ಬೆಂಗಳೂರು ಟ್ರಾಫಿಕ್ ಸಮಸ್ಯೆ ಪರಿಹರಿಸಲು 100 ದಿನಗಳ ಗಡುವು ಕೊಟ್ಟ ಡಿಕೆ ಶಿವಕುಮಾರ್‌

Updated: Monday, October 9, 2023, 21:32 [IST]

ಬೆಂಗಳೂರು, ಅಕ್ಟೋಬರ್‌ 09: ಬೆಂಗಳೂರನ್ನು ಕಾಡುತ್ತಿರುವ ಟ್ರಾಫಿಕ್ ಮತ್ತು ಇತರ ನಾಗರಿಕ ಸಮಸ್ಯೆಗಳನ್ನು ಪರಿಹರಿಸಲು ಉಪ ಮುಖ್ಯಮಂತ್ರಿ ಡಿಕೆ ಶಿವಕುಮಾರ್‌ 100 ದಿನಗಳ ಗಡುವನ್ನು ನಿಗದಿಪಡಿಡಿದ್ದಾರೆ.

ಟೆಕ್ ಕಂಪನಿಗಳು, ಅಧಿಕಾರಿಗಳೊಂದಿಗಿನ ಸಭೆಯ ನಂತರ ಅವರು, ಎಲ್ಲಾ ಟ್ರಾಫಿಕ್ ಮತ್ತು ನಾಗರಿಕ ಸಮಸ್ಯೆಗಳನ್ನು ಬಿಬಿಎಂಪಿ ಸಮನ್ವಯತೆಯಿಂದ ಪರಿಹರಿಸಲಾಗುವುದು. ಶಿವಕುಮಾರ್ ಅವರು ಹೊರ ವರ್ತುಲ ರಸ್ತೆ ಕಂಪನಿಗಳ ಸಂಘ (ORRCA), ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (BBMP), ಬೆಂಗಳೂರು ಮೆಟ್ರೋ ರೈಲ್ ಕಾರ್ಪೊರೇಷನ್ ಲಿಮಿಟೆಡ್ (BMRCL), ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ (BWSSB) ಯ ಅಧಿಕಾರಿಗಳೊಂದಿಗೆ ಹೊರ ವರ್ತುಲ ರಸ್ತೆ (ORR) ನಲ್ಲಿರುವ ಟೆಕ್ ಪಾರ್ಕ್‌ಗಳಲ್ಲಿ ಸಭೆಯನ್ನು ಉದ್ದೇಶಿಸಿ ಮಾತನಾಡಿದರು.

ಹೊರ ವರ್ತುಲ ರಸ್ತೆ ಕಂಪನಿಗಳಲ್ಲಿ ಸುಮಾರು 25 ಟೆಕ್ ಪಾರ್ಕ್‌ಗಳು, 10 ಲಕ್ಷ ಐಟಿ ಉದ್ಯೋಗಿಗಳನ್ನು ಹೊಂದಿದೆ. ಇದು ಬಿಬಿಎಂಪಿಯ ಖಾತೆಗೆ ತೆರಿಗೆ ಆದಾಯದ ಸುಮಾರು 35 ಪ್ರತಿಶತವನ್ನು ಆದಾಯ ನೀಡುತ್ತದೆ.

ಈ ಐಟಿ ಕಾರಿಡಾರ್ ಬೆಂಗಳೂರಿಗೆ ಸೇರಿಸುವ ಮೌಲ್ಯ ಮತ್ತು ಬಿಬಿಎಂಪಿಗೆ ಔಟರ್ ರಿಂಗ್ ರೋಡ್ ಸ್ಟ್ರೆಚ್ ಉತ್ಪಾದಿಸುವ ತೆರಿಗೆ ಆದಾಯದ ಪಾಲನ್ನು ನಾವು ಅರ್ಥಮಾಡಿಕೊಂಡಿದ್ದೇವೆ. ಈ ವಿಸ್ತರಣೆಯು ಮೂಲಭೂತ ಮೂಲಸೌಕರ್ಯಕ್ಕೆ ಅರ್ಹವಾಗಿಲ್ಲ. ಈ ಐಟಿ ಕಾರಿಡಾರ್‌ನ ಟ್ರಾಫಿಕ್ ಮತ್ತು ನಾಗರಿಕ ಸಮಸ್ಯೆಗಳನ್ನು ಇನ್ನೂ 100 ದಿನಗಳಲ್ಲಿ ಪರಿಹರಿಸಲು ಮತ್ತು ಕಡಿಮೆ ಮಾಡಲು ಬೆಂಗಳೂರು ನಗರ ಪೊಲೀಸ್, ಬಿಎಂಆರ್‌ಸಿಎಲ್‌ ಮತ್ತು ಬಿಬಿಎಂಪಿ ಬದ್ಧವಾಗಿದೆ ಎಂದು ಉಪ ಮುಖ್ಯಮಂತ್ರಿ ಹೇಳಿದರು.

ಒಆರ್‌ಆರ್‌ ಐಟಿ ಕಾರಿಡಾರ್ ಎದುರಿಸುತ್ತಿರುವ ಸಮಸ್ಯೆಗಳು:

ಹೊರ ವರ್ತುಲ ಕಂಪೆನಿಗಳ ಸಂಘವು ಕೂಡಲೇ ಅಗತ್ಯವಿರುವ ಆರು ಅಗತ್ಯ ಅಂಶಗಳನ್ನು ನೆರವೇರಿಸುವಂತೆ ಮನವಿ ಮಾಡಿದೆ. ಅಲ್ಲದೆ ಅವುಗಳನ್ನು ಪರಿಹರಿಸಲು ಸಲಹೆಗಳನ್ನು ನೀಡಿದೆ. ಆ ಸಲಹೆ ಇಂತಿದೆ.

1. 22 ವರ್ತುಲ ರಸ್ತೆ ಜಾಲಗಳ ಉನ್ನತೀಕರಣ ಮತ್ತು ನಿರ್ವಹಣೆ.
2. ಸರ್ವಿಸ್ ರಸ್ತೆಗಳು, ಫುಟ್‌ಪಾತ್‌ಗಳು, ಬಸ್ ನಿಲ್ದಾಣಗಳ ಉನ್ನತೀಕರಣ ಮತ್ತು ಗುಂಡಿಗಳನ್ನು ಸರಿಪಡಿಸುವುದು.
3. ಅಕ್ರಮ ವಾಹನ ನಿಲುಗಡೆ, ಅತಿಕ್ರಮಣ ಮತ್ತು ಭಾರೀ ಸಾರಿಗೆ ವಾಹನಗಳ ಮೇಲೆ ನಿರ್ಬಂಧ.
4. ಸಂಚಾರ ನಿರ್ವಹಣೆ ಮತ್ತು ರಸ್ತೆ ಕಣ್ಗಾವಲು.
5. ಒಆರ್‌ಆರ್‌ ಮೆಟ್ರೋದ ನಿರ್ಮಾಣ ಟ್ರ್ಯಾಕಿಂಗ್ ಮತ್ತು ಮೊದಲ, ಕೊನೆಯ ಮೈಲಿ ಸಂಪರ್ಕವನ್ನು ಸುಧಾರಿಸುವುದು.
6. ಸಾರ್ವಜನಿಕ ಸಾರಿಗೆ ಮತ್ತು ಹಂಚಿಕೆಯ ಸಾರಿಗೆ ಪರಿಹಾರಗಳ ಮೂಲಕ ಸಂಪರ್ಕವನ್ನು ಹೆಚ್ಚಿಸುವುದು.

ಒಆರ್‌ಆರ್‌ನಲ್ಲಿ ಅಕ್ರಮವಾಗಿ ನಿಲುಗಡೆ ಮಾಡಿದ ವಾಹನಗಳ ಟೋಯಿಂಗ್:

ಬೆಂಗಳೂರು ಸಂಚಾರ ಪೊಲೀಸರು ಅಕ್ರಮ ಪಾರ್ಕಿಂಗ್ ತಡೆಯಲು ಒಆರ್‌ಆರ್ ಐಟಿ ಕಾರಿಡಾರ್‌ಗೆ ಮಾತ್ರ ವಾಹನಗಳ ಟೋಯಿಂಗ್ ಅನ್ನು ಮರು ಪರಿಚಯಿಸಲು ನಿರ್ಧರಿಸಿದ್ದಾರೆ. ಒಆರ್‌ಆರ್‌ನಲ್ಲಿ ಬೆಳಗ್ಗೆ 7 ರಿಂದ ರಾತ್ರಿ 10 ರವರೆಗೆ ಭಾರೀ ವಾಹನಗಳ ಸಂಚಾರವನ್ನು ನಿಷೇಧಿಸಲಾಗಿದೆ. ಅತ್ತಿಬೆಲೆಗೆ ಹೋಗುವ ಭಾರಿ ವಾಹನಗಳಿಗೆ ಪರ್ಯಾಯ ಮಾರ್ಗಗಳನ್ನೂ ಯೋಜಿಸಲಾಗುವುದು ಎಂದು ಬೆಂಗಳೂರು ಪೊಲೀಸ್ ಆಯುಕ್ತ ಬಿ ದಯಾನಂದ ತಿಳಿಸಿದ್ದಾರೆ.

ಅಪ್ಲಿಕೇಶನ್ ಆಧಾರಿತ 'ಜಂಟಿ ಬಸ್ ಸೇವೆ'?

ಆಪ್-ಆಧಾರಿತ ಕ್ಯಾಬ್ ಸೇವೆ ಉಬರ್ ಮಾದರಿ ಸಾರಿಗೆ ಆಯ್ಕೆಗಳನ್ನು ಹೆಚ್ಚಿಸಲು ತನ್ನ ಅಪ್ಲಿಕೇಶನ್ ಮೂಲಕ ಬೆಂಗಳೂರು ಮೆಟ್ರೋಪಾಲಿಟನ್ ಟ್ರಾನ್ಸ್‌ಪೋರ್ಟ್ ಕಾರ್ಪೊರೇಷನ್ (ಬಿಎಂಟಿಸಿ) ಅಥವಾ ಇತರ ಖಾಸಗಿ ನಿರ್ವಾಹಕರ ಸಹಭಾಗಿತ್ವದಲ್ಲಿ ಜಂಟಿ ಬಸ್ ಸೇವೆಯನ್ನು ಪ್ರಾರಂಭಿಸಲು ಪ್ರಸ್ತಾಪಿಸಿದೆ. ಈ ಉಪಕ್ರಮವು ಐಟಿ ಕಾರಿಡಾರ್‌ನಲ್ಲಿ ಸಾರ್ವಜನಿಕ ಸಾರಿಗೆಯನ್ನು ಬಳಸಲು ಜನರನ್ನು ಉತ್ತೇಜಿಸುತ್ತದೆ ಎಂದು ಉಬರ್ ವಕ್ತಾರರು ತಿಳಿಸಿದ್ದಾರೆ. ಉಬರ್ ಅಗ್ರಿಗೇಟರ್ ಪ್ಲಾಟ್‌ಫಾರ್ಮ್‌ನಲ್ಲಿ 10 ಬಸ್‌ಗಳನ್ನು ಪ್ರಾರಂಭಿಸಲು ಪ್ರಸ್ತಾಪಿಸುತ್ತಿದೆ, ಇದು ಕಚೇರಿಗೆ ಹೋಗುವವರಿಗೆ ಸೀಟುಗಳನ್ನು ಕಾಯ್ದಿರಿಸಲು ಮತ್ತು ORR ಸ್ಟ್ರೆಚ್‌ನಲ್ಲಿ ಪ್ರಯಾಣಿಸಲು ಅನುವು ಮಾಡಿಕೊಡುತ್ತದೆ.

ಗುಂಡಿ, ಸರ್ವಿಸ್ ರಸ್ತೆಗಳನ್ನು ಸರಿಪಡಿಸಲು ಒತ್ತು

ಬಿಬಿಎಂಪಿ ಮುಖ್ಯ ಆಯುಕ್ತ ತುಷಾರ್ ಗಿರಿನಾಥ್ ಮಾತನಾಡಿ, ಗುಂಡಿಗಳನ್ನು ಸರಿಪಡಿಸುವುದು, ಫುಟ್‌ಪಾತ್ ಅತಿಕ್ರಮಣಗಳನ್ನು ತೆರವುಗೊಳಿಸುವುದು ಮತ್ತು ಸರ್ವಿಸ್ ರಸ್ತೆಗಳ ನಿರ್ವಹಣೆಗೆ ವಿಶೇಷ ಗಮನ ಹರಿಸಲಾಗುವುದು. ''ಮುಖ್ಯ ಮಾರ್ಗದಲ್ಲಿ ಮೆಟ್ರೋ ಕಾಮಗಾರಿ ಪೂರ್ಣಗೊಳ್ಳುವವರೆಗೆ ಸರ್ವೀಸ್ ರಸ್ತೆಗಳ ಸುಧಾರಣೆಗೆ ಒತ್ತು ನೀಡಲಾಗುವುದು.

ಮುಖ್ಯರಸ್ತೆಯಲ್ಲಿ ನಡೆಯುತ್ತಿರುವ ಮೆಟ್ರೊ ಕಾಮಗಾರಿಯಿಂದಾಗಿ ಸಾಕಷ್ಟು ಸಂಚಾರವನ್ನು ಸರ್ವಿಸ್ ರಸ್ತೆಗಳಿಗೆ ತಿರುಗಿಸಲಾಗಿದೆ. ಸಾರ್ವಜನಿಕರ ಮೇಲೆ ಹೆಚ್ಚಿನ ಪರಿಣಾಮ ಬೀರುವ ಹೆಚ್ಚಿನ ಸಾಂದ್ರತೆಯ ಕಾರಿಡಾರ್‌ಗಳಲ್ಲಿ ರಸ್ತೆ ಮೂಲಸೌಕರ್ಯವನ್ನು ಸುಧಾರಿಸಲು ನಾವು ಆದ್ಯತೆ ನೀಡುತ್ತೇವೆ. ಐದು ವರ್ಷಗಳ ಹೂಡಿಕೆಯ ಚೌಕಟ್ಟಿನೊಂದಿಗೆ, ಮೂಲಸೌಕರ್ಯಗಳ ಅಂತರವನ್ನು ಸಮಗ್ರ ರೀತಿಯಲ್ಲಿ ಪರಿಹರಿಸಲು ನಾವು ಉದ್ದೇಶಿಸಿದ್ದೇವೆ ಎಂದು ಗಿರಿನಾಥ್ ಹೇಳಿದರು.

ಸಾರ್ವಜನಿಕ ಸಾರಿಗೆ ಬಳಸುವಂತೆ ಮನವಿ

ಟ್ರಾಫಿಕ್ ದಟ್ಟಣೆ ಮತ್ತು ಮಾಲಿನ್ಯವನ್ನು ಕಡಿಮೆ ಮಾಡಲು ಟೆಕ್ಕಿಗಳು ವಾರಕ್ಕೆ ಎರಡು ಬಾರಿ ಸಾರ್ವಜನಿಕ ಸಾರಿಗೆಯನ್ನು ಆಯ್ಕೆ ಮಾಡಿಕೊಳ್ಳಬೇಕು. ಹೆಚ್ಚುವರಿಯಾಗಿ, ಪರ್ಪಲ್ ಲೈನ್ ಮೆಟ್ರೋದ ಪ್ರಾರಂಭವು ORR IT ಕಾರಿಡಾರ್‌ನಲ್ಲಿ ದಟ್ಟಣೆಯನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ ಎಂದು ಸ್ಟೇಟ್ ಇನ್‌ಸ್ಟಿಟ್ಯೂಟ್ ಫಾರ್ ದಿ ಟ್ರಾನ್ಸ್‌ಫರ್ಮೇಷನ್ ಆಫ್ ಕರ್ನಾಟಕ (ಎಸ್‌ಐಟಿಕೆ) ಉಪಾಧ್ಯಕ್ಷ ಪ್ರೊ.ರಾಜೇಗೌಡ ಒತ್ತಾಯಿಸಿದರು.