ಬೆಂಗಳೂರು ಪಿ.ಜಿಗಳಿಗೆ ದಿಢೀರ್‌ ಶಾಕ್‌ ನೀಡಿದ ಬಿಬಿಎಂಪಿ!

ಬೆಂಗಳೂರಿನಲ್ಲಿ ಪಿಜಿ (paying guest)ಗಳಿಗೆ ಬಿಬಿಎಂಪಿ ಬೀಗ ಜಡಿತಿದೆ. ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ)ಯ ಅಧಿಕಾರಿಗಳು ಗುರುವಾರ ಫೀಲ್ಡ್‌ಗೆ ಇಳಿದಿದ್ದಾರೆ. ಏಕಾಏಕಿ ಫಿಲ್ಡ್‌ಗೆ ಇಳಿದ ಬಿಬಿಎಂಪಿಯ ಅಧಿಕಾರಿಗಳು ಹಲವು ಪಿಜಿಗಳನ್ನು ಲಾಕ್‌ ಮಾಡಿ ಬಿಸಾಕಿದ್ದಾರೆ. ಬಿಬಿಎಂಪಿಯ ಅಧಿಕಾರಿಗಳು ಪಿಜಿ ಕ್ಲೋಸ್‌ ಮಾಡಿಸ್ತಿರೋದು ಯಾಕೆ ಎನ್ನುವ ಕಂಪ್ಲೀಟ್‌ ಡೀಟೆಲ್ಸ್‌ ಇಲ್ಲಿದೆ.

ಬೆಂಗಳೂರಿನಲ್ಲಿ ಪಿಜಿಗಳದ್ದೇ ಕಾರುಬಾರು. ಹೊರ ಊರುಗಳಿಂದ ಬೆಂಗಳೂರಿಗೆ ಬರುವವರು ಮೊದಲು ಹುಡುಕುವುದೇ ಬೆಂಗಳೂರಿನಲ್ಲಿ ಪಿಜಿಗಳನ್ನು. ಇದೀಗ ಬಿಬಿಎಂಪಿಯು ಹಲವು ಪಿಜಿಗಳನ್ನು ಬಂದ್‌ ಮಾಡಿದೆ. ಇದಕ್ಕೆ ಬಿಬಿಎಂಪಿ ನೀಡುರುವ ಕಾರಣ ಭಿನ್ನವಾಗಿದೆ. ಬೆಂಗಳೂರಿನಲ್ಲಿ ಸಾವಿರಾರು ಪಿಜಿಗಳಿವೆ. ಪಿಜಿಗಳಲ್ಲಿ ಸೌಕರ್ಯ ಸಿಗದೆ ಇರುವುದು ಹಾಗೂ ಊಟದ ವ್ಯವಸ್ಥೆ ಸರಿಯಾಗಿ ಇಲ್ಲದೆ ಇರುವ ಬಗ್ಗೆ ಹಲವು ದೂರುಗಳಿವೆ. ಇದೀಗ ಬೆಂಗಳೂರಿನ ಸಾಲು ಸಾಲು ಪಿಜಿಗಳಿಗೆ ಬಿಬಿಎಂಪಿ ಅಧಿಕಾರಿಗಳ ದಂಡು ಭೇಟಿ ನೀಡಿ ಬೀಗ ಜಡಿಯುತ್ತಿದೆ.

ಬೆಂಗಳೂರಿನಲ್ಲಿ ಒಟ್ಟು ಎಂಟು ವಲಯಗಳಿವೆ. ಪಾಲಿಕೆ ವ್ಯಾಪ್ತಿಯಲ್ಲಿ ಎಂಟು ವಲಯಗಳನ್ನು ವಿಂಗಡಿಸಿ ಕಾರ್ಯ ನಿರ್ವಹಣೆ ಮಾಡಲಾಗುತ್ತಿದೆ. ಇದೀಗ ಗುರುವಾರ ಫೀಲ್ಡ್‌ಗೆ ಇಳಿದಿರುವ ಬಿಬಿಎಂಪಿಯ ಅಧಿಕಾರಿಗಳು ಪಾಲಿಕೆ ವ್ಯಾಪ್ತಿಯ ಎಲ್ಲಾ 8 ವಲಯಗಳಲ್ಲಿ ದಿಢೀರ್‌ ಕಾರ್ಯಾಚರಣೆಗೆ ಇಳಿದಿದ್ದಾರೆ. ಪಾಲಿಕೆಯ ಆರೋಗ್ಯಾಧಿಕಾರಿಗಳ ನೇತೃತ್ವದಲ್ಲಿ ಎಲ್ಲಾ ಅಧಿಕೃತ ಹಾಗೂ ಅನಧಿಕೃತ ಪಿ.ಜಿಗಳಿಗೆ ಭೇಟಿ ನೀಡಿ ಪಾಲಿಕೆ ನೀಡುವ ಮಾರ್ಗಸೂಚಿಗಳನ್ನು ಪಾಲಿಸಲಾಗುತ್ತಿದೆಯೇ ಇಲ್ಲವೇ ಎನ್ನುವ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತಿದೆ.

ಬೆಂಗಳೂರಲ್ಲಿ ಅಧಿಕೃತ ಪಿಜಿಗಳ ಸಂಖ್ಯೆ ಎಷ್ಟು: ಬೆಂಗಳೂರಿನಲ್ಲಿ ಸಾವಿರಾರು ಪಿ.ಜಿಗಳು ಇವೆ. ಆದರೆ, ಬಿಬಿಎಂಪಿ ಗುರುತಿಸಿರುವ ಅಧಿಕೃತ ಪಿ.ಜಿಗಳ ಸಂಖ್ಯೆ 2193 ಅಧಿಕೃತ ಪಿ.ಜಿ.ಗಳು. ಇವುಗಳಲ್ಲಿ 1578 ಪಿ.ಜಿ.ಗಳು ಪಾಲಿಕೆ ನೀಡಿರುವ ಮಾರ್ಗಸೂಚಿಗಳನ್ನು ಪಾಲಿಸುತ್ತಿವೆ ಎಂದು ಬಿಬಿಎಂಪಿಯ ಅಧಿಕಾರಿಗಳು ಹೇಳಿದ್ದಾರೆ. ಇನ್ನುಳಿದ 615 ಪಿ.ಜಿ.ಗಳು ಮಾರ್ಗಸೂಚಿಗಳನ್ನು ಅನುಸರಿಸುತ್ತಿರುವುದಿಲ್ಲ. ಮಾರ್ಗಸೂಚಿ ಗಳನ್ನು ಅನುಸರಿಸದ ಪಿ.ಜಿ.ಗಳನ್ನು ಸೇರಿ ಇಲ್ಲಿಯವರೆಗೆ ಬರೋಬ್ಬರಿ 1011 ಅಧಿಕೃತ ಪಿ.ಜಿ. ಗಳಿಗೆ ಪಾಲಿಕೆಯಿಂದ ನೋಟಿಸ್‌ ಜಾರಿ ಮಾಡಲಾಗಿದೆಯಂತೆ.

ಬೆಂಗಳೂರಿನಲ್ಲಿವೆ 2320 ಅನಧಿಕೃತ ಪಿಜಿಗಳು: ಇನ್ನು ಬೆಂಗಳೂರಿನಲ್ಲಿ ಅಧಿಕೃತ ಪಿ.ಜಿಗಳಿಗಿಂತ ಅನಧಿಕೃತ ಪಿ.ಜಿಗಳ ಸಂಖ್ಯೆಯೇ ಹೆಚ್ಚಾಗಿದೆ ಎನ್ನುವ ಅಂಶವನ್ನು ಬಿಬಿಎಂಪಿಯ ಅಧಿಕಾರಿಗಳೇ ತಿಳಿಸಿದ್ದಾರೆ. ಬಿಬಿಎಂಪಿ ವ್ಯಾಪ್ತಿಯಲ್ಲಿ ಒಟ್ಟು 2320 ಅನಧಿಕೃತ ಪಿ.ಜಿ.ಗಳಿವೆ. ಇವುಗಳಲ್ಲಿ 1674 ಪಿ.ಜಿ.ಗಳು ಮಾರ್ಗಸೂಚಿಗಳಲ್ಲಿ ಸೂಚಿಸಿರುವ ಅಂಶಗಳನ್ನು ಪಾಲಿಸುತ್ತಿವೆ. ಆದರೆ, 646 ಪಿ.ಜಿ.ಗಳು ಮಾರ್ಗಸೂಚಿಗಳನ್ನು ಅನುಸರಿಸುತ್ತಿಲ್ಲ. ಮಾರ್ಗಸೂಚಿಗಳನ್ನು ಅನುಸರಿಸದ ಪಿ.ಜಿ.ಗಳನ್ನು ಸೇರಿಸಿದಂತೆ ಇಲ್ಲಿಯವರೆಗೆ 2320 ಅಧಿಕೃತ ಪಿ.ಜಿಗಳಿಗೆ ನೋಟೀಸ್‌ ಬಿಸಿ ಮುಟ್ಟಿಸಲಾಗಿದೆ.

ಈ ಕಾರಣಕ್ಕೆ ಬಿತ್ತು 21 ಪಿ.ಜಿಗಳಿಗೆ ಬೀಗ: ಬೃಹತ್‌ ಬೆಂಗಳೂರು ಮಹಾನಗರ ಪಾಲಿಕೆಯಿಂದ ಉದ್ದಿಮೆ ಪರವಾನಿಗೆ ಪಡೆಯದೇ ಅನಧಿಕೃತವಾಗಿ ನಡೆಸುತ್ತಿರುವ ಪಿಜಿಗಳಿಗೆ ಬಿಬಿಎಂಪಿ ಬಿಸಿ ಮುಟ್ಟಿಸಿದೆ. ಅಲ್ಲದೇ ಮಾರ್ಗಸೂಚಿಗಳನ್ನು ಪಾಲಿಸದ ಪಿ.ಜಿ ಉದ್ದಿಮೆಗಳಿಗೆ ಹಾಗೂ ವಾರ್ನಿಂಗ್‌ ನೀಡಿದ್ದರೂ ಪಾಲಿಸದ ಬಗ್ಗೆ ಪಾಲಿಕೆ ಗರಂ ಆಗಿದೆ. ಮೂರು ಬಾರಿ ನೋಟಿಸ್‌ನೀಡಿದ ಮೇಲೂ ಆ ಮಾರ್ಗಸೂಚಿಗಳನ್ನು ಪಾಲಿಸದ ಪಿಜಿಗಳಿಗೆ ಶಾಕ್‌ ನೀಡಲಾಗಿದೆ. ಹೀಗಾಗಿ, ಈ ಪಿಜಿಗಳ ಮೇಲೆ ಬಿಬಿಎಂಪಿ ಕಾಯ್ದೆ 2020ರ ಸೆಕ್ಷನ್ 305 ಮತ್ತು 308ರಡಿಯಲ್ಲಿ ತಕ್ಷಣದಿಂದ ಮುಚ್ಚಿಸಲಾಗಿದೆ ಎಂದು ಬಿಬಿಎಂಪಿ ಹೇಳಿದೆ. ಇಲ್ಲಿಯವರೆಗೆ ಬಿಬಿಎಂಪಿಯು 1 ಅಧಿಕೃತ ಪಿಜಿ ಹಾಗೂ 20 ಅನಧಿಕೃತ ಸೇರಿದಂತೆ ಒಟ್ಟು 21 ಪಿಜಿಗಳಿಗೆ ಬೀಗ ಹಾಕಲಾಗಿದೆ.

English summary

BBMP has suddenly closed many PGs in Bengaluru. Here's why.