ನಾಯಕ, ಖಳನಾಯಕ ಯಾರು? ನೀವೇ ನಿರ್ಧರಿಸಿ

ಬೆಂಗಳೂರು, ಡಿ. 27 : ಕರ್ನಾಟಕ ರಾಜಕಾರಣದಲ್ಲಿ ಈ ವರ್ಷ ನಡೆದಿರುವ ಘಟನಾವಳಿಗಳತ್ತ ಒಂದು ಬಾರಿ ಕಣ್ಣಾಡಿಸಿದರೆ, ಹೆಮ್ಮೆ ಪಟ್ಟುಕೊಳ್ಳುವಂಥ ಒಂದೂ ಘಟನೆ ಗಮನಕ್ಕೆ ಬರುವುದಿಲ್ಲ. ಹಾಲಪ್ಪನವರಿಂದ ಅತ್ಯಾಚಾರ, ಭಿನ್ನಮತೀಯರ ಬಂಡಾಯ, ಎರಡೆರಡು ಬಾರಿ ವಿಶ್ವಾಸಮತ ಯಾಚನೆ, ಕೈಕೈ ಮಿಲಾಯಿಸಿ ಗುದ್ದಾಡಿದ ರಾಜಕಾರಣಿಗಳು, ತುಂಬಿ ತುಳುಕುತ್ತಿರುವ ಭ್ರಷ್ಟಾಚಾರ ಪ್ರಕರಣಗಳು, ರಾಜ್ಯಪಾಲರ ನಡೆಗಳು, ಅಕ್ರಮ ಗಣಿಗಾರಿಕೆ, ಕುರ್ಚಿ ಉಳಿಸಿಕೊಳ್ಳಲು ವರ್ಷದುದ್ದಕ್ಕೂ ಯಡಿಯೂರಪ್ಪ ಮಾಡಿರುವ ಹೋರಾಟ... ಒಂದೆ ಎರಡೆ...

ಆಡಳಿತ ಪಕ್ಷ, ವಿರೋಧ ಪಕ್ಷಗಳೆರಡೂ ಇವೆಲ್ಲ ಹಗರಣಗಳಲ್ಲಿ ಸಮಪಾಲು ಪಡೆಯಲೇಬೇಕು. ಬೇರೊಬ್ಬರತ್ತ ಬೆರಳು ತೋರಿದರೂ ಉಳಿದ ಬೆರಳುಗಳು ತಮ್ಮತ್ತವೇ ಚಾಚಿರುತ್ತವೆ ಎಂಬ ಅರಿವು ಒಬ್ಬರಿಗೂ ಇದ್ದಂತಿಲ್ಲ. ಇವರಲ್ಲಿ ನಾಯಕ ಯಾರು, ಖಳನಾಯಕ ಯಾರು, ಚತುರಾತಿ ಚತುರ ಯಾರು, ಭ್ರಷ್ಟಾತಿಭ್ರಷ್ಟ ಯಾರು ನೀವೇ ನಿರ್ಧರಿಸಿ.