ಖಾಸಗಿ ಹಾಲು ಲೀಟರ್ ಗೆ 3 ರುಪಾಯಿ ಏರಿಕೆ

ಬೆಂಗಳೂರು, ಮೇ 27: ಖಾಸಗಿ ಹಾಲು ಸರಬರಾಜು ಕಂಪನಿಗಳು ಲೀಟರ್ ಹಾಲಿಗೆ ಮೂರು ರುಪಾಯಿ ಹೆಚ್ಚಳ ಮಾಡಿವೆ. ಹೆರಿಟೇಜ್, ದೊಡ್ಲ, ತಿರುಮಲ ಸೇರಿದಂತೆ ಖಾಸಗಿ ಕಂಪನಿಗಳು ಈ ಏರಿಕೆ ಮಾಡಿವೆ. ಹೆರಿಟೇಜ್ ಮೇ 16ರಿಂದಲೇ ದರ ಏರಿಕೆ ಮಾಡಿದ್ದರೆ ದೊಡ್ಲ ಮತ್ತು ತಿರುಮಲ ಮೇ 26ರಿಂದ ಹೆಚ್ಚಿಸಿವೆ.

ಪ್ರಸ್ತುತ ನಂದಿನಿ ಸಾಮಾನ್ಯ ಹಾಲು ಲೀಟರ್ ಗೆ 21 ರು. ಇದ್ದರೆ ಖಾಸಗಿ ಹಾಲಿನ ದರ 27 ರು. ಆಗಿದೆ. ಫೆಬ್ರವರಿ 14ರಂದು ಕೆಎಂಎಫ್ ನಂದಿನಿ ಹಾಲಿನ ದರ ಲೀಟರ್ ಗೆ 2 ರುಪಾಯಿ ಹೆಚ್ಚಿಸಿತ್ತು. ಅದರ ಹಿಂದೆಯೇ ಖಾಸಗಿ ಕಂಪನಿಗಳೂ 2 ರು. ಹೆಚ್ಚಳ ಮಾಡಿದ್ದವು.

ನಂದಿನಿ ಹಾಲು ನಗರದಲ್ಲಿ ಪ್ರತಿದಿನ ಸುಮಾರು 15 ಲಕ್ಷ ಲೀಟರ್, ರಾಜ್ಯಾದ್ಯಂತ 28 ಲಕ್ಷ ಲೀಟರ್ ಹಾಲು ಪೂರೈಕೆಯಾಗುತ್ತದೆ. ಖಾಸಗಿ ಕಂಪನಿಗಳು 4-5 ಲಕ್ಷ ಲೀಟರ್ ಹಾಲು ಮಾರಾಟ ಮಾಡುತ್ತಿವೆ. ಈ ಮಧ್ಯೆ, ಕೆಎಂಎಫ್ ಮತ್ತೆ ಹಾಲಿನ ದರವನ್ನು ಲೀಟರ್ ಗೆ 3 ರುಪಾಯಿ ಏರಿಸುವ ಸಾಧ್ಯತೆ ಇದೆ.

English summary

Private milk distributors have hiked the milk price recently. Currently, in Bangalore price of private milk per leter is Rs. 27 and KMF milk rate is Rs. 21.