ತಿರುಪತಿ ತಿಮ್ಮಪ್ಪನಿಗೆ ಮುಡಿ ಕೊಟ್ಟ ಅನಂತ್ ಅಂಬಾನಿ, ವಾರಾಂತ್ಯದಲ್ಲಿ ಹರಿದು ಬಂದ ಭಕ್ತ ಜನಸಾಗರ
ತಿರುಪತಿ: ರಿಲಯನ್ಸ್ ಇಂಡಸ್ಟ್ರೀಸ್ನ ಕಾರ್ಯನಿರ್ವಾಹಕ ನಿರ್ದೇಶಕ ಅನಂತ್ ಅಂಬಾನಿ ಭಾನುವಾರ ಬೆಳಗಿನ ಜಾವ ತಿರುಮಲ ಶ್ರೀ ವೆಂಕಟೇಶ್ವರ ಸ್ವಾಮಿ ದೇವಸ್ಥಾನಕ್ಕೆ ಭೇಟಿ ನೀಡಿ, ಸುಪ್ರಭಾತ ಸೇವೆಯಲ್ಲಿ ಪಾಲ್ಗೊಂಡು ದೇವರ ದರ್ಶನ ಪಡೆದಿದ್ದಾರೆ. ತಮ್ಮ ಈ ತೀರ್ಥಯಾತ್ರೆಯ ಭಾಗವಾಗಿ ಅವರು ಶ್ರೀವಾರಿಗೆ ಮುಡಿ ಅರ್ಪಿಸಿದ್ದಾರೆ.
ದರ್ಶನದ ನಂತರ, ದೇವಾಲಯದ ಆವರಣದಲ್ಲಿರುವ ರಂಗನಾಯಕ ಮಂಟಪದಲ್ಲಿ ವೈದಿಕ ವಿದ್ವಾಂಸರು ಅನಂತ್ ಅಂಬಾನಿ ಅವರಿಗೆ ವೇದ ಆಶೀರ್ವಚನ ನೀಡಿದರು. ದೇವಸ್ಥಾನದ ಅಧಿಕಾರಿಗಳು ಅವರಿಗೆ ಶ್ರೀವಾರಿ ತೀರ್ಥ ಪ್ರಸಾದ ನೀಡಿ, ರೇಷ್ಮೆ ಶಾಲಿನೊಂದಿಗೆ ಗೌರವಿಸಿದರು.
ಟಿಟಿಡಿಗೆ ರಿಲಯನ್ಸ್ನಿಂದ 25 ಇ-ಬಸ್ ದೇಣಿಗೆ
ತಿರುಪತಿ ಭೇಟಿಯ ಸಂದರ್ಭದಲ್ಲಿ ಮಾತನಾಡಿದ ಅನಂತ್ ಅಂಬಾನಿ, ರಿಲಯನ್ಸ್ ಇಂಡಸ್ಟ್ರೀಸ್ ವತಿಯಿಂದ ತಿರುಮಲ ತಿರುಪತಿ ದೇವಸ್ಥಾನಂ ಮಂಡಳಿಗೆ ಅಂದಾಜು 27.5 ಕೋಟಿ ರೂ. ಮೌಲ್ಯದ 25 ಎಲೆಕ್ಟ್ರಿಕ್ ಬಸ್ಗಳನ್ನು ದೇಣಿಗೆಯಾಗಿ ನೀಡುವುದಾಗಿ ಘೋಷಿಸಿದ್ದಾರೆ. ಈ ಬಸ್ಗಳನ್ನು ಓಡಿಸಲು ಅಗತ್ಯವಿರುವ 50 ಚಾಲಕರ ವೇತನ ಮತ್ತು ಇತರ ಭತ್ಯೆಗಳನ್ನು ಸಹ ಕಂಪನಿಯೇ ಭರಿಸಲಿದೆ ಎಂದು ಅವರು ತಿಳಿಸಿದ್ದಾರೆ. ಅಲ್ಲದೆ, ತಿರುಮಲದಲ್ಲಿ ಎಲೆಕ್ಟ್ರಿಕ್ ಬಸ್ಗಳ ಕಾರ್ಯಾಚರಣೆಗೆ ಅನುಕೂಲವಾಗುವಂತೆ ಇವಿ ಚಾರ್ಜಿಂಗ್ ಸ್ಟೇಷನ್ಗಳನ್ನು ಸ್ಥಾಪಿಸಲು ಬೆಂಬಲ ನೀಡುವುದಾಗಿ ಅವರು ಭರವಸೆ ನೀಡಿದ್ದಾರೆ.
ತಿರುಮಲದಲ್ಲಿ ಭಕ್ತರ ದಟ್ಟಣೆ: 20 ಗಂಟೆಗಳ ಕಾಯುವಿಕೆ
ಬೇಸಿಗೆ ರಜೆ ಮುಗಿದಿದ್ದರೂ, ವಾರಾಂತ್ಯದಲ್ಲಿ ತಿರುಮಲದಲ್ಲಿ ಭಕ್ತರ ಜನಸಾಗರವೇ ಹರಿದುಬಂದಿದೆ. ಇದರಿಂದಾಗಿ ದರ್ಶನಕ್ಕಾಗಿ ಭಕ್ತರು ಗಂಟೆಗಟ್ಟಲೆ ಸರತಿ ಸಾಲಿನಲ್ಲಿ ನಿಲ್ಲುವಂತಾಗಿದೆ. ವಸತಿ, ಸಾರಿಗೆ ಮತ್ತು ಇತರ ಮೂಲಸೌಕರ್ಯಗಳ ಮೇಲೆಯೂ ತೀವ್ರ ಒತ್ತಡ ಉಂಟಾಗಿದೆ. ಭಾನುವಾರದಂದು, ವೈಕುಂಠಂ ಕ್ಯೂ ಕಾಂಪ್ಲೆಕ್ಸ್ 1 ಮತ್ತು 2 ರ ಎಲ್ಲಾ ಕಂಪಾರ್ಟ್ಮೆಂಟ್ಗಳು ಭರ್ತಿಯಾಗಿದ್ದು, ಸರತಿ ಸಾಲು ಔಟರ್ ರಿಂಗ್ ರೋಡ್ನಲ್ಲಿರುವ ಬಟಗಂಗಮ್ಮ ದೇವಸ್ಥಾನದವರೆಗೂ ವಿಸ್ತರಿಸಿತ್ತು.
ಸಂಜೆ 7 ಗಂಟೆ ಸುಮಾರಿಗೆ, ಸರ್ವ ದರ್ಶನಕ್ಕಾಗಿ ಕಾಯುವ ಸಮಯ ಅಂದಾಜು 18 ರಿಂದ 20 ಗಂಟೆಗಳಷ್ಟಿತ್ತು. ಭಾರಿ ಜನದಟ್ಟಣೆಯು ಸಾರಿಗೆ ಮತ್ತು ನಾಗರಿಕ ಮೂಲಸೌಕರ್ಯಗಳ ಮೇಲೆಯೂ ಒತ್ತಡ ಬೀರಿದೆ. ಘಾಟ್ ರಸ್ತೆಗಳಲ್ಲಿ ಮತ್ತು ತಿರುಮಲದೊಳಗೆ ವಾಹನ ಸಂಚಾರ ನಿಧಾನಗತಿಯಲ್ಲಿತ್ತು. ಲಗೇಜ್ ಮತ್ತು ಮಕ್ಕಳೊಂದಿಗೆ ಭಕ್ತರು ಪಾರ್ಕಿಂಗ್ ಪ್ರದೇಶಗಳಿಂದ ಕ್ಯೂ ಪ್ರವೇಶಿಸುವ ಸ್ಥಳಗಳವರೆಗೆ ಬಹುದೂರ ನಡೆಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿತ್ತು.
ಸೋಮವಾರ ವಿಐಪಿ ದರ್ಶನ ರದ್ದು
ಭಕ್ತರ ವಿಪರೀತ ದಟ್ಟಣೆಯನ್ನು ಗಮನದಲ್ಲಿಟ್ಟುಕೊಂಡು, ಸಾಮಾನ್ಯ ಭಕ್ತರಿಗೆ ದರ್ಶನಕ್ಕೆ ಹೆಚ್ಚಿನ ಅವಕಾಶ ಮಾಡಿಕೊಡುವ ಉದ್ದೇಶದಿಂದ ಟಿಟಿಡಿ ಸೋಮವಾರದ ವಿಐಪಿ ಬ್ರೇಕ್ ದರ್ಶನ ಮತ್ತು ಶ್ರೀವಾಣಿ ಟ್ರಸ್ಟ್ ದರ್ಶನವನ್ನು ರದ್ದುಗೊಳಿಸಿದೆ. ಸಣ್ಣ ಮಕ್ಕಳು ಮತ್ತು ವೃದ್ಧರಿರುವ ಕುಟುಂಬಗಳು ಕ್ಯೂ ಕಾಂಪ್ಲೆಕ್ಸ್ಗಳನ್ನು ಪ್ರವೇಶಿಸುವ ಮುನ್ನ ಹಲವು ಗಂಟೆಗಳ ಕಾಲ ಕಾಯುವಂತಾಯಿತು. ವಸತಿ ಸಿಗದ ಭಕ್ತರು ಯಾತ್ರಾರ್ಥಿಗಳ ಸೌಲಭ್ಯ ಸಂಕೀರ್ಣಗಳು, ತಾತ್ಕಾಲಿಕ ಶೆಲ್ಟರ್ಗಳು, ಪಾರ್ಕ್ಗಳು ಮತ್ತು ಬೆಟ್ಟದ ಮೇಲಿನ ಇತರ ಬಯಲು ಪ್ರದೇಶಗಳಲ್ಲಿ ರಾತ್ರಿ ಕಳೆದಿದ್ದಾರೆ.
ವಾರಾಂತ್ಯದಲ್ಲಿ ಶ್ರೀವಾರಿ ದರ್ಶನದ ಅಂಕಿ-ಅಂಶಗಳು
ಟಿಟಿಡಿ ಕುಡಿಯುವ ನೀರು, ಅನ್ನಪ್ರಸಾದ ಮತ್ತು ತಾತ್ಕಾಲಿಕ ಶೌಚಾಲಯಗಳನ್ನು ವ್ಯವಸ್ಥೆ ಮಾಡಿದ್ದರೂ, ಭಕ್ತರ ಸಂಖ್ಯೆ ಹೆಚ್ಚಿದ್ದರಿಂದ ಈ ಸೌಲಭ್ಯಗಳ ಮೇಲೆಯೂ ನಿರಂತರ ಒತ್ತಡವಿತ್ತು. ಟಿಟಿಡಿ ಬಿಡುಗಡೆ ಮಾಡಿರುವ ಅಧಿಕೃತ ಮಾಹಿತಿಯ ಪ್ರಕಾರ, ಶನಿವಾರದಂದು ಒಟ್ಟು 85,582 ಭಕ್ತರು ದೇವರ ದರ್ಶನ ಪಡೆದಿದ್ದು, 44,155 ಭಕ್ತರು ಮುಡಿ ಅರ್ಪಿಸಿದ್ದಾರೆ. ಅಂದು 3.76 ಕೋಟಿ ರೂ. ಹುಂಡಿ ಕಾಣಿಕೆ ಸಂಗ್ರಹವಾಗಿದೆ. ಜೊತೆಗೆ 4.66 ಲಕ್ಷ ಲಡ್ಡುಗಳು ಮಾರಾಟವಾಗಿದ್ದು, 3.43 ಲಕ್ಷ ಭಕ್ತರಿಗೆ ಉಚಿತ ಅನ್ನಪ್ರಸಾದ ನೀಡಲಾಗಿದೆ.
ಇನ್ನು ಜೂನ್ 28 ರ ಭಾನುವಾರದಂದು 91,793 ಭಕ್ತರು ದರ್ಶನ ಪಡೆದಿದ್ದು, 31,221 ಮುಡಿ ಅರ್ಪಣೆಯಾಗಿದೆ. ಹುಂಡಿಯಲ್ಲಿ 4.90 ಕೋಟಿ ರೂ. ಸಂಗ್ರಹವಾಗಿದ್ದು, 4.38 ಲಕ್ಷ ಲಡ್ಡು ಮಾರಾಟ ಮತ್ತು 3.13 ಲಕ್ಷ ಜನರಿಗೆ ಅನ್ನಪ್ರಸಾದ ವಿತರಣೆ ಮಾಡಲಾಗಿದೆ. ಭಕ್ತರಿಗೆ ಅಗತ್ಯ ಸೇವೆಗಳನ್ನು ಒದಗಿಸಲು ಎಲ್ಲಾ ವಿಭಾಗಗಳು ಹಗಲಿರುಳು ಶ್ರಮಿಸುತ್ತಿವೆ ಎಂದು ದೇವಸ್ಥಾನದ ಅಧಿಕಾರಿಗಳು ತಿಳಿಸಿದ್ದಾರೆ.
Click it and Unblock the Notifications
Sign in with Google