ರಾಹುಲ್ ಕ್ಲರ್ಕ್ ಆಗೋಕೂ ಅನರ್ಹ : ಜೇಠ್ಮಲಾನಿ

ಮಡಿಕೇರಿ, ಫೆ. 15: ಮುಂದಿನ ಪ್ರಧಾನಿ ಅಭ್ಯರ್ಥಿ ಎಂದು ಬಿಂಬಿಸಲಾಗುತ್ತಿರುವ, ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿ ವಿರುದ್ಧ ಬಿಜೆಪಿ ರಾಜ್ಯಸಭಾ ಸದಸ್ಯ ರಾಮ್ ಜೇಠ್ಮಲಾನಿ ವಾಗ್ದಾಳಿ ನಡೆಸಿದ್ದಾರೆ. ಪ್ರಧಾನಿ ಆಗಬಯಸಿರುವ ರಾಹುಲ್ ಗಾಂಧಿಯನ್ನು ನನ್ನ ಕಚೇರಿಯ ಕ್ಲರ್ಕ್ ಆಗಿಯೂ ಇಟ್ಟುಕೊಳ್ಳುವುದಿಲ್ಲ ಎಂದು ವ್ಯಂಗ್ಯವಾಡಿದ್ದಾರೆ.

ಮಡಿಕೇರಿ ಪ್ರವಾಸದಲ್ಲಿರುವ ರಾಮ್ ಜೇಠ್ಮಲಾನಿ ಸುದ್ದಿಗಾರರೊಂದಿಗೆ ಮಾತನಾಡಿ, ರಾಹುಲ್ ಗಾಂಧಿಯನ್ನು ಯಾರು ಕ್ಲರ್ಕ್ ಆಗಿಯೂ ನೇಮಿಸಿಕೊಳ್ಳುವುದಿಲ್ಲ. ಅಂತಹವರನ್ನು ಕಾಂಗ್ರೆಸ್ ಪ್ರಧಾನಿ ಅಭ್ಯರ್ಥಿ ಎಂದು ಬಿಂಬಿಸುತ್ತಿದೆ ಎಂದು ಗುರುವಾರ ಕುಹಕವಾಡಿದರು. ರಾಹುಲ್ ಗಾಂಧಿಗೆ ಪ್ರಧಾನಿಯಾಗುವ ಯಾವ ಅರ್ಹತೆ ಇದೆ? ಎಂದು ಪ್ರಶ್ನಿಸಿದರು.

ಕೇಂದ್ರ ಸರ್ಕಾರದ ಆರ್ಥಿಕ ನೀತಿಯ ವಿರುದ್ದವೂ ಅಸಮಾಧಾನ ವ್ಯಕ್ತಪಡಿಸಿದ ಅವರು, ಸ್ವಿಸ್ ಬ್ಯಾಂಕ್ ನಲ್ಲಿ ಕಪ್ಪು ಹಣ ಹೊಂದಿರುವ ಜನರ ಪಟ್ಟಿಯನ್ನು ಜರ್ಮನಿ, ಫ್ರಾನ್ಸ್, ಇಟಲಿ ಮುಂತಾದ ದೇಶಗಳು ಬಹಿರಂಗಪಡಿಸಿವೆ ಎಂದು ವಾಗ್ದಾಳಿ ಮಾಡಿದರು.

ಆರ್ಥಿಕ ತಜ್ಞರಾದ ಪ್ರಧಾನಿ ಡಾ. ಮನಹೋಹನ್ ಸಿಂಗ್ ಸರ್ಕಾರಕ್ಕೆ ಏಕೆ ಕಪ್ಪು ಹಣ ಹೊಂದಿರುವ ವ್ಯಕ್ತಿಗಳ ಪಟ್ಟಿ ಬಿಡುಗಡೆ ಮಾಡಲು ಸಾಧ್ಯವಾಗಿಲ್ಲ. ಕಾಂಗ್ರೆಸ್‌ದು ಶುದ್ಧಹಸ್ತವೇ ಆಗಿದ್ದರೆ ಕಪ್ಪುಹಣ ಹೊಂದಿರುವ ವ್ಯಕ್ತಿಗಳ ಪಟ್ಟಿ ಬಿಡುಗಡೆ ಮಾಡುವಂತೆ ಅವರು ಸವಾಲು ಹಾಕಿದರು.

English summary

BJP Rajya Sabha member Ram Jethmalani lambasted Congress vice-president Rahul Gandhi in Madikeri on Thursday. He made mockery of Rahul's PM candidature by saying he would not want to appoint him as clert for his office. He challenged Congress to expose names ot those who have black money in Swiss Bank.