GST: ಜಿಎಸ್ಟಿ ಕೌನ್ಸಿಲ್ ತೆರಿಗೆ ಕಡಿತಕ್ಕೆ ಒಪ್ಪಿಗೆ: ಸಿನಿಮಾ ಹಾಲ್ಗಳಲ್ಲಿ ಆಹಾರ ಅಗ್ಗ!
ನವದೆಹಲಿ ಜುಲೈ 12: ಸಿನಿಮಾ ಹಾಲ್ಗಳಲ್ಲಿ ಕುಳಿತು ಪಾಪ್ಕಾರ್ನ್ ತಿನ್ನಲು ಬಯಸುವವರಿಗೆ ಒಂದು ಸಿಹಿ ಸುದ್ದಿ. ಚಲನಚಿತ್ರ ಮಂದಿರಗಳಲ್ಲಿ ನೀಡುವ ಆಹಾರದ ಮೇಲಿನ ತೆರಿಗೆಯನ್ನು ಕಡಿತಗೊಳಿಸಲು ಸರಕು ಮತ್ತು ಸೇವಾ ತೆರಿಗೆ ಕೌನ್ಸಿಲ್ ಒಪ್ಪಿಗೆ ನೀಡಿದೆ. ಇದರಿಂದಾಗಿ ಸಿನಿಮಾ ಮಂದಿರಗಳಲ್ಲಿ ದುಬಾರಿಯಾಗಿದ್ದ ಆಹಾರದ ಬೆಲೆ ಕಡಿಮೆಯಾಗಲಿದೆ.
ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ಟಿ) ಕೌನ್ಸಿಲ್ ಮಂಗಳವಾರ ತನ್ನ 50 ನೇ ಸಭೆಯಲ್ಲಿ ಚಲನಚಿತ್ರ ಮಂದಿರಗಳಲ್ಲಿ ನೀಡುವ ಆಹಾರದ ಮೇಲಿನ ತೆರಿಗೆಯನ್ನು ಕಡಿತಗೊಳಿಸುವುದು ಮತ್ತು ಕೆಲವು ಜೀವ ಉಳಿಸುವ ಔಷಧಿಗಳ ಆಮದಿನ ಮೇಲಿನ ತೆರಿಗೆಯನ್ನು ವಿನಾಯಿತಿ ಮಾಡುವುದು ಸೇರಿದಂತೆ ಹಲವಾರು ಪ್ರಸ್ತಾಪಗಳಿಗೆ ಒಪ್ಪಿಗೆ ನೀಡಿದೆ. ಕೇಂದ್ರ ಹಣಕಾಸು ಸಚಿವರ ಅಧ್ಯಕ್ಷತೆಯ ರಾಜ್ಯ ಹಣಕಾಸು ಮಂತ್ರಿಗಳನ್ನು ಒಳಗೊಂಡಿರುವ ಕೌನ್ಸಿಲ್, ಚಿತ್ರಮಂದಿರಗಳಲ್ಲಿ ಬಡಿಸುವ ಆಹಾರದ ಮೇಲಿನ ತೆರಿಗೆಯನ್ನು ಶೇಕಡಾ 18 ರಿಂದ ಶೇಕಡಾ 5ಕ್ಕೆ ಇಳಿಸಲು ನಿರ್ಧರಿಸಿದೆ.
ಈ ಬಗ್ಗೆ ಮಾತನಾಡಿದ ಕಂದಾಯ ಕಾರ್ಯದರ್ಶಿ ಸಂಜಯ್ ಮಲ್ಹೋತ್ರಾ, "ಸಿನಿಮಾ ಹಾಲ್ಗಳಲ್ಲಿ ಸೇವಿಸುವ ಆಹಾರ ಮತ್ತು ಪಾನೀಯಗಳಿಗೆ ಶೇಕಡಾ 5 ರಷ್ಟು ಜಿಎಸ್ಟಿ ಇರುತ್ತದೆ, ಶೇಕಡಾ 18 ಅಲ್ಲ ಎಂದು (ಜಿಎಸ್ಟಿ) ಕೌನ್ಸಿಲ್ ಇಂದು ಸ್ಪಷ್ಟಪಡಿಸಿದೆ" ಎಂದು ಹೇಳಿದ್ದಾರೆ.
ಹೊಸದಿಲ್ಲಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಪಶ್ಚಿಮ ಬಂಗಾಳದ ಹಣಕಾಸು ಸಚಿವೆ ಚಂದ್ರಿಮಾ ಭಟ್ಟಾಚಾರ್ಯ, ಕ್ಯಾನ್ಸರ್ ಔಷಧ ದಿನುಟುಕ್ಸಿಮಾಬ್ ಮತ್ತು ಅಪರೂಪದ ಕಾಯಿಲೆಗಳ ಚಿಕಿತ್ಸೆಯಲ್ಲಿ ಬಳಸುವ ವಿಶೇಷ ವೈದ್ಯಕೀಯ ಉದ್ದೇಶಗಳಿಗಾಗಿ ಆಹಾರ (ಎಫ್ಎಸ್ಎಂಪಿ) ಆಮದು ಮೇಲಿನ ಜಿಎಸ್ಟಿ ವಿನಾಯಿತಿಗೆ ಕೌನ್ಸಿಲ್ ಅನುಮೋದನೆ ನೀಡಿದೆ ಎಂದಿದ್ದಾರೆ.
ಇನ್ನೂ ಆನ್ಲೈನ್ ಗೇಮಿಂಗ್, ಕ್ಯಾಸಿನೋಗಳು ಮತ್ತು ಕುದುರೆ ರೇಸಿಂಗ್ಗಳ ಮೇಲೆ ಶೇಕಡಾ 28 ರಷ್ಟು ತೆರಿಗೆ ವಿಧಿಸಲು ಕೌನ್ಸಿಲ್ ಒಪ್ಪಿಗೆ ನೀಡಿದೆ ಮತ್ತು ತೆರಿಗೆಯನ್ನು ಪೂರ್ಣ ಮುಖಬೆಲೆಯ ಮೇಲೆ ವಿಧಿಸಲಾಗುವುದು. ಆನ್ಲೈನ್ ಗೇಮಿಂಗ್, ಕ್ಯಾಸಿನೋಗಳು ಮತ್ತು ಕುದುರೆ ರೇಸಿಂಗ್ಗಳಿಗೆ ಪ್ರವೇಶ ಹಂತದಲ್ಲಿ ಪಂತಗಳ ಪೂರ್ಣ ಮುಖಬೆಲೆಯ ಮೇಲೆ ಶೇಕಡಾ 28 ರಷ್ಟು ತೆರಿಗೆ ವಿಧಿಸಲು ಜಿಎಸ್ಟಿ ಕೌನ್ಸಿಲ್ ನಿರ್ಧರಿಸಿದೆ ಎಂದು ಅವರು ಸುದ್ದಿಗಾರರಿಗೆ ತಿಳಿಸಿದರು.
ಆಟಗಳಿಗೆ ಕೌಶಲ್ಯದ ಅಗತ್ಯವಿದೆಯೇ ಅಥವಾ ಅವಕಾಶವನ್ನು ಆಧರಿಸಿದೆಯೇ ಎಂಬುದರ ಆಧಾರದ ಮೇಲೆ ಯಾವುದೇ ವ್ಯತ್ಯಾಸವನ್ನು ಮಾಡದೆ ಆನ್ಲೈನ್ ಗೇಮಿಂಗ್ ಕಂಪನಿಗಳ ಮೇಲೆ ತೆರಿಗೆ ವಿಧಿಸಲಾಗುವುದು ಎಂದು ಮಹಾರಾಷ್ಟ್ರ ರಾಜ್ಯದ ಸಚಿವ ಸುಧೀರ್ ಮುಂಗಂತಿವಾರ್ ಹೇಳಿದ್ದಾರೆ.
"ಇದರರ್ಥ ಜಿಎಸ್ಟಿಯು ಒಟ್ಟು ಆದಾಯ/ಒಟ್ಟು ಬಹುಮಾನ ಪೂಲ್ಗೆ ಅನ್ವಯಿಸುತ್ತದೆ" ಎಂದು ಆಲ್ ಇಂಡಿಯಾ ಗೇಮಿಂಗ್ ಫೆಡರೇಶನ್ನ ಸಿಇಒ ರೋಲ್ಯಾಂಡ್ ಲ್ಯಾಂಡರ್ಸ್ ಹೇಳಿದ್ದಾರೆಂದು ರಾಯಿಟರ್ಸ್ ವರದಿ ಮಾಡಿದೆ.
ಪಾಪ್ಕಾರ್ನ್ ಬೆಲೆ ಬಗ್ಗೆ ಇತ್ತೀಚೆಗೆ ಚರ್ಚೆ
ಇತ್ತೀಚೆಗೆ ಸಿನಿಮಾ ಮಂದಿರಗಳಲ್ಲಿ ಪಾಪ್ಕಾರ್ನ್ ಬೆಲೆ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿತ್ತು. ಒಂದು ಪಾಪ್ಕಾರ್ನ್ ಬೆಲೆ ನಾಲ್ಕರಿಂದ ಐದು ನೂರು ರೂಪಾಯಿವರೆಗೆ ಬೆಲೆ ನಿಗಧಿಯಾಗಿರುತ್ತದೆ. ಈ ಬೆಲೆಯಲ್ಲಿ ಸಾಮಾನ್ಯ ಸಿನಿಮಾ ಮಂದಿರಗಳಲ್ಲಿ ಕನಿಷ್ಟ ಅಂದರೂ ಮೂರರಿಂದ ನಾಲ್ಕು ಜನ ಸಿನಿಮಾ ನೋಡಬಹುದು. ಸಿನಿಮಾ ಟಿಕೆಟ್ಗಿಂತಲೂ ಥಿಯೇಟರ್ಗಳಲ್ಲಿ ಸಿಗುವ ಆಹಾರ ಬೆಲೆ ದುಬಾರಿಯಾಗಿದೆ. ಇದು ಜನಾಕ್ರೋಶಕ್ಕೆ ಗುರಿಯಾಗಿತ್ತು.
Click it and Unblock the Notifications
Sign in with Google