ದಿನಕ್ಕೆ ಎಟಿಎಂನಿಂದ ಲಕ್ಷ ರು ಪಡೆಯಿರಿ

ನವದೆಹಲಿ, ಮೇ.31: ದೇಶದ ಪ್ರಮುಖ ಖಾಸಗಿ ಬ್ಯಾಂಕ್ ಎಚ್ ಡಿಎಫ್ ಸಿ ಬ್ಯಾಂಕ್ ಒಂದು ದಿನದಲ್ಲಿ ಎಟಿಎಂಗಳಿಂದ ಹಣ ಪಡೆಯುವ ಮೊತ್ತವನ್ನು ಹಿಗ್ಗಿಸಿದೆ. ಗ್ರಾಹಕರು ಇನ್ಮುಂದೆ ದಿನಕ್ಕೆ ಒಂದು ಲಕ್ಷ ರುಪಾಯಿಗಳನ್ನು ಪಡೆಯಬಹುದು ಹಾಗೂ ಡೆಬಿಟ್ ಕಾರ್ಡ್ ನ ಶಾಂಪಿಂಗ್ ಮಿತಿ ಕೂಡ ಏರಿಕೆಯಾಗಿದ್ದು, 1.25 ಲಕ್ಷ ರುಪಾಯಿಗಳಿಗೆ ಏರಿಕೆ ಮಾಡಲಾಗಿದೆ.

ಜೂನ್ 1ರಿಂದ ಗ್ರಾಹಕರು ಈ ಸೌಲಭ್ಯ ಪಡೆಯಬಹುದಾಗಿದೆ. ಅಲ್ಲದೆ ಗ್ರಾಹಕರು 3 ಲಕ್ಷ ರುಪಾಯಿಗಳವರೆಗೆ ಎಟಿಎಂಗಳ ಮೂಲಕ ಅಥವಾ ದೂರವಾಣಿ(ಫೋನ್ ಬ್ಯಾಂಕಿಂಗ್) ಮೂಲಕ ಹಣ ವರ್ಗಾವಣೆ ಮಾಡಬಹುದಾಗಿದೆ. ಪ್ರಸ್ತುತ ಬ್ಯಾಂಕ್ ಎಟಿಎಂಗಳಿಂದ ಹಣ ಹಿಂಪಡೆಯುವ ಗರಿಷ್ಠ ಮಿತಿ ಪ್ರತಿ ನಿತ್ಯ 50,000 ರುಪಾಯಿಗಳಾಗಿವೆ.

ಎಚ್ ಡಿ ಎಫ್ ಸಿ ಬ್ಯಾಂಕ್ ನ ಇಂಪೀರಿಯಲ್ ಗೋಲ್ಡ್ ಕಾರ್ಡ್ ಗಳ ಗ್ರಾಹಕರಿಗೆ ಈ ಸೌಲಭ್ಯ ನೀಡಲಾಗಿದೆ. ಎಚ್ ಡಿ ಎಫ್ ಸಿ ಬ್ಯಾಂಕ್ ಈಗ ವಿಸ್ತರಿಸಲಾದ ಸೌಲಭ್ಯದ ಮಾಹಿತಿಯನ್ನು ಗ್ರಾಹಕರಿಗೆ ನೀಡುವ ಪ್ರಕ್ರಿಯೆಯಲ್ಲಿ ನಿರತವಾಗಿದ್ದು, ಈ ಮಿತಿಯ ವಿಸ್ತರಣೆಗೆ ಇತರ ಬ್ಯಾಂಕ್ ಗಳು ಮುಂದಾಗಲಿವೆ ಎಂದು ಹೇಳಲಾಗಿದೆ.