ಚಿನ್ನಾಭರಣ ರಫ್ತಿನಲ್ಲಿ ಹೆಚ್ಚಳ ನಿರೀಕ್ಷೆ

ಕೋಲ್ಕತಾ,ಮೇ.3:ದೇಶದ ಹರಳು ಮತ್ತು ಚಿನ್ನಾಭರಣ ರಫ್ತು ಈ ಹಣಕಾಸು ವರ್ಷದಲ್ಲಿ ಶೇ.20 ಬೆಳವಣಿಗೆ ದಾಖಲಿಸಲಿದೆ ಎಂದು ಹರಳು ಮತ್ತು ಚಿನ್ನಾಭರಣ ರಫ್ತು ಉತ್ತೇಜನ ಕೌನ್ಸಿಲ್ ಹೇಳಿದೆ. 2009-10ರ ಹಣಕಾಸು ವರ್ಷದಲ್ಲಿ ರಫ್ತು ಶೇ.16 ಬೆಳವಣಿಗೆ ದಾಖಲಿಸಿದ್ದು ವಿಶ್ವದಾದ್ಯಂತ ಆರ್ಥಿಕ ಚೇತರಿಕೆಯ ಪ್ರಮಾಣ ಹೆಚ್ಚಾಗಿರುವುದರಿಂದ ಈ ವರ್ಷ ಶೇ.20 ರ ಬೆಳವಣಿಗೆ ನಿರೀಕ್ಷಿಸಲಾಗಿದೆ ಎಂದು ಕೌನ್ಸಿಲ್ ಪ್ರಾದೇಶಿಕ ಅದ್ಯಕ್ಷ ಪಂಕಜ್ ಪಾರೀಖ್ ತಿಳಿಸಿದರು.

ಲೋಹಗಳ ಮೌಲ್ಯವೂ ಹೆಚ್ಚುತ್ತಿರುವುದರಿಂದ ಬೆಳವಣಿಗೆಯ ಗುರಿ ಸಾಧಿಸಬಹುದಾಗಿದೆ ಎಂದು ಅವರು ಹೇಳಿದರು. ಸರ್ಕಾರ ಉದ್ಯಮಕ್ಕೆ ನೀಡಿರುವ ಶೇ.2 ರ ಬಡ್ಡಿ ಸಬ್ಸಿಡಿಯನ್ನು ಇನ್ನೂ ಆರು ತಿಂಗಳ ಕಾಲ ಮುಂದುವರಿಸುವಂತೆ ಸರ್ಕಾರಕ್ಕೆ ಮನವಿ ಮಾಡಿಕೊಳ್ಳಲಾಗಿದೆ ಎಂದರು. ಹರಳು ಮತ್ತು ಚಿನ್ನಾಭರಣ ಉದ್ಯಮದ ಮಾರುಕಟ್ಟೆ 16 ಬಿಲಿಯನ್ ಡಾಲರ್ ಗಳಾಗಿದ್ದು ಮುಂದಿನ 4 ವರ್ಷಗಳಲ್ಲಿ 20 ಬಿಲಿಯನ್ ಡಾಲರ್ ಗಳಿಗೇರಲಿದೆ ಎಂದರು.