ನಷ್ಟದ ಹಾದಿ ಹಿಡಿದ ಷೇರು ಮಾರುಕಟ್ಟೆ; ರು. 200ಕ್ಕೂ ಹೆಚ್ಚು ಕುಸಿದ ಮಾರುತಿ
ಮುಂಬೈ, ಸೆಪ್ಟೆಂಬರ್ 12: ಸತತ ಐದು ಸೆಷನ್ ನಿಂದ ಏರು ಗತಿಯಲ್ಲಿ ಇದ್ದ ನಿಫ್ಟಿ ಸೂಚ್ಯಂಕವು ಗುರುವಾರ ಇಳಿಕೆ ಕಂಡಿತು. ರಿಲಯನ್ಸ್ ಇಂಡಸ್ಟ್ರೀಸ್, ಆಕ್ಸಿಸ್ ಬ್ಯಾಂಕ್, ಮಾರುತಿ ಸುಜುಕಿ ಹಾಗೂ ಐಟಿಸಿ ಷೇರುಗಳು ಇಳಿಕೆ ಕಂಡವು. ಜುಲೈ ತಿಂಗಳ ಕೈಗಾರಿಕೆ ಉತ್ಪಾದನೆ ದತ್ತಾಂಶ, ಆಗಸ್ಟ್ ತಿಂಗಳ ಚಿಲ್ಲರೆ ಹಣದುಬ್ಬರ ಮಾಹಿತಿ ಇನ್ನೇನು ಹೊರಬರಬೇಕಿದ್ದು, ಹೂಡಿಕೆದಾರರು ಕಾದುನೋಡುವ ಲೆಕ್ಕಾಚಾರದಲ್ಲಿ ಇದ್ದಾರೆ.
ದೇಶದ ಚಿಲ್ಲರೆ ಹಣದುಬ್ಬರ ದರವು ಆಗಸ್ಟ್ ನಲ್ಲಿ ಹತ್ತು ತಿಂಗಳಲ್ಲೇ ಗರಿಷ್ಠ ಮಟ್ಟಕ್ಕೆ ಹೋಗಬಹುದು ಎಂದು ಆರ್ಥಿಕ ತಜ್ಞರು ಅಂದಾಜಿಸಿದ್ದಾರೆ. ಬಿಎಸ್ ಇ ಸೂಚ್ಯಂಕ 167 ಅಂಶಗಳಷ್ಟು ಕುಸಿದು, 37,104 ಅಂಶಕ್ಕೆ ದಿನಾಂತ್ಯದ ವಹಿವಾಟು ಮುಗಿಸಿದೆ. ಇನ್ನು 54 ಅಂಶಗಳ ಇಳಿಕೆಯಾಗಿ, 11 ಸಾವಿರಕ್ಕಿಂತ ಕಡಿಮೆ ಮಟ್ಟಕ್ಕೆ, ಅಂದರೆ 10,982 ಅಂಶಗಳಿಗೆ ನಿಫ್ಟಿ ದಿನದ ವಹಿವಾಟು ಕೊನೆ ಮಾಡಿದೆ.
ಆದರೂ ಬಿಎಸ್ ಇಯಲ್ಲಿ 1,370 ಷೇರುಗಳು ಏರಿಕೆಯಾದರೆ, 1,109 ಷೇರುಗಳು ಇಳಿಕೆ ಕಂಡಿವೆ. ಯೆಸ್ ಬ್ಯಾಂಕ್ ಷೇರುಗಳು ಐದು ಪರ್ಸೆಂಟ್ ಗೂ ಹೆಚ್ಚು ನಷ್ಟ ಅನುಭವಿಸಿದೆ. ನಂತರ ಟಾಟಾ ಮೋಟಾರ್ಸ್, ಮಾರುತಿ ಸುಜುಕಿ, ಆಕ್ಸಿಸ್ ಬ್ಯಾಂಕ್, ಭಾರ್ತಿ ಏರ್ ಟೆಲ್, ಬಜಾಜ್ ಆಟೋ ಷೇರುಗಳು ಭಾರೀ ಪ್ರಮಾಣದಲ್ಲಿ ನಷ್ಟ ಕಂಡಿವೆ.
ಆದರೆ, ಐಸಿಐಸಿಐ ಬ್ಯಾಂಕ್ ಎರಡು ಪರ್ಸೆಂಟ್ ಗಿಂತ ಹೆಚ್ಚು ಏರಿಕೆ ಕಂಡಿದೆ. ಸನ್ ಫಾರ್ಮಾ, ಎಚ್ ಡಿಎಫ್ ಸಿ ಷೇರುಗಳು ಕೂಡ ಲಾಭ ಕಂಡಿವೆ.
Click it and Unblock the Notifications
Sign in with Google