India And European Union: ಭಾರತ ಮತ್ತು ಯುರೋಪ್ ಒಕ್ಕೂಟದ ವ್ಯಾಪಾರ ಒಪ್ಪಂದಕ್ಕೆ ಡೊನಾಲ್ಡ್ ಟ್ರಂಪ್ ಗರಂ?

Updated: Tuesday, January 27, 2026, 14:56 [IST]

ಭಾರತ ಮತ್ತು ಯುರೋಪ್ ಒಕ್ಕೂಟದ ನಡುವಿನ ಐತಿಹಾಸಿಕ ವ್ಯಾಪಾರ ಒಪ್ಪಂದ ಮಾತುಕತೆ ದೊಡ್ಡ ಗೆಲುವು ಕಂಡಿದೆ. ಜಾಗತಿಕ ಆರ್ಥಿಕ ಶಕ್ತಿಯಾಗಿ ಬೆಳೆಯುತ್ತಿರುವ ಭಾರತಕ್ಕೆ ಬೆಂಬಲ ನೀಡಲು ಇದೀಗ ಯುರೋಪ್ ಒಕ್ಕೂಟ ಕೂಡ ಮುಂದಾಗಿದೆ. ಅಮೆರಿಕ ಮತ್ತು ಯುರೋಪ್ ನಡುವಿನ ಸಂಬಂಧ ಕೆಲ ತಿಂಗಳಿಂದ ಮಸುಕಾಗುತ್ತಿರುವ ಸಮಯದಲ್ಲೇ, ಭಾರಿ ದೊಡ್ಡ ಒಪ್ಪಂದಕ್ಕೆ ಭಾರತದ ಜೊತೆ ಇಂದು ಯುರೋಪ್ ಒಕ್ಕೂಟದ ನಾಯಕರು ಒಪ್ಪಿಗೆ ಸೂಚಿಸಿದ್ದಾರೆ. ಆದರೆ ಇದೇ ಸಮಯದಲ್ಲಿ ಅಮೆರಿಕ, ಈ ಒಪ್ಪಂದ ನೋಡಿ ಗರಂ ಆಗಿದೆ. ಅದರಲ್ಲೂ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಈ ಒಪ್ಪಂದ ಒಪ್ಪಿಕೊಳ್ಳುತ್ತಾರಾ? ಎಂಬ ಪ್ರಶ್ನೆ ಮೂಡಿದೆ.

ಯುರೋಪ್ ಒಕ್ಕೂಟದ ದೇಶಗಳು ರಫ್ತು ಮಾಡುವ ವಸ್ತುಗಳ ಮೇಲೆ ಅಮೆರಿಕ ಹೆಚ್ಚಿನ ತೆರಿಗೆ ಹೇರಿಕೆ ಮಾಡುತ್ತಾ ಇರುವ ಕಾರಣಕ್ಕೆ ಭಾರಿ ದೊಡ್ಡ ಅಲ್ಲೋಲ ಕಲ್ಲೋಲ ಸೃಷ್ಟಿಯಾಗಿತ್ತು. ಅದರಲ್ಲೂ ಈ ಪೈಕಿ ಯುರೋಪ್‌ನ ಬಲಶಾಲಿ ದೇಶಗಳಿಗೆ ಕೂಡ ಸಮಸ್ಯೆ ಎದುರಾಗಿ, ಆರ್ಥಿಕ ಸಂಕಷ್ಟದಲ್ಲಿ ಸಿಲುಕಿ ಒದ್ದಾಡುವ ವಾತಾವರಣ ನಿರ್ಮಾಣ ಆಗಿದೆ. ದಿನದಿಂದ ದಿನಕ್ಕೆ ಯುರೋಪ್ ಮತ್ತು ಅಮೆರಿಕ ತೆರಿಗೆ ತಿಕ್ಕಾಟ ಜೋರಾಗುತ್ತಿದೆ. ಅದು ಭವಿಷ್ಯದಲ್ಲಿ ಬೇರೆಯದ್ದೇ ತಿರುವು ಪಡೆಯಬಹುದು ಎಂಬ ಆತಂಕ ಕೂಡ ಯುರೋಪ್ ಒಕ್ಕೂಟದ ನಾಯಕರಿಗೆ ಕಾಡುತ್ತಿದೆ. ಇಷ್ಟೆಲ್ಲದರ ನಡುವೆಯೇ ಭಾರತದ ಜೊತೆಗೆ ವ್ಯಾಪಾರ ಸಂಬಂಧ ಭದ್ರ ಮಾಡಿಕೊಂಡಿದ್ದಾರೆ ಯುರೋಪಿಯನ್ ಯುನಿಯನ್ ಲೀಡರ್ಸ್.

ಭಾರತ ಮತ್ತು ಯುರೋಪ್ ಒಪ್ಪಂದಕ್ಕೆ ಟ್ರಂಪ್ ಗರಂ?

ಹೌದು, ಡೊನಾಲ್ಡ್ ಟ್ರಂಪ್ ಅವರಿಗೆ ಭಾರತ ಮತ್ತು ಯುರೋಪ್ ಒಕ್ಕೂಟದ ನಡುವಿನ ಐತಿಹಾಸಿಕ ವ್ಯಾಪಾರ ಒಪ್ಪಂದ ಬಿಲ್‌ಕುಲ್ ಇಷ್ಟ ಇಲ್ಲ ಎನ್ನಲಾಗಿದೆ. ಅಲ್ಲದೇ ಅಮೆರಿಕ ಈ ಒಪ್ಪಂದಕ್ಕೆ ಬೇಸರ ವ್ಯಕ್ತಪಡಿಸಿದೆ, ತಮ್ಮ ಜೊತೆಯಲ್ಲಿ ಇಷ್ಟುದಿನ ವ್ಯಾಪಾರ ಮಾಡುತ್ತಿದ್ದ ಯುರೋಪ್ ದಿಢೀರ್ ಭಾರತದ ಜೊತೆಗೆ ಕೈಜೋಡಿಸಿರುವುದು ಸಹಜವಾಗಿ ಟ್ರಂಪ್ ಅವರಿಗೆ ತಾಳ್ಮೆ ಕೆಡಿಸಿದೆ. ಆದರೆ ಪದೇ ಪದೇ ತಮ್ಮ ತೆರಿಗೆ ತಿಕ್ಕಾಟದ ಮೂಲಕ ಯುರೋಪ್ ದೇಶಗಳ ನಿದ್ದೆಗೆಡಿಸಿದ್ದ ಟ್ರಂಪ್ ಅವರಿಗೆ ಈಗ ನಷ್ಟದ ಚಿಂತೆ ಎದುರಾದಂತೆ ಕಾಣುತ್ತಿದೆ ಎನ್ನುತ್ತಿದ್ದಾರೆ ತಜ್ಞರು. ಹೀಗಿದ್ದಾಗ ಭಾರತದ ವಿರುದ್ಧ ಕೂಡ ಡೊನಾಲ್ಡ್ ಟ್ರಂಪ್ ಅವರು ಗರಂ ಆಗುವ ಸಾಧ್ಯತೆ ದಟ್ಟವಾಗಿದೆ.

20 ವರ್ಷಗಳಿಂದ ನಡೆಯುತ್ತಿದ್ದ ಮಾತುಕತೆ

ಭಾರತ ಮತ್ತು ಯುರೋಪ್ ಒಕ್ಕೂಟದ ನಡುವಿನ ವ್ಯಾಪಾರ ಒಪ್ಪಂದ ಚರ್ಚೆಯು ಇಂದು ಅಥವಾ ನಿನ್ನೆಯಿಂದ ಶುರುವಾಗಿಲ್ಲ. ಈ ಚರ್ಚೆ ಶುರುವಾಗಿ ಬರೋಬ್ಬರಿ 20 ವರ್ಷ ಕಳೆದಿದೆ, ಆದರೆ ಇದೀಗ ಜಾಗತಿಕ ಮಟ್ಟದಲ್ಲಿ ಯುರೋಪ್ ಒಕ್ಕೂಟ ಭಾರಿ ದೊಡ್ಡ ಸವಾಲು ಎದುರಿಸುತ್ತಿದೆ. ಇದೇ ಕಾರಣಕ್ಕೆ ಈಗ ಓಡಿ ಬಂದು ಭಾರತದ ಜೊತೆಗೆ ಮಹತ್ವದ ಒಪ್ಪಂದ ಮಾಡಿಕೊಂಡಿದೆ. ಭಾರತ ಮತ್ತು ಯುರೋಪ್ ಒಕ್ಕೂಟದ ಶೃಂಗಸಭೆಯಲ್ಲಿ ಈ ಬಗ್ಗೆ ಮಹತ್ವದ ತೀರ್ಮಾನ ಕೈಗೊಳ್ಳಲಾಗಿದೆ. ಆದರೆ ಅಮೆರಿಕ ಮಾತ್ರ ಈ ಒಪ್ಪಂದ ಒಪ್ಪಿಕೊಳ್ಳದೆ ಹೊಸ ಕಿರಿಕ್ ಶುರು ಮಾಡಿದೆ.

ಈ ಒಪ್ಪಂದ ಇಂದು ಸಂಪೂರ್ಣವಾಗಿದ್ದರೂ ಅದು ಜಾರಿಗೆ ಬರಲು ಇನ್ನೂ ಕೆಲವು ತಿಂಗಳು ಅಗತ್ಯವಿದೆ. ಭಾರತದಲ್ಲಿ ಕೇಂದ್ರ ಸಚಿವ ಸಂಪುಟ ಇದನ್ನು ಅಂಗೀಕರಿಸಬೇಕಿದೆ ಹಾಗೂ ಯುರೋಪ್ ಒಕ್ಕೂಟದ ಪಾರ್ಲಿಮೆಂಟ್ ಕೂಡ ಇದನ್ನು ಅಂಗೀಕರಿಸಬೇಕು. ಹೀಗಿದ್ದಾಗಲೇ ಅಮೆರಿಕ ಮಾತ್ರ ಭಾರತ ಹಾಗೂ ಯುರೋಪ್ ಒಕ್ಕೂಟದ ಒಪ್ಪಂದ ಕಂಡು ಬೇಸರ ಹೊರ ಹಾಕಿರುವುದು ಚರ್ಚೆಗೆ ಗ್ರಾಸವಾಗಿದೆ. ಈ ರೀತಿ ಈಗಾಗಲೇ ಅಮೆರಿಕ ಬೇರೆ ಬೇರೆ ದೇಶಗಳ ವ್ಯಾಪಾರ ಒಪ್ಪಂದಕ್ಕೂ ಅಪಸ್ವರ ಎತ್ತಿರುವ ಹಲವು ಉದಾಹರಣೆ ಇದೆ. ಈ ರೀತಿ ಈಗ ಭಾರತದ ಬಗ್ಗೆ ಕೂಡ ಡೊನಾಲ್ಡ್ ಟ್ರಂಪ್ ಆಡಳಿತ ಕಿರಿಕ್ ತೆಗೆದು ಚರ್ಚೆಗೆ ವೇದಿಕೆ ಒದಗಿಸಿದೆ.