ಎಟಿಎಂ ಕಳ್ಳರ ಬಂಧನಕ್ಕೆ ನೆರವಾದ ಬ್ಯಾಂಕಿನ ಕಂಟ್ರೋಲ್ ರೂಮ್
ಬೆಂಗಳೂರು, ಜನವರಿ 28: ಎಟಿಎಂ ದೋಚಲು ಯತ್ನಿಸಿದ್ದ ಆ ಕಳ್ಳರಿಬ್ಬರು ಸಿಸಿಟಿವಿಗೆ ಚ್ಯೂಯಿಂಗ್ ಗಮ್ ಅಂಟಿಸಿದ್ದರು, ತಲೆಗೆ ಹೆಲ್ಮೆಟ್ ಧರಿಸಿದ್ದರು ಆದರೆ, ಬ್ಯಾಂಕಿನ ಕಂಟ್ರೋಲ್ ಸಿಬ್ಬಂದಿ ಸಮಯೋಚಿತ ನಡೆಯಿಂದ ಕಳ್ಳರನ್ನು ಬೆಂಗಳೂರಿನ ಪೊಲೀಸರು ಬಂಧಿಸಿದ್ದಾರೆ.
ಮೈಸೂರು ರಸ್ತೆಯ ಎಟಿಎಂ ಕಿಯೋಸ್ಕ್ ನಲ್ಲಿರುವ ಸಿಸಿಟಿವಿ ಮಸುಕಾಗಿದ್ದು, ಮುಂಬೈನಲ್ಲಿರುವ ಎಸ್ಬಿಎಂ ಕಂಟ್ರೋಲ್ ರೂಮ್ ಗೆ ಗೊತ್ತಾಗಿದೆ. ಈ ಬಗ್ಗೆ ತಕ್ಷಣವೇ ಪೊಲೀಸರಿಗೆ ಅಲರ್ಟ್ ಮಾಡಿದ್ದಾರೆ. ಸಿಸಿಟಿವಿಯಲ್ಲಿ ದೃಶ್ಯಗಳು ಸೆರೆಯಾಗಬಾರದು ಎಂದು ಚ್ಯೂಯಿಂಗ್ ಗಮ್ ಅಂಟಿಸಿದ್ದರು, ಮತ್ತೊಂದೆಡೆ ಮಸಿ ಬಳಿದಿದ್ದರು.
ಸುಮಾರು 13 ಲಕ್ಷ ರು ಕದಿಯುವ ಇರಾದೆಯಿಂದ ಎಟಿಎಂನೊಳಗೆ ನುಗ್ಗಿದ್ದವರ ಪೈಕಿ ಒಬ್ಬ ಕುಸ್ತಿಪಟು ಹರ್ಷ್ ಅರೊರ್ ಮತ್ತೊಬ್ಬ ಸಮರ್ ಜೋತ್ ಸಿಂಗ್ ಇಬ್ಬರು ಈಗ ಪೊಲೀಸರ ಅತಿಥಿಯಾಗಿದ್ದಾರೆ.
"ಮೈಸೂರು ರಸ್ತೆ ಬಿಎಚ್ ಇಎಲ್ ಬಳಿ ಇರುವ ಎಸ್ಬಿಎಂ ಎಟಿಎಂ ಕಿಯೋಸ್ಕ್ ನಲ್ಲಿ ಏನೋ ಅಚಾತುರ್ಯ ನಡೆಯುತ್ತಿರುವ ಬಗ್ಗೆ ಭಾನುವಾರ ಮುಂಜಾನೆ 1:20ಕ್ಕೆ ನಮಗೆ ಮುಂಬೈ ಕಂಟ್ರೋಲ್ ರೂಮ್ ನಿಂದ ಅಲರ್ಟ್ ಬಂದಿತ್ತು. ಈ ಇಬ್ಬರು 1.20 ರಿಂದ 1.50 ರ ಅವಧಿಯಲ್ಲಿ ಕಳ್ಳತನದ ಯತ್ನ ನಡೆಸಿದ್ದರು. ಹೆಲ್ಮೆಟ್ ಧರಿಸಿ, ಕೆಮರಾಗಳಿಗೆ ಮಸಿ ಬಳಿದಿದ್ದರು. ಜೆಜೆ ನಗರ ಹಾಗೂ ರಾಜರಾಜೇಶ್ವರಿ ನಗರ ವ್ಯಾಪ್ತಿಯ ಹೊಯ್ಸಳ ವಾಹನಗಳು ತಕ್ಷಣವೇ ಕಾರ್ಯತತ್ಪರರಾಗಿ ಸ್ಥಳಕ್ಕೆ ತೆರಳಿದರೂ ಎಟಿಎಂ ಪತ್ತೆಯಾಗಿರಲಿಲ್ಲ.
ಚಂದ್ರಾಲೇಔಟ್ ಇನ್ಸ್ ಪೆಕ್ಟರ್ ಬ್ರಿಜೇಶ್ ಮ್ಯಾಥ್ಯೂ ಅವರು ರಾತ್ರಿವೇಳೆ ಗಸ್ತು ತಿರುಗುವಾಗ ಬಿಎಚ್ ಇಎಲ್ ಬಳಿಯ ಎಟಿಎಂನಲ್ಲಿ ಹೊಗೆ ಕಾಣಿಸಿಕೊಂಡಿತ್ತು. ತಕ್ಷಣವೇ ಸಿಬ್ಬಂದಿಗಳನ್ನು ಕರೆದುಕೊಂಡು ಎಟಿಎಂ ಬಳಿ ತೆರಳಿ ದಾಳಿ ನಡೆಸಿದಾಗ ಇಬ್ಬರು ರೆಡ್ ಹ್ಯಾಂಡ್ ಆಗಿ ಸಿಕ್ಕಿಬಿದ್ದಿದ್ದಾರೆ. ಈ ಸಂದರ್ಭದಲ್ಲಿ ಇಬ್ಬರು ಸಿಬ್ಬಂದಿ ಮೇಲೆ ಕಬ್ಬಿಣದ ರಾಡ್ ನಿಂದ ಹಲ್ಲೆ ಮಾಡಲು ಯತ್ನಿಸಿದ್ದರಿಂದ ಕಾನ್ಸ್ ಟೇಬಲ್ಸ್ ಗೆ ಗಾಯವಾಗಿವೆ ಎಂದು ಪಶ್ಚಿಮ ವಲಯ ಡಿಸಿಪಿ ರಮೇಶ್ ಬನೋಥ್ ಹೇಳಿದರು.
ಇತ್ತೀಚೆಗೆ ಪರಪ್ಪನ ಅಗ್ರಹಾರದಲ್ಲಿ ಎಟಿಎಂ ದೋಚಿದ್ದ ಈ ಜೋಡಿ, ಇನ್ನೆರಡು ಕಡೆಗಳಲ್ಲಿ ನಡೆಸಿದ ಯತ್ನ ವಿಫಲವಾಗಿತ್ತು. ಯೂಟ್ಯೂಬ್ ವಿಡಿಯೋ ನೋಡಿಕೊಂಡು ಎಟಿಎಂ ದೋಚುವ ಯೋಜನೆ ಹಾಕಿಕೊಂಡಿದ್ದರು ಎಂದು ಡಿಸಿಪಿ ರಮೇಶ್ ತಿಳಿಸಿದರು.
Click it and Unblock the Notifications
Sign in with Google