ಕಾರು ಚಲಾಯಿಸಿದ ತಪ್ಪಿಗೆ ಸೌದಿ ಮಹಿಳೆಗೆ 10 ಛಡಿಯೇಟು

ರಿಯಾದ್, ಸೆ. 28 : ವಾಹನ ಚಾಲನಾ ನಿಷೇಧವನ್ನು ಉಲ್ಲಂಘಿಸಿ ಕಾರು ಚಲಾಯಿಸಿದ ತಪ್ಪಿಗೆ ಸೌದಿ ಅರೇಬಿಯಾದ ಮುಸ್ಲಿಂ ಮಹಿಳೆಗೆ ಪ್ರಾದೇಶಿಕ ನ್ಯಾಯಾಲಯವೊಂದು 10 ಛಡಿ ಏಟು ಶಿಕ್ಷೆ ವಿಧಿಸಿ ಆದೇಶ ಹೊರಡಿಸಿದೆ.

ಶೈಮಾ ಘಸ್ಸಾನಿಯಾ ಶಿಕ್ಷೆಗೆ ಒಳಗಾದ ಮಹಿಳೆ. ಆಕೆ ಸರಕಾರದ ಅನುಮತಿಯಿಲ್ಲದೆ ಕಾರು ಚಲಾಯಿಸಿದ ಅಪರಾಧ ಎಸಗಿದ್ದಾಳೆ ಎಂದು ಕೋರ್ಟ್ ಫರ್ಮಾನು ಹೊರಡಿಸಿದೆ. ಕಾರು ಚಲಾಯಿಸುವ ಹಕ್ಕು ಕಸಿದುಕೊಳ್ಳುವಲ್ಲಿ ಮೌಲ್ವಿಗಳ ಕುಮ್ಮಕ್ಕು ಇದೆ ಎನ್ನಲಾಗಿದೆ.

ಆಶ್ಚರ್ಯಕರ ಸಂಗತಿಯೆಂದರೆ, 2015ರಲ್ಲಿ ನಡೆಯಲಿರುವ ಚುನಾವಣೆಯಲ್ಲಿ ಮಹಿಳೆಯರಿಗೆ ಮತ ಚಲಾಯಿಸುವ ಹಕ್ಕು ನೀಡಿದ ಎರಡು ದಿನಗಳಲ್ಲಿಯೇ ಈ ಶಿಕ್ಷೆ ಹೊರಬಿದ್ದಿದೆ. ಅನುಮತಿಯಿಲ್ಲದೆ ಕಾರು ಚಲಾಯಿಸಿದ ಆರೋಪವನ್ನು ಅನೇಕ ಮಹಿಳೆಯರ ಮೇಲೆ ಹೊರಿಸಲಾಗಿದೆ.

ಕಳೆದ ಜೂನ್ ತಿಂಗಳಲ್ಲಿ, ತಮಗೆ ಸ್ವತಂತ್ರವಾಗಿ ಕಾರು ಚಲಾಯಿಸುವ ಹಕ್ಕು ಮತ್ತು ಮತ ಚಲಾವಣೆಯ ಹಕ್ಕು ನೀಡಬೇಕು ಎಂದು ಸೌದಿ ಮಹಿಳೆಯರು 'women2drive' ಎಂಬ ಅಭಿಯಾನದ ಮುಖಾಂತರ ಬೀದಿಗೆ ಇಳಿದಿದ್ದರು.

English summary

A saudi woman has been sentenced with 10 lashes for violating ban on driving. Women are not allowed to drive any vehicle without taking permission from the govt. Women have been fighting against this social evil.