ನರೇಂದ್ರ ಮೋದಿಗೆ ಪಾಕಿಸ್ತಾನದ ಆತ್ಮೀಯ ಆಹ್ವಾನ!

By Srinath

Published: Sunday, December 11, 2011, 13:45 [IST]

ಅಹಮದಾಬಾದ್‌, ಡಿ.11: ಯಾರು ಹೇಳಿದ್ದು ಗುಜರಾತ್‌ ಮುಖ್ಯಮಂತ್ರಿ ನರೇಂದ್ರ ಮೋದಿ ಅವರು ಮುಸ್ಲಿಮರ ಅದೂ ಪಾಕಿಸ್ತಾನದ ಕಡುವಿರೋಧಿ ಎಂದು!? ಪಾಕಿಸ್ತಾನದಂತಹ ಪಾಕಿಸ್ತಾನವೇ ಮೋದಿಗೆ ಈಗ ಮುಕ್ತ ಆಹ್ವಾನ ನೀಡಿದೆ. ಮೊನ್ನೆಯಷ್ಟೇ ಚೀನಾದಲ್ಲಿ ಸೂರತ್ತಿನ ವಜ್ರದಂತೆ ಮಿಂಚಿದ್ದ ಮೋದಿ, ಇದೀಗ ಕರಾಚಿಗೆ ಹೊರಟು ನಿಂತಿದ್ದಾರೆ. 'ಮೋದಿಯ ಅಭಿವೃದ್ಧಿ ಮಂತ್ರ ಬೇಕು; ಆದರೆ ಮೋದಿ ಬೇಡ' ಎಂದು ಮೋದಿಗೆ ವೀಸಾ ನಿರಾಕರಿಸುತ್ತಿರುವ ಅಮೆರಿಕ ಇದರಿಂದ ಪಾಠ ಕಲಿಯಬೇಕಿದೆ.

ಶನಿವಾರ ಅಹಮದಾಬಾದಿಗೆ ಬಂದಿಳಿದ ಕರಾಚಿಯ ವಾಣಿಜ್ಯೋದ್ಯಮಿಗಳು (KCCI) 'ಬನ್ನಿ ನಮ್ಮೂರಿಗೂ' ಎಂದು ಮೋದಿಗೆ ಆಮಂತ್ರಣವಿತ್ತಿದ್ದಾರೆ. 'ನಮಗೆ ಗುಜರಾತ್ ಮಾದರಿಯ ಅಭಿವೃದ್ಧಿ ಬೇಕಾಗಿದೆ. ಬನ್ನಿ, ನಮ್ಮ ಕಾರ್ಪೊರೇಟ್ ಉದ್ಯಮಿಗಳೊಂದಿಗೆ ನಿಮ್ಮ ಅಭಿವೃದ್ಧಿ ಮಂತ್ರ ಬೋಧಿಸಿ' ಎಂದು ಪಾಕ್ ಉದ್ಯಮಿಗಳು ಮೋದಿ ಅವರನ್ನು ಕೋರಿದ್ದಾರೆ. ಮೋದಿ ಪಾಕ್ ಆಹ್ವಾನವನ್ನು ಒಪ್ಪಿಕೊಂಡಿದ್ದು, ಸದ್ಯದಲ್ಲೇ ಕರಾಚಿಗೆ ತೆರಳಲಿದ್ದಾರೆ. ದಿನಾಂಕ ಇನ್ನಷ್ಟೇ ನಿಗದಿಯಾಗಬೇಕಿದೆ.

Published On December 11, 2011