CBSE ಪರೀಕ್ಷೆಗೆ ಕ್ಷಣಗಣನೆ ಶುರು: ಕೊನೆಯ 7 ದಿನಗಳಲ್ಲಿ ಈ 6 'ಸ್ಮಾರ್ಟ್ ಟಿಪ್ಸ್' ಪಾಲಿಸಿ, ಟಾಪರ್ ಆಗಿ

Updated: Tuesday, February 10, 2026, 16:23 [IST]

ಬೆಂಗಳೂರು: ಕೇಂದ್ರ ಪ್ರೌಢಶಿಕ್ಷಣ ಮಂಡಳಿ (CBSE) ನಡೆಸುವ 10 ಮತ್ತು 12ನೇ ತರಗತಿಯ ಬೋರ್ಡ್ ಪರೀಕ್ಷೆಗಳು ಇದೇ ಫೆಬ್ರವರಿ 17 ರಿಂದ ಆರಂಭವಾಗಲಿವೆ. ಪರೀಕ್ಷೆಗೆ ಇನ್ನು ಬೆರಳೆಣಿಕೆಯಷ್ಟು ದಿನಗಳು ಮಾತ್ರ ಬಾಕಿ ಉಳಿದಿವೆ. ಈ ಸಮಯದಲ್ಲಿ ವಿದ್ಯಾರ್ಥಿಗಳು ಆತಂಕಕ್ಕೆ ಒಳಗಾಗುವುದು ಸಹಜ. ಆದರೆ, ಈ ಕೊನೆಯ ಕ್ಷಣದಲ್ಲಿ ನೀವು ಎಷ್ಟು ಓದುತ್ತೀರಿ ಎನ್ನುವುದಕ್ಕಿಂತ, ಹೇಗೆ ಓದುತ್ತೀರಿ ಎಂಬುದು ಮುಖ್ಯವಾಗುತ್ತದೆ. ಇದನ್ನೇ ನಾವು 'ಸ್ಮಾರ್ಟ್ ಸ್ಟಡಿ' ಎನ್ನುತ್ತೇವೆ. ಪರೀಕ್ಷಾ ಸಮಯದಲ್ಲಿ ಒತ್ತಡವನ್ನು ಕಡಿಮೆ ಮಾಡಿಕೊಂಡು, ಆತ್ಮವಿಶ್ವಾಸದಿಂದ ಪರೀಕ್ಷೆ ಎದುರಿಸಲು ಮತ್ತು ಉತ್ತಮ ಅಂಕಗಳನ್ನು ಗಳಿಸಲು ಇಲ್ಲಿ ಆರು ಪರಿಣಾಮಕಾರಿ ವಿಧಾನಗಳಿವೆ. ಅವುಗಳನ್ನು ಪಾಲಿಸಿದರೆ ಯಶಸ್ಸು ನಿಮ್ಮದಾಗಲಿದೆ.

1.ಪರಿಪೂರ್ಣವಾದ ಅಧ್ಯಯನ ವೇಳಾಪಟ್ಟಿಯನ್ನು ರಚಿಸಿ

ಮೊದಲನೆಯದಾಗಿ, ಉಳಿದಿರುವ 7 ದಿನಗಳನ್ನು ಸಮರ್ಥವಾಗಿ ಬಳಸಿಕೊಳ್ಳಲು ಒಂದು ಖಚಿತವಾದ ಯೋಜನೆಯನ್ನು ರೂಪಿಸಿಕೊಳ್ಳಿ. ನಿಮ್ಮ ಕೈಯಲ್ಲಿರುವ ದಿನಗಳನ್ನು ವಿಷಯವಾರು ವಿಂಗಡಿಸಿ. ನಿಮಗೆ ಕಷ್ಟವೆನಿಸುವ ವಿಷಯಗಳಿಗೆ ಹೆಚ್ಚಿನ ಸಮಯವನ್ನು ಮೀಸಲಿಡಿ ಮತ್ತು ಸುಲಭವಾಗಿರುವ ವಿಷಯಗಳಿಗೆ ಕಡಿಮೆ ಸಮಯ ಸಾಕು. ಒಂದು ಸಮಯದಲ್ಲಿ ಒಂದೇ ವಿಷಯದ ಮೇಲೆ ಸಂಪೂರ್ಣ ಗಮನಹರಿಸಿ. ಪದೇ ಪದೇ ವಿಷಯಗಳನ್ನು ಬದಲಾಯಿಸುವುದು ಅಥವಾ ಎಲ್ಲವನ್ನೂ ಒಟ್ಟಿಗೆ ಓದಲು ಪ್ರಯತ್ನಿಸುವುದು ಗೊಂದಲಕ್ಕೆ ಕಾರಣವಾಗಬಹುದು. ಶಿಸ್ತಿನ ವೇಳಾಪಟ್ಟಿಯು ನಿಮ್ಮ ಗುರಿಯನ್ನು ತಲುಪಲು ದಾರಿದೀಪವಾಗುತ್ತದೆ.

2.ಪ್ರಮುಖ ಅಧ್ಯಾಯಗಳ ಮೇಲೆ ಗಮನಹರಿಸಿ

ಎರಡನೇ ಹಂತದಲ್ಲಿ, ನೀವು ಇಡೀ ಪುಸ್ತಕವನ್ನು ಮತ್ತೆ ಓದುವ ಬದಲು ಪ್ರಮುಖ ಅಧ್ಯಾಯಗಳಿಗೆ ಆಧ್ಯತೆ ನೀಡಬೇಕು. ಹಿಂದಿನ ವರ್ಷಗಳ ಪ್ರಶ್ನೆ ಪತ್ರಿಕೆಗಳನ್ನು ಒಮ್ಮೆ ಪರಿಶೀಲಿಸಿ. ಯಾವ ಅಧ್ಯಾಯಗಳಿಂದ ಅತಿ ಹೆಚ್ಚು ಪ್ರಶ್ನೆಗಳನ್ನು ಕೇಳಲಾಗಿದೆ ಎಂಬುದನ್ನು ಗುರುತಿಸಿ . ಆ ವಿಷಯಗಳನ್ನು ಮೊದಲು ಪುನರಾವರ್ತನೆ (Revise) ಮಾಡಿ. ಈಗಾಗಲೇ ನೀವು ಕಲಿತಿರುವ ವಿಷಯಗಳನ್ನು ಗಟ್ಟಿಗೊಳಿಸಿಕೊಳ್ಳುವುದೇ ಈ ಸಮಯದ ಜಾಣತನ. ಹೊಸದಾಗಿ ಏನನ್ನಾದರೂ ಕಲಿಯಲು ಹೋಗಿ ಗೊಂದಲ ಮಾಡಿಕೊಳ್ಳಬೇಡಿ.

3. ಉತ್ತರವನ್ನು ಬರೆಯುವುದು ಅಭ್ಯಾಸ ಮಾಡಿ

ಪರೀಕ್ಷೆಯಲ್ಲಿ ನೀವು ಎಷ್ಟು ಓದಿದ್ದೀರಿ ಎನ್ನುವುದಕ್ಕಿಂತ, ಅದನ್ನು ಹೇಗೆ ಬರೆಯುತ್ತೀರಿ ಎಂಬುದು ಅಂಕಗಳನ್ನು ನಿರ್ಧರಿಸುತ್ತದೆ. ಆದ್ದರಿಂದ ಮೂರನೇ ಹಂತದಲ್ಲಿ ಬರವಣಿಗೆಯ ಅಭ್ಯಾಸ ಮಾಡುವುದು ಬಹಳ ಮುಖ್ಯ. ದೀರ್ಘ ಉತ್ತರಗಳು, ಸಂಖ್ಯಾಶಾಸ್ತ್ರದ ಸಮಸ್ಯೆಗಳು ಮತ್ತು ರೇಖಾಚಿತ್ರಗಳನ್ನು (Diagrams) ಬರೆದು ಅಭ್ಯಾಸ ಮಾಡಿ. ಪ್ರತಿದಿನ ಕನಿಷ್ಠ ಒಂದು ಮಾದರಿ ಪ್ರಶ್ನೆ ಪತ್ರಿಕೆ ಅಥವಾ ಹಳೆಯ ಪ್ರಶ್ನೆ ಪತ್ರಿಕೆಯನ್ನು ನಿಗದಿತ ಸಮಯದಲ್ಲಿ ಬರೆದು ನೋಡಿ. ಇದರಿಂದ ನಿಮಗೆ ಸಮಯದ ನಿರ್ವಹಣೆ ತಿಳಿಯುತ್ತದೆ ಮತ್ತು ನಿಮ್ಮ ಬರವಣಿಗೆಯ ವೇಗವೂ ಹೆಚ್ಚುತ್ತದೆ.

4.ಸಂಕ್ಷಿಪ್ತ ಟಿಪ್ಪಣಿಗಳನ್ನು ತಯಾರಿಸಿಕೊಳ್ಳಿ

ದೀರ್ಘವಾದ ಪ್ಯಾರಾಗ್ರಾಫ್‌ಗಳನ್ನು ಓದುವ ಬದಲು, ಪ್ರಮುಖ ಅಂಶಗಳನ್ನು ಚಿಕ್ಕದಾಗಿ ಬರೆದಿಟ್ಟುಕೊಳ್ಳಿ. ವ್ಯಾಖ್ಯಾನಗಳು (Definitions), ಇಸವಿಗಳು, ಫಾರ್ಮುಲಾ ಅಥವಾ ಸೂತ್ರಗಳು ಮತ್ತು ಕೀವರ್ಡ್‌ಗಳನ್ನು ಒಂದೆರಡು ಪುಟಗಳಲ್ಲಿ ಬರೆದಿಡಿ. ಪ್ರತಿದಿನ ರಾತ್ರಿ ಮಲಗುವ ಮುನ್ನ ಈ ಸಂಕ್ಷಿಪ್ತ ಟಿಪ್ಪಣಿಗಳನ್ನು ಒಮ್ಮೆ ಕಣ್ಣಾಡಿಸಿ. ಈ ಅಭ್ಯಾಸವು ನಿಮ್ಮ ನೆನಪಿನ ಶಕ್ತಿಯನ್ನು ಹೆಚ್ಚಿಸುತ್ತದೆ. ಪರೀಕ್ಷೆಯ ಹಿಂದಿನ ದಿನದ ಪುನರಾವರ್ತನೆಗೆ ಇದು ಸಂಜೀವಿನಿಯಂತೆ ಕೆಲಸ ಮಾಡುತ್ತದೆ.

5.ವಿರಾಮದೊಂದಿಗೆ ಓದಿ, ಆರೋಗ್ಯ ಕಾಪಾಡಿಕೊಳ್ಳಿ

ಒಂದೇ ಸಮನೆ ಗಂಟೆಗಟ್ಟಲೆ ಕುಳಿತು ಓದುವುದು ಮೆದುಳಿಗೆ ಆಯಾಸವನ್ನುಂಟುಮಾಡುತ್ತದೆ. ಆದ್ದರಿಂದ ಐದನೇ ಹಂತವಾಗಿ, ನಿಮ್ಮ ಅಧ್ಯಯನ ಅವಧಿಯನ್ನು 45 ರಿಂದ 50 ನಿಮಿಷಗಳಿಗೆ ಸೀಮಿತಗೊಳಿಸಿ. ನಂತರ ಕಡ್ಡಾಯವಾಗಿ 10 ನಿಮಿಷಗಳ ವಿರಾಮ ತೆಗೆದುಕೊಳ್ಳಿ. ಈ ಸಮಯದಲ್ಲಿ ಮೊಬೈಲ್ ಅಥವಾ ಸೋಶಿಯಲ್ ಮೀಡಿಯಾ ನೋಡುವ ಬದಲು, ಸ್ವಲ್ಪ ನಡೆಯಿರಿ, ನೀರು ಕುಡಿಯಿರಿ ಅಥವಾ ಕಣ್ಣು ಮುಚ್ಚಿ ಧ್ಯಾನ ಮಾಡಿ. ಇದು ನಿಮ್ಮ ಏಕಾಗ್ರತೆಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ. ಪರೀಕ್ಷಾ ಸಮಯದಲ್ಲಿ ಫೋನ್ ಬಳಕೆಯನ್ನು ಆದಷ್ಟು ಕಡಿಮೆ ಮಾಡಿ.

6. ನಿದ್ರೆ ಮತ್ತು ಆತ್ಮವಿಶ್ವಾಸ ಅತ್ಯಗತ್ಯ

ಕೊನೆಯದಾಗಿ, ಆರೋಗ್ಯವೇ ಭಾಗ್ಯ ಎಂಬುದನ್ನು ಮರೆಯಬೇಡಿ. ಪರೀಕ್ಷೆಯಿದೆ ಎಂದು ರಾತ್ರಿಯಿಡೀ ಎಚ್ಚರಿದ್ದು ಓದುವುದು ತಪ್ಪು. ವಯಸ್ಕರಿಗೆ ಕನಿಷ್ಠ 6 ರಿಂದ 7 ಗಂಟೆಗಳ ನಿದ್ರೆ ಅವಶ್ಯಕ. ನಿದ್ರೆಯ ಕೊರತೆಯು ಜ್ಞಾಪಕ ಶಕ್ತಿಯನ್ನು ಕುಂದಿಸುತ್ತದೆ. ಆದ್ದರಿಂದ ಚೆನ್ನಾಗಿ ನಿದ್ರೆ ಮಾಡಿ ಮತ್ತು ಪೌಷ್ಟಿಕ ಆಹಾರ ಸೇವಿಸಿ. ಎಲ್ಲಕ್ಕಿಂತ ಮುಖ್ಯವಾಗಿ, ನಿಮ್ಮ ಮೇಲೆ ನಿಮಗೆ ನಂಬಿಕೆ ಇರಲಿ. "ನಾನು ಓದಿದ್ದೇನೆ, ನಾನು ಚೆನ್ನಾಗಿ ಬರೆಯಬಲ್ಲೆ" ಎಂಬ ಆತ್ಮವಿಶ್ವಾಸ ಬೆಳೆಸಿಕೊಳ್ಳಿ. ಆತಂಕ ಪಡುವ ಬದಲು ಶಾಂತವಾಗಿರಿ.

ಈ ಕೊನೆಯ 7 ದಿನಗಳು ನಿಮ್ಮ ಫಲಿತಾಂಶವನ್ನು ಬದಲಾಯಿಸುವ ಶಕ್ತಿ ಹೊಂದಿವೆ. ಭಯ ಬಿಡಿ, ಈ ಯೋಜನೆಯಂತೆ ಮುನ್ನಡೆಯಿರಿ. ಖಂಡಿತವಾಗಿಯೂ ಯಶಸ್ಸು ನಿಮ್ಮದಾಗುತ್ತದೆ.