿ ಮೃತಪಟ್ಟಿದ್ದಾರೆ. ಅಮೆರಿಕದಲ್ಲಿ ಆಗಸ್ಟ್ 3ರ ಸಾವಿನ ಸಂಖ್ಯೆ 568, ಬ್ರೆಜಿಲ್‌ನಲ್ಲಿ 572 ಮಂದಿ ಪ್ರಾಣ ಕಳೆದುಕೊಂಡಿದ್ದಾರೆ.

ಇಂದಿನ ವರದಿ ಪ್ರಕಾರ ಅಮೆರಿಕದಲ್ಲಿ ಒಟ್ಟು ಸೋಂಕಿತರ ಸಂಖ್ಯೆ 4,862,174 ಮೃತಪಟ್ಟವರ ಸಂಖ್ಯೆ 158,929. ಬ್ರೆಜಿಲ್‌ನಲ್ಲಿ ಒಟ್ಟು ಕೊವಿಡ್ ಪ್ರಕರಣ ಸಂಖ್ಯೆ 2,751,665, ಸಾವಿನ ಸಂಖ್ಯೆ 94,702.

English summary

Second time, India reports the most no of daily Coronavirus cases in the world, ahead of USA and Brazil.