ಮುಂಬೈ ಮೀರಿಸಿದ ಬೆಂಗಳೂರು: ಅತಿ ಹೆಚ್ಚು ಸಕ್ರಿಯ ಕೇಸ್ ಹೊಂದಿರುವ ನಗರ?

Updated: Wednesday, July 22, 2020, 13:27 [IST]

ಬೆಂಗಳೂರು, ಜುಲೈ 22: ಭಾರತದಲ್ಲಿ ಅತಿ ಹೆಚ್ಚು ಕೊರೊನಾ ಸೋಂಕಿತರನ್ನು ಹೊಂದಿರುವ ರಾಜ್ಯ ಮಹಾರಾಷ್ಟ್ರ. ಇದುವರೆಗೂ 3.2 ಲಕ್ಷಕ್ಕೂ ಅಧಿಕ ಕೇಸ್‌ಗಳು ಮಹಾರಾಷ್ಟ್ರದಲ್ಲಿ ವರದಿಯಾಗಿದೆ. ಅದೇ ರೀತಿ ಅತಿ ಹೆಚ್ಚು ಕೊರೊನಾ ವೈರಸ್ ಪ್ರಕರಣಗಳನ್ನು ಹೊಂದಿರುವ ಮೆಟ್ರೋ ನಗರ ಅಂದ್ರೆ ಮುಂಬೈ.

ಮುಂಬೈನಲ್ಲಿ ಸಕ್ರಿಯ ಕೇಸ್ ಎಷ್ಟಿದೆ?

ಮುಂಬೈನಲ್ಲಿ ಒಟ್ಟು 1,03,368 ಜನರಿಗೆ ಕೊರೊನಾ ವೈರಸ್ ಅಂಟಿಕೊಂಡಿದೆ. ಇದರಲ್ಲಿ 73,555 ಮಂದಿ ಸೋಂಕಿನಿಂದ ಸಂಪೂರ್ಣವಾಗಿ ಗುಣಮುಖರಾಗಿದ್ದಾರೆ. ಪ್ರಸ್ತುತ 23,704 ಕೇಸ್‌ಗಳು ಸಕ್ರಿಯವಾಗಿದೆ. ಬೆಂಗಳೂರಿಗೆ ಹೋಲಿಸಿಕೊಂಡರೆ ಆಕ್ಟಿವ್ ಕೇಸ್‌ಗಳ ಸಂಖ್ಯೆ ಮುಂಬೈನಲ್ಲಿ ಕಡಿಮೆ ಇದೆ.

ಬೆಂಗಳೂರಿನಲ್ಲಿ ಆಕ್ಟಿವ್ ಕೇಸ್ ಎಷ್ಟಿದೆ?

ಜುಲೈ 21ರ ವರದಿಯಂತೆ ಬೆಂಗಳೂರಿನಲ್ಲಿ ಒಟ್ಟು ಸೋಂಕಿತರ ಸಂಖ್ಯೆ 34943. ಅದರಲ್ಲಿ 7476 ಜನರು ಸಂಪೂರ್ಣವಾಗಿ ಚೇತರಿಕೆ ಕಂಡಿದ್ದಾರೆ. ಇನ್ನು 26746 ಜನರು ಚಿಕಿತ್ಸೆ ಪಡೆದುಕೊಳ್ಳುತ್ತಿದ್ದಾರೆ. ಅಂದ್ರೆ, ಮುಂಬೈ ನಗರಕ್ಕಿಂತ ಹೆಚ್ಚು ಆಕ್ಟಿವ್ ಕೇಸ್‌ಗಳನ್ನು ಬೆಂಗಳೂರು ಹೊಂದಿದೆ.

ಅತಿ ಹೆಚ್ಚು ಆಕ್ಟಿವ್ ಕೇಸ್ ಹೊಂದಿರುವ ನಗರ ಯಾವುದು?

ಮುಂಬೈ ಹಾಗೂ ಬೆಂಗಳೂರಿಗಿಂತಲೂ ಅತಿ ಹೆಚ್ಚು ಆಕ್ಟಿವ್ ಕೇಸ್ ಹೊಂದಿರುವ ನಗರಗಳಿವೆ. ಮಹಾರಾಷ್ಟ್ರದ ಪುಣೆ ಜಿಲ್ಲೆಯಲ್ಲಿ 36,810 ಆಕ್ಟಿವ್ ಕೇಸ್ ಇದೆ. ಅದೇ ರಾಜ್ಯದ ಥಾಣೆ ಜಿಲ್ಲೆಯಲ್ಲಿ 36,219 ಕೇಸ್ ಸಕ್ರಿಯವಾಗಿದೆ. ಪ್ರಸ್ತುತ ದೇಶದಲ್ಲಿ ಅತಿ ಹೆಚ್ಚು ಸಕ್ರಿಯ ಕೇಸ್ ಹೊಂದಿರುವ ನಗರಗಳ ಪಟ್ಟಿಯಲ್ಲಿ ಪುಣೆ ಮೊದಲು, ಥಾಣೆ ಎರಡನೇ ಸ್ಥಾನದಲ್ಲಿದೆ. ಬೆಂಗಳೂರು ಮೂರನೇ ಸ್ಥಾನದಲ್ಲಿದೆ.