ಚಿತ್ರಗಳಲ್ಲಿ: ಜೈಲಿನಿಂದ ಹೊರ ನಡೆದ ಜಗನ್ ರೆಡ್ಡಿ

By Mahesh

Updated: Tuesday, September 24, 2013, 18:03 [IST]

ಹೈದರಾಬಾದ್, ಸೆ.24 : ಅಕ್ರಮ ಆಸ್ತಿ ಪ್ರಕರಣದ ಆರೋಪಿಯಾಗಿ ಜೈಲು ಸೇರಿ ಸುಮಾರು 16 ತಿಂಗಳ ನಂತರ ವೈಎಸ್ಸಾರ್ ಪಕ್ಷದ ಅಧ್ಯಕ್ಷ ಜಗನ್ ಮೋಹನ್ ರೆಡ್ಡಿ ಬಂಧಮುಕ್ತರಾಗಿದ್ದಾರೆ. ನಾಂಪಲ್ಲಿ ಸಿಬಿಐ ವಿಶೇಷ ನ್ಯಾಯಾಲಯ ಸೆ.23ರಂದು ಜಾಮೀನು ಮಂಜೂರು ಮಾಡಿತ್ತು. ಆದರೆ, ಜಗನ್ ಗೆ ಮಂಗಳವಾರ ಮಧ್ಯಾಹ್ನ ಬಿಡುಗಡೆ ಸಿಕ್ಕಿದೆ.

ಸೋಮವಾರ ಸಂಜೆಯಿಂದಲೆ ವೈಎಸ್ಸಾರ್ ಪಕ್ಷದ ಕಾರ್ಯಕರ್ತರು, ರಾಯಲಸೀಮಾದಿಂದ ಬಂದಿದ್ದ ಅಭಿಮಾನಿಗಳು ಚಂಚಲಗುಡ ಜೈಲಿನ ಸುತ್ತ ನೆರೆದಿದ್ದರು. 40 ವರ್ಷದ ಕಡಪ ಸಂಸದ ಜಗನ್ ಮೋಹನ್ ರೆಡ್ಡಿಗೆ ಭರ್ಜರಿ ಸ್ವಾಗತ ನೀಡಲಾಗಿದೆ.

ಅಕ್ರಮ ಆಸ್ತಿ ಗಳಿಕೆ ಆರೋಪದ ಮೇಲೆ ಜೈಲುವಾಸ ಅನುಭವಿಸುತ್ತಿರುವ ಜಗನ್ ಮೇಲಿನ ಕೇಸುಗಳನ್ನು ನಾಲ್ಕು ತಿಂಗಳಿನಲ್ಲಿ ಮುಕ್ತಾಯಗೊಳಿಸುವಂತೆ ಸಿಬಿಐ ತಂಡಕ್ಕೆ ಸುಪ್ರೀಂಕೊರ್ಟ್ ಕಳೆದ ಮೇ ತಿಂಗಳಿನಲ್ಲಿ ಆದೇಶಿಸಿತ್ತು. ಅದರಂತೆ ನಿನ್ನೆ ವರದಿ ನೀಡಿದ ಸಿಬಿಐ ತನಿಖೆ ಮುಕ್ತಾಯವಾಗಿ ಎಂದು ಘೋಷಿಸಿ ಜಾಮೀನಿಗೆ ಯಾವುದೇ ಅಡ್ಡಿ ಪಡಿಸಿರಲಿಲ್ಲ. ಹೀಗಾಗಿ ಜಗನ್ ಗೆ ಜಾಮೀನು ಹಾಗೂ 8 ಸಂಸ್ಥೆಗಳಿಗೆ ನಿರಾಳತೆ ಮೂಡಿತ್ತು.

ಅಖಂಡ ಆಂಧ್ರ ಹಾಗೂ ತೆಲಂಗಾಣ ರಚನೆ ವಿರೋಧಿಸಿ ಸೀಮಾಂಧ್ರ ಭಾಗದಲ್ಲಿ ಮಂಗಳವಾರಿ ಬಂದ್ ಆಚರಿಸಲಾಗುತ್ತಿದೆ. ಹೈದರಾಬಾದಿನಲ್ಲಿ ಜಗನ್ ಬಿಡುಗಡೆ ಸಂಭ್ರಮ ಮನೆ ಮಾಡಿದೆ. ಜಗನ್ ಬಿಡುಗಡೆ ಸಂಭ್ರಮಾಚರಣೆ ಚಿತ್ರಗಳು ಇಲ್ಲಿವೆ ನೋಡಿ...

ಅಭಿಮಾನಿಗಳಲ್ಲಿ ಹರುಷ

ಹೈದರಾಬಾದ್ ; ನಾಂಪಲ್ಲಿ ಸಿಬಿಐ ವಿಶೇಷ ನ್ಯಾಯಾಲಯದ ಬಳಿ ಸೋಮವಾರ ಜಗನ್ ಗೆ ಜಾಮೀನು ಸುದ್ದಿ ಹೊರಬೀಳುತ್ತಿದ್ದಂತೆ ವೈಎಸ್ಸಾರ್ ಪಕ್ಷದ ಕಾರ್ಯಕರ್ತರು ಸಿಹಿ ಹಂಚಿ ಸಂಭ್ರಮ ಪಟ್ಟರು

ಪತಿ ನಿರೀಕ್ಷೆಯಲ್ಲಿ

ಜಗನ್ ಮೋಹನ್ ರೆಡ್ಡಿ ಅವರ ಪತ್ನಿ ಭಾರತಿ ಅವರು ಅಭಿಮಾನಿಗಳಿಗೆ ವಂದಿಸುತ್ತಾ ಜಗನ್ ಗಾಗಿ ನಿರೀಕ್ಷಿಸಿದ್ದು ಹೀಗೆ

ಜೈಲಿನ ಬಳಿ ಅಪಾರ ಜನಸ್ತೋಮ

ಚಂಚಲಗುಡ ಜೈಲಿನ ಬಳಿ ಅಪಾರ ಜನಸ್ತೋಮ ನೆರೆದಿದ್ದು, ಜಗನ್ ಅವರನ್ನು ಬುಲೆಟ್ ಪ್ರೂಫ್ ಕಾರಿನಲ್ಲಿ ಕರೆದೊಯ್ಯಲಾಗುತ್ತಿದೆ. ಅಕ್ರಮ ಆಸ್ತಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜಗನ್ ಅವರಿಗೆ 6 ಬಾರಿ ಜಾಮೀನು ಅರ್ಜಿ ತಿರಸ್ಕರಿಸಲಾಗಿತ್ತು.

ಮುಂದೇನು?

ಮುಂಬರುವ ಲೋಕಸಭೆ ಚುನಾವಣೆ ಹಿನ್ನೆಲೆಯಲ್ಲಿ ವೈಎಸ್ಸಾರ್ ಪಕ್ಷ ಗಳಿಸುತ್ತಿರುವ ಜನಪ್ರಿಯತೆ ಮೇಲೆ ಕಾಂಗ್ರೆಸ್ ಕಣ್ಣಿಟ್ಟಿದೆ. ಟಿಆರ್ಎಸ್, ಬಿಜೆಪಿ ಹಾಗೂ ಟಿಡಿಪಿ ಕೂಡಾ ಬಿರುಸಿನ ರಾಜಕೀಯ ಚಟುವಟಿಕೆಗಳಲ್ಲಿ ತೊಡಗಿವೆ

ಜಗನ್ ಜನಪ್ರಿಯತೆ

ಸೀಮಾಂಧ್ರ ಭಾಗದಲ್ಲಿ ಅಂದರೆ ರಾಯಲಸೀಮೆ, ಕರಾವಳಿ(ಕೋಸ್ತಾ)ಆಂಧ್ರದಲ್ಲಿ ಜಗನ್ ಜನಪ್ರಿಯತೆ ಇದ್ದೇ ಇದೆ. ಹೈದರಾಬಾದ್ ಕೂಡಾ ಜಗನ್ ಪರ ವಾಲುವ ಸಾಧ್ಯತೆ ಹೆಚ್ಚಿದೆ. ತೆಲಂಗಾಣದಲ್ಲಿ ಮಾತ್ರ ಕಾಂಗ್ರೆಸ್ ಹಾಗೂ ಹೀಗೂ ಒಂದಷ್ಟು ಸ್ಥಾನ ಗಳಿಸುವ ನಿರೀಕ್ಷೆ ಹೊಂದಿದೆ.

ಜಗನ್ ನಡೆ ನಿಗೂಢ

ಜಗನ್ ಮೊದಲ ಹೆಜ್ಜೆ ಯಾವ ಕಡೆ ಎಂಬುದು ಕುತೂಹಲಕಾರಿಯಾಗಿದೆ. ಸೀಮಾಂಧ್ರದಲ್ಲಿ ಮಂಗಳವಾರ ಬಂದ್ ನಡೆಸಲಾಗಿದೆ. ಅಖಂಡ ಆಂಧ್ರಕ್ಕಾಗಿ ವೈಎಸ್ ವಿಜಯಮ್ಮ ನಂತರ ಜಗನ್ ಕೂಡಾ ಉಪವಾಸ ಕೈಗೊಂಡಿದ್ದರು.

ಟಿಡಿಪಿಗೆ ನಡುಕ

ಆಕ್ರಮ ಆಸ್ತಿ ಪ್ರಕರಣದ ಆರೋಪ ಹೊರೆಸಿದ್ದು ಕಾಂಗ್ರೆಸ್ ಶಾಸಕರಾದರೂ ವೈಎಸ್ಸಾರ್ ಪಕ್ಷದ ವಿರುದ್ಧ ಸತತ ಹೋರಾಟ ನಡೆಸುತ್ತಾ ಬಂದ ತೆಲುಗುದೇಶಂ ಪಕ್ಷದ ವಿರುದ್ಧ ಜಗನ್ ತಿರುಗಿ ಬೀಳಬಹುದು.

ಜಗನ್ ಸೋದರಿ ಶರ್ಮಿಳಾ ಅವರು ಕೂಡಾ ತಮ್ಮ ಪಾದಯಾತ್ರೆ ವೇಳೆ ಟಿಡಿಪಿ ಹಾಗೂ ಕಾಂಗ್ರೆಸ್ ವಿರುದ್ಧ ಕಿಡಿ ಕಾರಿದ್ದರು. ಚಿತ್ರದಲ್ಲಿ(ಎಡದಿಂದ) ವೈಎಸ್ ಶರ್ಮಿಳಾ, ವಿಜಯಮ್ಮ, ಭಾರತಿ

ಜಗನ್ ಮನೆಯಲ್ಲಿ

ಜಗನ್ ಮೋಹನ್ ರೆಡ್ಡಿ ಮನೆಯಲ್ಲಿ ಸೋಮವಾರದಿಂದ ಸಂಭ್ರಮ ಮನೆ ಮಾಡಿದೆ. ಎಲ್ಲರ ಮುಖದಲ್ಲೂ ಸಂತಸದ ನಗೆ ಹಬ್ಬಿದೆ

ನಾಯ್ಡು ಗರಂ

ತೆಲುಗುದೇಶಂ ಪಾರ್ಟಿ ಮುಖ್ಯಸ್ಥ ಚಂದ್ರಬಾಬು ನಾಯ್ಡು ಮಾತನಾಡಿ, ಇನ್ಮುಂದೆ ಕಾಂಗ್ರೆಸ್ ಆಂಧ್ರದಲ್ಲಿ ಎರಡು ಕಚೇರಿ ಹೊಂದಲಿದೆ. ತೆಲಂಗಾಣ ರಾಷ್ಟ್ರೀಯ ಸಮಿತಿ ಕಚೇರಿ ಹಾಗೂ ವೈಎಸ್ಸಾರ್ ಪಕ್ಢದ ಕಚೇರಿ ಎಂದಿದ್ದಾರೆ.

ಕಾಂಗ್ರೆಸ್ ಹಾಗೂ ವೈಎಸ್ಸಾರ್ ಪಕ್ಷ ನಡುವಿನ ಒಳ ಒಪ್ಪಂದದ ಫಲವೇ ಜಗನ್ ಗೆ ಜಾಮೀನು ಸಿಕ್ಕಿದೆ ಎಂದು ಟಿಡಿಪಿ ಆರೋಪಿಸಿದೆ.