ಎಒಎಲ್ : 400 ಭಾರತ ಉದ್ಯೋಗಿಗಳಿಗೆ ಪಿಂಕ್ ಸ್ಲಿಪ್

ನವದೆಹಲಿ, ಮಾ.14: ಅಮೆರಿಕದ ಜಾಗತಿಕ ಇಂಟರ್ನೆಟ್ ಸೇವೆ ಮತ್ತು ಮಾಧ್ಯಮ ಕಂಪೆನಿ ಅಮೆರಿಕನ್ ಆನ್ ಲೈನ್ ಲಿ ತನ್ನ ಭಾರತೀಯ ಉದ್ಯೋಗಿಗಳಿಗೆ ಅರ್ಧಚಂದ್ರ ಪ್ರಯೋಗ ಮಾಡಿದೆ ಎಂದು ನ್ಯೂಯಾರ್ಕ್‌ನ ಪ್ರಧಾನ ಕಚೇರಿಯಿಂದ ಮಾಹಿತಿ ಬಂದಿದೆ. ಟೈಮ್ ವಾರ್ನರ್ ಜೊತೆಗಿನ ಸಂಬಧ ಕಡಿತದ ನಂತರ ದೊಡ್ಡ ಪ್ರಮಾಣದಲ್ಲಿ ವಾಣಿಜ್ಯ ಹಾಗೂ ಮಾರುಕಟ್ಟೆ ವಿಭಾಗದಲ್ಲಿ ಭಾರಿ ಬದಲಾವಣೆ ಮಾಡಲು ಎಒಎಲ್ ಸಿದ್ಧತೆ ನಡೆಸಿದೆ. ಈ ಕಾರಣಕ್ಕೆ ಅನಗತ್ಯ ಎನಿಸಿದ ಉದ್ಯೋಗಿಗಳು ಅದರಲ್ಲೂ ಭಾರತೀಯ ಉದ್ಯೋಗಿಗಳಿಗೆ ಕೊಕ್ ನೀಡಿದೆ.

ಲಭ್ಯವಿರುವ ಮಾಹಿತಿಗಳ ಪ್ರಕಾರ ನೂರಾರು ಜನ ಭಾರತೀಯರಿಗೆ ಈಗಾಗಲೆ ಮನೆ ಹಾದಿ ತೋರಿಸಲಾಗಿದೆ. ಆದರೆ, ಕಂಪೆನಿ ವೆಬ್ ಸೈಟ್ ನಲ್ಲಿ ಮಾರ್ಚ್ 2011 ರ ವರೆಗೂ ಯುಕೆ, ಯುಎಸ್ ಹಾಗೂ ಐರ್ಲೆಂಡ್ ನಲ್ಲಿ ನೇಮಕಾತಿ ಜಾರಿಯಲ್ಲಿರುತ್ತದೆ ಎಂದು ಹಾಕಲಾಗಿದೆ. ಭಾರತದಲ್ಲಿ ಎಒಎಲ್ ಸುಮಾರು 400 ಜನರಿಗೆ ಪಿಂಕ್ ಸ್ಲಿಪ್ ನೀಡಲಿದೆ. ಆದರೆ, ವೆಬ್ ಮಾಹಿತಿಯಂತೆ ಯುಕೆ, ಯುಎಸ್ ನಲ್ಲಿ ನೇಮಕಾತಿ ಪ್ರಕ್ರಿಯೆ ಮುಂದುವರೆಸಿದೆ.

ಎಒಎಲ್ ಸಿಇಒ ಟಿಮ್ ಆರ್ಮ್ ಸ್ಟ್ರಾಂಗ್ ಹೇಳುವಂತೆ, ಕಂಪೆನಿ ಯುಎಸ್ ನಲ್ಲಿ 200 ಜನ, ಭಾರತದಲ್ಲಿ 700 ಜನರನ್ನು ಕೆಲಸದಿಂದ ತೆಗೆಯಲು ನಿರ್ಧರಿಸಲಾಗಿದೆ. ಆದರೆ, ಸುಮಾರು 300 ಮಂದಿಗೆ ಹೊರಗುತ್ತಿಗೆ ನಿರ್ವಹಣೆ ನೀಡುವ ಸಾಧ್ಯತೆಯಿದೆ. ಸುಮಾರು 400 ರಿಂದ 600 ಜನರನ್ನು ಭಾರತ ಹಾಗೂ ಯುಎಸ್ ಕೇಂದ್ರಗಳಿಂದ ಮನೆಗೆ ಕಳಿಸಬೇಕಿದೆ ಎಂದಿದ್ದಾರೆ.

ಆದರೆ, ಸುನಾಮಿ ಹೊಡೆತಕ್ಕೆ ಸಿಕ್ಕು ತತ್ತರಿಸಿರುವ ಜಪಾನ್ ನ ಕೇಂದ್ರಕ್ಕಾಗಿ ಭಾರತದಿಂದ ಕಾರ್ಯ ನಿರ್ವಹಿಸುತ್ತಿರುವ ಉದ್ಯೋಗಿಗಳ ಜಾಬ್ ಇನ್ನೂ ಸೇಫ್ ಎಂದಿದ್ದಾರೆ. ಇಮೇಲ್, ಚಾಟ್ ರೂಮ್, ಲೋಕಲ್ ಗೈಡ್, ಮೈ ಇಅಡ್ರೆಸ್, ಎಕ್ಸ್ ಡ್ರೈವ್ ಹಾಗೂ ಗೇಮ್ಸ್ ಮುಂತಾದ ಉಚಿತ ಸೇವೆಗಳನ್ನು ಎಒಎಲ್ ತನ್ನ ಗ್ರಾಹಕರಿಗೆ ಒದಗಿಸುತ್ತಿದೆ.

English summary

The American internet major AOL, which is facing tremendous business competition dumps its Indian employees. AOL is to revamp its business opportunity. The Internet entity will be slashing more than 400 jobs in India, media reports informed.