ಸಂಕ್ರಾತಿ ನಂತರ ಈರುಳ್ಳಿ ಬೆಲೆ ಕುಸಿತ

ನವದೆಹಲಿ, ಜ. 3 : ಗಗನಕ್ಕೇರಿರುವ ಈರುಳ್ಳಿ ಬೆಲೆ ಜನವರಿ ಮಧ್ಯಂತರದ ವೇಳೆಗೆ ಯಥಾಸ್ಥಿತಿಗೆ ಬರುವ ಸಾಧ್ಯತೆ ಇದೆ ಎಂದು ನವದೆಹಲಿಯ ಸಗಟು ಈರುಳ್ಳಿ ವರ್ತಕರು ಹೇಳಿದ್ದಾರೆ.

ಏಷ್ಯಾದ ಬಹುದೊಡ್ಡ ಮಾರುಕಟ್ಟೆ ಎಂದು ಹೆಸರುವಾಸಿಯಾಗಿರುವ ಇಲ್ಲಿನ ಅಜಾದ್ ಪುರ ಮಂಡಿಯ ತರಕಾರಿ ವರ್ತಕರ ಪ್ರಕಾರ, ದೇಶದ ವಿವಿಧ ರಾಜ್ಯಗಳಲ್ಲಿ ಈರುಳ್ಳಿ ಬೆಳೆ ಈಗಾಗಲೇ ಕೈಗೆ ಬಂದಿದೆ. ಜನವರಿ 20ರ ನಂತರ ಮಾರುಕಟ್ಟೆ ಬರಲಿದ್ದು, ಈರುಳ್ಳಿ ಬೆಲೆ ಗಮನಾರ್ಹ ಇಳಿಕೆ ಕಾಣುವ ಸಾಧ್ಯತೆ ಇದೆ ಎಂದು ಭವಿಷ್ಯ ನುಡಿದಿದ್ದಾರೆ.

ರಾಜಸ್ತಾನ, ಮಹಾರಾಷ್ಟ್ರ, ಗುಜರಾತ್ ಮತ್ತು ಮಧ್ಯಪ್ರದೇಶಗಳಲ್ಲಿ ಸಾವಿರಾರು ಎಕರೆ ಪ್ರದೇಶಗಳಲ್ಲಿ ಈರುಳ್ಳಿ ಬೆಳೆಯಲಾಗಿದೆ. ಜನವರಿ 20ರ ನಂತರ ಈರುಳ್ಳಿ ಬೆಲೆ ಭಾರಿ ಪ್ರಮಾಣದಲ್ಲಿ ಕುಸಿಯಲಿದೆ ಎಂದು ತರಕಾರಿ ವರ್ತಕರ ಪ್ರಧಾನ ಕಾರ್ಯದರ್ಶಿ ರಾಜನ್ ಶರ್ಮಾ ಹೇಳಿದ್ದಾರೆ. ಈಗಾಗಲೇ ಸಗಟು ಮಾರುಕಟ್ಟೆಯಲ್ಲಿ ಈರುಳ್ಳಿ ಬೆಲೆ ಕುಸಿದಿದೆ. ಆದರೆ, ಚಿಲ್ಲರೆ ವ್ಯಾಪಾರದಲ್ಲಿ ಮಾತ್ರ ಈರುಳ್ಳಿ ಕೆಜಿಗೆ 50 ರಿಂದ 60 ರುಪಾಯಿ ಇದೆ ಎಂದು ಅವರು ವಿವರಿಸಿದ್ದಾರೆ.

ಕಳೆದ ಎರಡು ವಾರಗಳಿಂದ ಈರುಳ್ಳಿ ಬೆಲೆ ಕೆಜಿಗೆ 80 ರಿಂದ 100 ರುಪಾಯಿಗೆ ಏರಿಕೆಯಾಗಿತ್ತು. ಈರುಳ್ಳಿ ಕೊರತೆಯಿಂದಾಗಿ ಪಾಕಿಸ್ತಾನದಿಂದ ಈರುಳ್ಳಿಯನ್ನು ಆಮದು ಮಾಡಿಕೊಳ್ಳಲಾಗಿತ್ತು.

English summary

The sky-rocketing prices of onion that have come down marginally are expected to fall further by mid-January, Delhi's wholesale traders said.