ಕೊರೊನಾ ಕಾಟದ ನಡುವೆ ಇನ್ಫಿಗೆ Q1ನಲ್ಲಿ ಶೇ 12ರಷ್ಟು ಲಾಭ

ಬೆಂಗಳೂರು, ಜುಲೈ 15: ಕೊರೊನವೈರಸ್ ಸೋಂಕು, ಲಾಕ್ಡೌನ್ ನಡುವೆ ವರ್ಕ್ ಫ್ರಮ್ ಹೋಂ ಜಾರಿಗೆ ತಂದು ಇನ್ಫೋಸಿಸ್ ಗೆದ್ದುಕೊಂಡಿದೆ. ದೇಶದ ಎರಡನೇ ಅತಿದೊಡ್ಡ ಸಾಫ್ಟ್ ವೇರ್ ರಫ್ತು ಸಂಸ್ಥೆ ತನ್ನ ಮೊದಲ ತ್ರೈಮಾಸಿಕ ವರದಿಯನ್ನು ಇಂದು ಪ್ರಕಟಿಸಿದೆ.

ಇನ್ಫೋಸಿಸ್ ತ್ರೈಮಾಸಿಕದಲ್ಲಿ ಸಂಸ್ಥೆಯ ನಿವ್ವಳ ಲಾಭ ಶೇ 12.4ರಷ್ಟು ಏರಿಕೆ ಕಂಡಿದ್ದು, 4,272 ಕೋಟಿ ರು ಗಳಿಕೆಯಾಗಿದೆ. ಮಾರುಕಟ್ಟೆ ತಜ್ಞರು 3,820 ಕೋಟಿ ರು ಗಳಿಸಬಹುದು ಎಂದು ನಿರೀಕ್ಷಿಸಿದ್ದರು.

ಆದಾಯದಲ್ಲಿ ಶೇ 8.5 ರಷ್ಟು ಏರಿಕೆ ಕಂಡು ಬಂದಿದ್ದು, 23,665 ಕೋಟಿ ರು ಗಳಿಕೆಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ 21,803 ಕೋಟಿ ರು ಮಾತ್ರ ಗಳಿಸಿತ್ತು. ಮಾರುಕಟ್ಟೆ ತಜ್ಞರು 22, 600 ಕೋಟಿ ರು ಗಳಿಸಬಹುದು ಎಂದು ನಿರೀಕ್ಷಿಸಿದ್ದರು.

ಈ ತ್ರೈಮಾಸಿಕದಲ್ಲಿ ಸಂಸ್ಥೆಯು 1.74 ಬಿಲಿಯನ್ ಡಾಲರ್ ಒಪ್ಪಂದಗಳನ್ನು ಕಂಡಿದೆ. ತ್ರೈಮಾಸಿಕ ವರದಿ ಪ್ರಕಟವಾಗುವ ಸುದ್ದಿ ಬರುತ್ತಿದ್ದಂತೆ ಬಿಎಸ್ಇಯಲ್ಲಿ ಸಂಸ್ಥೆ ಷೇರುಗಳು 6.16 ರಷ್ಟು ಏರಿಕೆ ಕಂಡು 831. 45 ರು ನಂತೆ ವಹಿವಾಟು ನಡೆಸಿತ್ತು.

ಕೊವಿಡ್19 ವಿರುದ್ಧ ಹೋರಾಟದಲ್ಲಿ ಆರ್ಥಿಕ ಪರಿಸ್ಥಿತಿ ಸುಧಾರಣೆ ಕಂಡಿಲ್ಲವಾದ್ದರಿಂದ ಉದ್ಯೋಗಿಗಳಿಗೆ ಸದ್ಯಕ್ಕೆ ಸಂಬಳ ಏರಿಕೆ, ಬಡ್ತಿ ನೀಡಲು ಸಾಧ್ಯವಿಲ್ಲ ಎಂದಿದ್ದ ಇನ್ಫೋಸಿಸ್, ತನ್ನ ನೇಮಕಾತಿ ಪ್ರಕ್ರಿಯೆಯನ್ನು ಮುಂದುವರೆಸುತ್ತಿರುವುದಾಗಿ ಘೋಷಿಸಿದೆ.

English summary

The country's second-largest IT services major Infosys on Wednesday reported a 12.4 per cent rise in consolidated net profit to Rs 4,272 crore for June 2020 quarter.