ಧಾರವಾಡ ಲೋಕಸಭಾ ಕ್ಷೇತ್ರದಲ್ಲಿ ಶೇ 70.06ರಷ್ಟು ಮತದಾನ

ಧಾರವಾಡ, ಏಪ್ರಿಲ್ 24 : ಧಾರವಾಡ ಲೋಕಸಭಾ ಕ್ಷೇತ್ರದಲ್ಲಿ ಶೇ 70.06ರಷ್ಟು ಮತದಾನ ನಡೆದಿದೆ. ಅಭ್ಯರ್ಥಿಗಳ ಭವಿಷ್ಯ ಮತಯಂತ್ರದಲ್ಲಿ ಭದ್ರವಾಗಿದ್ದು, ಮೇ 23ರಂದು ಮತ ಎಣಿಕೆ ನಡೆಯಲಿದೆ.

ಏಪ್ರಿಲ್ 23ರ ಮಂಗಳವಾರ ಧಾರವಾಡ ಲೋಕಸಭಾ ಕ್ಷೇತ್ರದ ಮತದಾನ ನಡೆಯಿತು. ಶೇ.70.06 ರಷ್ಟು ಮತದಾನ ನಡೆದಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಕಲಘಟಗಿ ವಿಧಾನಸಭಾ ಕ್ಷೇತ್ರದಲ್ಲಿ ಅತಿ ಹೆಚ್ಚು ಎಂದರೆ ಶೇ. 75.03 ರಷ್ಟು ಮತದಾನ ನಡೆದಿದೆ.

ಧಾರವಾಡ ಲೋಕಸಭಾ ಕ್ಷೇತ್ರದ ಹುಬ್ಬಳ್ಳಿ ಧಾರವಾಡ ಪಶ್ಚಿಮ ವಿಧಾನಸಭಾ ಕ್ಷೇತ್ರದಲ್ಲಿ ಅತಿ ಕಡಿಮೆ ಎಂದರೆ ಶೇ.63.95 ಮತದಾನವಾಗಿದೆ. ಹುಬ್ಬಳ್ಳಿ-ಧಾರವಾಡ ಸೆಂಟ್ರಲ್ ವಿಧಾನಸಭಾ ಕ್ಷೇತ್ರದಲ್ಲಿ ಶೇ 64.64ರಷ್ಟು ಮತದಾನವಾಗಿದೆ.

2014 ರ ಲೋಕಸಭಾ ಚುನಾವಣೆಯಲ್ಲಿ ಒಟ್ಟು 15,78,125 ಮತದಾರರಿದ್ದರು. 10,41,226 ಜನ ಮತ ಚಲಾಯಿಸಿದ್ದರು. ಶೇ.65.98 ಮತದಾನವಾಗಿತ್ತು. ಕಳೆದ ಬಾರಿಗೆ ಹೋಲಿಕೆ ಮಾಡಿರೆ ಈ ಬಾರಿ ಮತದಾನ ಹೆಚ್ಚಾಗಿದೆ.

ಉತ್ತಮ ಮತದಾನಕ್ಕಾಗಿ ಜಿಲ್ಲಾ ಸ್ವೀಪ್ ಸಮಿತಿಯ ಜೊತೆಗೆ ಖಾಸಗಿ ಸಂಘಸಂಸ್ಥೆಗಳು, ವಿವಿಧ ಉದ್ಯಮಿಗಳು ಸಹ ಕೈ ಜೋಡಿಸಿದ್ದರು. ಧಾರವಾಡದ ಶ್ರೀ ಪಂಜುರ್ಲಿ, ಹಳಿಯಾಳ ರಸ್ತೆಯ ಶಿವಸಾಗರ್ ಹಾಗೂ ಆರ್.ಎಲ್. ಎಸ್.ಕಾಲೇಜು ಬಳಿಯ ಎಲ್.ಇ.ಎ.ಕ್ಯಾಂಟೀನ್ ಮಾಲೀಕರು ಮತಚಲಾಯಿಸಿ ಬಂದವರಿಗೆ ಶೇ.10 ರ ರಿಯಾಯಿತಿ ದರದಲ್ಲಿ ಊಟ, ಉಪಹಾರ ಪೂರೈಸಿದರು.

ವೀರ ಸಿಂಧೂರ ಲಕ್ಷ್ಮಣ ವೃತ್ತ ಬಳಿಯ ಜ್ಯೋತಿ ಪೆಟ್ರೋಲ್ ಬಂಕ್ ನವರು ಮತ ಚಲಾಯಿಸಿ ಬಂದವರಿಗೆ ಪ್ರತಿ ಒಂದು ಲೀಟರ್ ಪೆಟ್ರೋಲ್‌ಗೆ 1 ರೂಪಾಯಿ ರಿಯಾಯಿತಿ ನೀಡಿದರು. ಸುಗತೆ ಸರ್ಜಿಕಲ್ಸ್ ತನ್ನ ಉತ್ಪನ್ನಗಳನ್ನು ಶೇ.25 ರ ರಿಯಾಯಿತಿ ದರದಲ್ಲಿ ನೀಡಿದರೆ, ಮಾಳಮಡ್ಡಿಯ ಹರೀಶ ಮೆಡಿಲ್ಯಾಬ್‌ನವರು ಉಚಿತವಾಗಿ ರಕ್ತ ತಪಾಸಣೆ, ಇಸಿಜಿ ಮಾಡಿದರು.

English summary

70.06 percent polling in Dharwad lok sabha seat. Elections held on April 23, 2019. Election counting on May 23.