ನಾನು ಹಣ್ಣೆಲೆ ಹೌದು, ಆದ್ರೂ ನನ್ನೊಂದು ಮತವೇ ದೇಶದ ಭವಿಷ್ಯವಾಗಬಹುದು!

Updated: Thursday, April 18, 2019, 18:31 [IST]

ನವದೆಹಲಿ, ಏಪ್ರಿಲ್ 18: ವ್ಹೀಲ್ ಚೇರ್ ಮೇಲೆ ಕೂತ ಮಧ್ಯ ವಯಸ್ಸಿನ ವ್ಯಕ್ತಿಯೊಬ್ಬರು ತೋರು ಬೆರಳಿಗೆ ಅಂಟಿದ ಶಾಯಿಯನ್ನು ಹೆಮ್ಮೆಯಿಂದ ತೋರಿಸುವಾಗ, ಅಂಬುಲೆನ್ಸ್ ನಿಂದ ಬಂದ ರೋಗಿಯೊಬ್ಬರ ಮುಖದಲ್ಲಿ ಮತ ಚಲಾಯಿಸಿದ ಸಾರ್ಥಕ ಭಾವವೊಂದು ಇಣುಕುವಾಗ, ಹಣ್ಣು ಹಣ್ಣು ಅಜ್ಜಿಯೊಬ್ಬರು ತಾವು ಸಂವಿಧಾನ ನೀಡಿದ ಅತ್ಯಮೂಲ್ಯ ಹಕ್ಕನ್ನು ಚಲಾಯಿಸಿದೆ ಎಂದು ಸಂಭ್ರಮಿಸುವಾಗ... ಈ ಪ್ರಜಾಪ್ರಭುತ್ವ ಹಬ್ಬ ಸಾರ್ಥಕ ಅನ್ನಿಸೋದು ಸತ್ಯ!

ಲೋಕಸಭಾ ಚುನಾವಣೆ 2019 : ವಿಶೇಷ ಪುಟ | ಗ್ಯಾಲರಿ

ದೇಶ ಇಂದು ಎರಡನೇ ಹಂತದ ಮತದಾನಕ್ಕೆ ಸಾಕ್ಷಿಯಾಗಿರುವಾಗ ಇಂಥ ನೂರಾರು ದೃಶ್ಯಗಳು ಕಣ್ಣಿಗೆ ರಾಚಿವೆ. ಮತದಾನದಂಥ ಅತ್ಯಮೂಲ್ಯ ಹಕ್ಕನ್ನು ಚಲಾಯಿಸುವ ಮಹತ್ವವನ್ನು ಅವು ಸಾರಿ ಹೇಳಿವೆ.

ಏಪ್ರಿಲ್ 11 ರಿಂದ ಆರಂಭವಾಗಿರುವ ಲೋಕಸಭೆ ಚುನಾವಣೆ ಮೇ 19 ರ ವರೆಗೆ ನಡೆಯಲಿದ್ದು, ಮೇ 23 ರಂದು ಫಲಿತಾಂಶ ಹೊರಬೀಳಲಿದೆ. ಒಟ್ಟು 543 ಸದಸ್ಯ ಬಲದ 17ನೇ ಲೋಕಸಭೆಯ ಹಣೆ ಬರಹ ಅಂದು ನಿರ್ಧಾರವಾಗಲಿದೆ.

ನಿಮ್ಮ ರಾಜಕೀಯ ಜ್ಞಾನವನ್ನು ಒರೆಗೆ ಹಚ್ಚುವ ರಸಪ್ರಶ್ನೆ

ಇಂದು ದೇಶದಾದ್ಯಂತ ನಡೆದ ಮತದಾನದ ಹಬ್ಬದಲ್ಲಿ ಲಕ್ಷಾಂತರ ಜನರು ಮತದಾನ ಮಾಡಿದರು. ಆ ಒಂದೊಂದು ಚಿತ್ರಕ್ಕೂ ಬೇರೆಯದೇ ತೂಕವಿದೆ. ಅವುಗಳಲ್ಲಿ ಮನಸ್ಸನ್ನು ಸೆಳೆದ ಕೆಲವು ನಿಮಗಾಗಿ ಇಲ್ಲಿವೆ.

ನನ್ನೊಂದು ಮತದಲ್ಲೂ ಇದೆ ದೇಶದ ಭವಿಷ್ಯ

ಅಲಿಘರ್ ನಲ್ಲಿ ಹಣ್ಣು ಹಣ್ಣು ಅಜ್ಜಿಯೊಬ್ಬರು ಮತ ಚಲಾಯಿಸಿ, ಮತದಾನದ ಮಹತ್ವದ ಅರಿವು ಮೂಡಿಸಿದರು. ತಾನು ಹಣ್ಣೆಲೆ ಅನ್ನೋದು ಸತ್ಯ. ಆದರೆ ನನ್ನೊಂದು ಮತದಲ್ಲೇ ದೇಶದ ಭವಿಷ್ಯವಿರಬಹುದು ಎಂಬಂತೆ ಅಜ್ಜಿ ಫೋಟೋಕ್ಕೆ ಪೋಸು ನೀಡಿದ್ದು ಹೀಗೆ!