ಬ್ಯಾಂಕ್ ಉದ್ಯೋಗಿಗಳಿಗೆ ಬಂಪರ್ ಬೆಳೆ

ನವದೆಹಲಿ, ಏ. 28 : ಸರಕಾರಿ ಸ್ವಾಮ್ಯದ ಬ್ಯಾಂಕ್ ಗಳು, ಖಾಸಗಿ ಮತ್ತು ವಿದೇಶಿ ಬ್ಯಾಂಕ್ ನೌಕರರು ಮತ್ತು ಅಧಿಕಾರಿಗಳ ವೇತನವನ್ನು ಶೇ.17.5 ರಷ್ಟು ಹೆಚ್ಚಿಸುವ ಸಂಬಂಧ ಅಲ್ ಇಂಡಿಯಾ ಬ್ಯಾಂಕ್ ಅಸೋಸಿಯೇಷನ್(ಐಬಿಎ) ಮತ್ತು ಬ್ಯಾಂಕ್ ಉದ್ಯೋಗಿಗಳ ಸಂಘಟನೆಗಳು ಒಪ್ಪಂದಕ್ಕೆ ಬಂದಿವೆ. ಸರಕಾರಿ ಸ್ವಾಮ್ಯದ, ಖಾಸಗಿ ಮತ್ತು ವಿದೇಶಿ ಬ್ಯಾಂಕ್ ಗಳು ಸೇರಿದಂತೆ ಒಟ್ಟಾರೆ 8 ಲಕ್ಷ ಉದ್ಯೋಗಿಗಳು ಈ ಹೊಸ ವೇತನ ಒಪ್ಪಂದದ ಪ್ರಯೋಜನ ಪಡೆಯಲಿದ್ದಾರೆ.

ಈ ಒಪ್ಪಂದದ ಅನ್ವಯ 1995ರಲ್ಲಿ ಪಿಂಚಣಿ ಯೋಜನೆಗೆ ಸೇರದ ಬ್ಯಾಂಕ್ ಉದ್ಯೋಗಿಗಳು ಮತ್ತೆ ಈ ಸೌಲಭ್ಯ ಪಡೆಯಲು ಅರ್ಹರಾಗಲಿದ್ದಾರೆ. ವೇತನ ಹೆಚ್ಚಳವು 2007ರ ನವೆಂಬರ್ ತಿಂಗಳಿನಿಂದ ಪೂರ್ವಾನ್ವಯಯವಾಗಿ ಜಾರಿಗೆ ಬರಲಿದೆ. ವೇತನ ಪರಿಷ್ಕರಣೆಗೆ ಸಂಬಂಧಿಸಿದಂತೆ ಬ್ಯಾಂಕ್ ನೌಕರರ ಸಂಘಟನೆಗಳ ಪ್ರತಿನಿಧಿಗಳ ಜೊತೆ ಮಂಗಳವಾರ ಒಪ್ಪಂದಕ್ಕೆ ಬರಲಾಗಿದೆ ಎಂದು ಐಬಿಎದ ಉಪಮುಖ್ಯ ಕಾರ್ಯನಿರ್ವಾಹಕ ಕೆ ಉನ್ನಿಕೃಷ್ಣನ್ ಅವರು ತಿಳಿಸಿದ್ದಾರೆ.

ಈ ವೇತನ ಪರಿಷ್ಕರಣೆ ಫಲವಾಗಿ ಬ್ಯಾಂಕ್ ಗಳಿಗೆ ಒಟ್ಟು 4,816 ಕೋಟಿ ಹೆಚ್ಚುವರಿ ಹೊರೆ ಬೀಳಲಿದೆ. 2007 ರ ನವೆಂಬರ್ ನಿಂದ ವೇತನ ಹೆಚ್ಚಳ ಯೋಜನೆ ಜಾರಿಗೆ ಬರಲಿದ್ದು, ಸರಕಾರ ಒಂದೇ ಕಂತಿನಲ್ಲಿ ಬಾಕಿ ಹಣ ಪಾವತಿಸಲಿದೆ. 1995ರಲ್ಲಿ ಪಿಂಚಣಿ ಯೋಜನೆಗೆ ಸೇರ್ಪಡೆಗೊಳ್ಳದ ನೌಕರರಿಗೂ ಈ ಒಪ್ಪಂದವು ನೆರವಾಗಲಿದೆ.

ಪಿಂಚಣಿ ಯೋಜನೆ ಒಪ್ಪಿಕೊಳ್ಳದೇ ಭವಿಷ್ಯ ನಿಧಿ(ಪಿಎಫ್) ಸೌಲಭ್ಯ ಆಯ್ಕೆ ಮಾಡಿಕೊಂಡವರು ಈಗ ಮತ್ತೆ ಪಿಂಚಣಿ ಯೋಜನೆಗೆ ಮರು ಸೇರ್ಪಡೆಗೊಳ್ಳಬಹುದು. ಈಗಾಗಲೇ ನಿವೃತ್ತಿಗಾಗಿರುವವರು ಈ ಯೋಜನೆಗೆ ಸೇರಬಹುದಾಗಿದೆ. ಸರಕಾರಿ ಸ್ವಾಮ್ಯದ 26, ಖಾಸಗಿ ವಲಯದ 12 ಮತ್ತು 8 ವಿದೇಶಿ ಬ್ಯಾಂಕ್ ಗಳು ಇದರ ವ್ಯಾಪ್ತಿಗೆ ಬರಲಿವೆ.