ನಿಮ್ಮ ಮಾಹಿತಿ ಜನಗಣತಿಯಲ್ಲಿ ಸೇರಿಲ್ಲವೇ?

ನವದೆಹಲಿ, ಮೇ.10: ದೇಶದಲ್ಲಿ ಜನಗಣತಿ ನಡೆಯುತ್ತಿದ್ದು, ರಾಜ್ಯದಲ್ಲಿ ಈಗಾಗಲೇ ಮುಗಿಯುವ ಹಂತಕ್ಕೆ ಬಂದಿದೆ. ಜನಗಣತಿ ಸಮಯದಲ್ಲಿ ಮಾಹಿತಿ ದಾಖಲಿಸಲು ಸಾಧ್ಯವಾಗದಿರುವ ನಾಗರಿಕರು ಚಿಂತಿಸಬೇಕಿಲ್ಲ. ಗಣತಿ ಕಾರ್ಯ ನಡೆಸುವ ಅಧಿಕಾರಿಗಳನ್ನು ಸಂಪರ್ಕಿಸಿ ನಿಮ್ಮ ಹಾಗೂ ನಿಮ್ಮ ಕುಟುಂಬದ ಸಂಪೂರ್ಣ ಮಾಹಿತಿ ಅವರಿಗೆ ನೀಡಬಹುದು.

ಭಾರತೀಯ ಜನಗಣತಿ ಆಯುಕ್ತರ ಕಚೇರಿ ಉಚಿತ ಸಹಾಯವಾಣಿ ಸೇವೆಯನ್ನು ಆರಂಭಿಸಿದ್ದು, ದೂರು ಪಡೆದ ತಕ್ಷಣ ಅಧಿಕಾರಿಗಳನ್ನು ನಿಮ್ಮ ಮನೆಗೆ ಕಳುಹಿಸಲಾಗುತ್ತದೆ. ಜನಗಣತಿಯಲ್ಲಿ ನಿಮ್ಮ ವಿವರಗಳನ್ನು ದಾಖಲು ಮಾಡಲಾಗುತ್ತದೆ. ಜನಗಣತಿ ವೇಳೆ ನಿಮ್ಮ ವಿವರಗಳು ಸೇರಿಕೊಳ್ಳದಿದ್ದರೆ 1800 110 111 ಸಂಖ್ಯೆಗೆ ಕರೆ ಮಾಡಬಹುದು ಅಥವಾ rgoffice.rgi@ nic.inಗೆ ಇಮೇಲ್ ಕಳಿಸಬಹುದು.

ದೂರವಾಣಿ ಮತ್ತು ಇಮೇಲ್ ಸೇವೆ ಲಭ್ಯವಿಲ್ಲದವರು ಸ್ಥಳೀಯ ತಹಸೀಲ್ದಾರ್, ವಾರ್ಡ್ ಅಧಿಕಾರಿ ಅಥವಾ ಜನಗಣತಿ ಅಧಿಕಾರಿಗಳನ್ನು ಸಂಪರ್ಕಿಸಬಹುದು.ದೇಶದ 35 ರಾಜ್ಯ ಹಾಗೂ ಕೇಂದ್ರಾಡಳಿತ ಪ್ರದೇಶಗಳಲ್ಲಿನ 1.2 ಕೋಟಿ ನಿವಾಸಿಗಳ ಮಾಹಿತಿ ಸಂಗ್ರಹ ಕಾರ್ಯ ಭರದಿಂದ ಸಾಗಿದೆ. ಜನಗಣತಿ2010ರಲ್ಲಿ ಸುಮಾರು 6 ಲಕ್ಷ ಗ್ರಾಮಗಳನ್ನು ಕ್ರಮಿಸುವ ಕಾರ್ಯವನ್ನು ಸರ್ಕಾರಿ ಉದ್ಯೋಗಿಗಳು ಹಾಗೂ ನಿವೃತ್ತ ಅಧಿಕಾರಿಗಳು ಮಾಡುತ್ತಿದ್ದಾರೆ.