ವೀಕೆಂಡ್ ಮೂಡಿನಲ್ಲಿ ಕೈಬೀಸಿ ಕರೆಯುತಿದೆ 'ಚಿತ್ರ ಸಂತೆ'

ಬೆಂಗಳೂರು, ಜೂನ್ 18: ಕುಮಾರ ಕೃಪಾ ರಸ್ತೆಯಲ್ಲಿರುವ ಚಿತ್ರಕಲಾ ಪರಿಷತ್‌ನಲ್ಲಿ ಸೃಜನಶೀಲ ಮನಸುಗಳದ್ದೇ ಕಾರುಬಾರು. ಇದಕ್ಕೆ ಪೂರಕವಾದ ವಾತಾವರಣ ಅಲ್ಲಿನದು. ಗಿಡ, ಮರ, ಬಂಡೆ, ಹುಲ್ಲಿನ ಹಾಸು, ಮನಸಿಗೆ ಮುದ ನೀಡುವ ಕಲಾಕೃತಿಗಳು. ನಗರದ ಗಜಿಬಿಜಿಯ ನಡುವೆಯೂ ಸದಾ ಮೌನಿ ಅದು.

ಆದರೆ, ಸಿಕೆಪಿಯಲ್ಲೀಗ ಗಿಜಿಗಿಜಿ. ಕೊಳ್ಳುವವರ ಉತ್ಸಾಹ, ಮಾರುವವರ ಆತುರ, ಕೊಂಡು-ಕೊಳ್ಳುವಿಕೆ ನಡುವಿನ ಚೌಕಸಿಯ ತೆಳುವಾದ ಗೆರೆ. ಹೌದು ಇಲ್ಲೀಗ ಚಿತ್ರ ಸಂತೆಯ ಸಂಭ್ರಮ. ಇದು ಮಾಮೂಲಿ ಸಂತೆಯಲ್ಲ. ಇದನ್ನೊಮ್ಮೆ ಸುತ್ತಿದರೆ ಸಿಗುವ ಆನಂದವೇ ಬೇರೆ.

ಭಾರತದ ಅನೇಕ ರಾಜ್ಯಗಳ ದರ್ಶನ ಮಾಡಿಸುತ್ತದೆ ಈ ಸಂತೆ. ಇಲ್ಲಿ ಸುಮಾರು 27 ರಾಜ್ಯಗಳ ಕಲೆಯ ಅನಾವರಣಗೊಂಡಿದೆ. 140ಕ್ಕೂ ಅಧಿಕ ಮಳಿಗೆಗಳಲ್ಲಿ ಇವುಗಳ ಪ್ರದರ್ಶನ ಮತ್ತು ಮಾರಾಟವೂ ಇದೆ. ಸಂಪೂರ್ಣ ಸಂಸ್ಥೆ ಈ ಬಾರಿ ಇದರ ನೇತೃತ್ವ ವಹಿಸಿದೆ. ಈಗಾಗಲೇ ಆರಂಭವಾಗಿರುವ 9ನೇ ವಾರ್ಷಿಕ ಚಿತ್ರ ಸಂತೆ ಜೂನ್‌ 27ರ ತನಕ ಮುಂದುವರೆಯಲಿದೆ. ಬೆಳಿಗ್ಗೆ 10 ರಿಂದ ರಾತ್ರಿ 8ರ ತನಕ ನಿರಂತರ.

English summary

For Bangaloreans who are on week-end mood here is your pick! Yet another chitra santhe at Karnataka Chitrakala Parishad campus is arranged (upto June 27). Hundreds of stalls are allocated to various artists from across the country. These stalls are spread throughout the stretch of Kumara Krupa road and its adjoining streets.