ಎರಡು ದಿನದ ಮುದ್ದು ಕಂದಮ್ಮನನ್ನು ಬಲಿ ತೆಗೆದುಕೊಂಡ ಡೆಂಗ್ಯೂ

ಕೊಯಿಮತ್ತೂರು, ಜುಲೈ 10: ಆಗಷ್ಟೇ ಕಣ್ಣು ಬಿಟ್ಟು ಭೂಮಿಗೆ ಬಂದಿದ್ದ ಎರಡು ದಿನದ ಮಗುವೊಂದು ಡೆಂಗ್ಯೂ ರೋಗದಿಂದ ಅಸುನೀಗಿದ ಕರಳು ಕಿವುಚುವ ಘಟನೆ ತಮಿಳುನಾಡಿನ ಕೋಯಿಮತ್ತೂರಿನಲ್ಲಿ ನಡೆದಿದೆ.

ಡೆಂಗ್ಯೂ ರೋಗದಿಂದ ಬಳಲುತ್ತಿದ್ದ ಲೌರ್ಥ್ ಮೇರಿ ಎಂಬ ಗರ್ಭಿಣಿಯನ್ನು ಇಲ್ಲಿನ ಸರ್ಕಾರಿ ಆಸ್ಪತ್ರೆಯೊಂದಕ್ಕೆ ಸೇರಿಸಲಾಗಿತ್ತು. ಆದರೆ ಆ ಸರ್ಕಾರಿ ಆಸ್ಪತ್ರೆಯಲ್ಲಿ ಅಗತ್ಯ ಸೌಲಭ್ಯಗಳಿಲ್ಲದಿದ್ದ ಕಾರಣ, ಹೆಚ್ಚಿನ ಚಿಕಿತ್ಸೆಗಾಗಿ ಅವರನ್ನು ಖಾಸಗಿ ಆಸ್ಪತ್ರೆಗೆ ರವಾನಿಸುವಂತೆ ಸರ್ಕಾರಿ ಆಸ್ಪತ್ರೆಯ ವೈದ್ಯರೇ ಸೂಚಿಸಿದ್ದರು.

ಅದರಂತೆಯೇ ಅವರನ್ನು ಖಾಸಗಿ ಆಸ್ಪತ್ರೆಯೊಂದಕ್ಕೆ ರವಾನಿಸಲಾಯಿತು. ಇಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಸಮಯದಲ್ಲೇ ಮಹಿಳೆ ಗಂಡು ಮಗುವಿಗೆ ಜನ್ಮವಿತ್ತರು. ಆದರೆ ದುರದೃಷ್ಣವಶಾತ್ ಆ ಮಗುವಿಗೂ ಡೆಂಗ್ಯೂ ಸೋಂಕು ತಗುಲಿತ್ತು.

ಅವರ ಬಳಿ ಹೆಚ್ಚಿನ ಚಿಕಿತ್ಸೆಗೆ ಹಣವಿಲ್ಲ ಎಂಬ ಕಾರಣಕ್ಕೆ, ಡೆಂಗ್ಯೂದಿಂದ ಬಳಲುತ್ತಿದ್ದ ತಾಯಿ ಮತ್ತು ಆಗಷ್ಟೇ ಜನಿಸಿದ್ದ ಆ ಮಗುವನ್ನ ಸರ್ಕಾರಿ ಆಸ್ಪತ್ರೆಗೆ ರವಾನಿಸುವಂತೆ ಖಾಸಗಿ ಆಸ್ಪತ್ರೆಯ ವೈದ್ಯರಿಂದ ಒತ್ತಡ ಬಂತು.

ಹೀಗೇ ಅಲ್ಲಿ-ಇಲ್ಲಿ, ಇಲ್ಲಿ-ಅಲ್ಲಿ ಎಂಬ ವೈದ್ಯರ ಬೇಜವಾಬ್ದಾರಿ ಅಮಾನವೀಯ ವರ್ತನೆಯಿಂದಾಗಿ ತಾಯಿ ಮತ್ತು ಮಗು ಇಬ್ಬರೂ ಅಸುನೀಗಿದ್ದಾರೆ.

ಅಷ್ಟೇ ಅಲ್ಲ, ಶವಾಗಾರದ ಎದುರಲ್ಲಿ ಮಗುವಿನ ಶವವನ್ನು 6 ಗಂಟೆಗಳ ಕಾಲ ಇಟ್ಟು, ಮರಣೋತ್ತರ ಪರೀಕ್ಷೆಗೂ ಕೊಂಡೊಯ್ಯದೆ ಆಸ್ಪತ್ರೆ ಮತ್ತಷ್ಟು ಬೇಜವಾಬ್ದಾರಿತನ ಮೆರೆದಿದ್ದು, ಸಾವಿಗೀಡಾದ ಮಹಿಳೆಯ ಕುಟುಂಬಸ್ಥರು, ಬಂಧುಗಳು ಆಸ್ಪತ್ರೆಯ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

English summary

A two days baby and her mother died of dengue disease in Coimbatore, Tamil Nadu. The family members and relatives of the victim have protested against the government hospital authority, who carelessly kept child's body outside the mortuary gate for more than six hours at Coimbatore government hospital.