ರಾಜಪಕ್ಸಗೆ ಒಲಿದ ಶ್ರೀಲಂಕಾ ಅಧ್ಯಕ್ಷ ಪಟ್ಟ

ಕೊಲಂಬೊ ಜ 27 : ಎರಡನೇ ಬಾರಿಗೆ ಶ್ರೀಲಂಕಾದ ರಾಷ್ಟ್ರಾಧ್ಯಕ್ಷರಾಗಿ ಮಹೇಂದ್ರ ರಾಜಪಕ್ಸ ಭಾರಿ ಅಂತರದಿಂದ ವಿಜಯ ಸಾಧಿಸಿದ್ದಾರೆ. ಅವರು ತಮ್ಮ ಪ್ರತಿಸ್ಪರ್ಧಿ ಮಾಜಿ ಸೇನಾ ಮುಖ್ಯಸ್ಥ ಶರತ್ ಫೊನ್ಸೇಕಾ ಅವರನ್ನು 18ಲಕ್ಷ ಮತಗಳ ಅಂತರಗಳಿಂದ ಸೋಲಿಸಿದ್ದಾರೆಂದು ಶ್ರೀಲಂಕಾ ಸರಕಾರದ ಟಿವಿ ವಾಹಿನಿ ರೂಪವಾಹಿನಿ ಟೆಲೆವಿಷನ್ ವರದಿ ಮಾಡಿದೆ.

ಎಲ್ಟಿಟಿಇ ನಿರ್ನಾಮದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಈ ಇಬ್ಬರು ನಾಯಕರುಗಳ ನಡುವೆ ಅದ್ಯಕ್ಷ ಗಾದಿಗೆ ಭಾರೀ ಪೈಪೋಟಿ ನಡೆದಿತ್ತು. ಮಂಗಳವಾರ ( ಜ 26 ) ನಡೆದ ಶಾಂತಿಯುತ ಮತದಾನದಲ್ಲಿ 14ಮಿಲಿಯನ್ ಜನರು ಮತದಾನ ನಡೆಸಿದ್ದರು. ರಾಜಪಕ್ಸಬೆಂಬಲಿಗರು ದೇಶಾದ್ಯಂತ ವಿಜಯೋತ್ಸವ ಆಚರಿಸುತ್ತಿದ್ದಾರೆ. ಈ ಮಧ್ಯೆ ಫೊನ್ಸೇಕಾ ತಂಗಿರುವ ಹೋಟೆಲ್ ನನ್ನು ಮಿಲಿಟರಿ ಸುತ್ತುವರಿದಿದೆ.