2003ರ ಮುಂಬೈ ಸ್ಫೋಟ : ಮೂವರಿಗೆ ಶಿಕ್ಷೆ

ನವದೆಹಲಿ, ಜು. 27 : 2003ರಲ್ಲಿ ಮುಂಬೈನಲ್ಲಿ ನಡೆದಿದ್ದ ಅವಳಿ ಸ್ಫೋಟ ಪ್ರಕರಣದ ಪ್ರಮುಖ ಆರೋಪಿಗಳ ವಿರುದ್ಧದ ಅಪರಾಧ ಸಾಬೀತಾಗಿದ್ದು, ಆಗಸ್ಟ್ 4 ರಂದು ಶಿಕ್ಷೆ ಪ್ರಮಾಣ ಘೋಷಿಸಲಾಗುವುದು ಎಂದು ಪೋಟಾ ನ್ಯಾಯಾಲಯ ತಿಳಿಸಿದೆ.

2003ರಲ್ಲಿ ನಡೆದ ಮುಂಬೈನ ಗೇಟ್ ವೇ ಇಂಡಿಯಾ ಮತ್ತು ಝವೇರಿ ಬಜಾರ್ ಬಳಿ ನಡೆಸಿದ್ದ ಅವಳಿ ಸ್ಪೋಟದಲ್ಲಿ ಸುಮಾರು 53 ಮಂದಿ ಸಾವನ್ನಪ್ಪಿದ್ದರು. ಸ್ಫೋಟಕ್ಕೆ ಸಂಬಂಧಿಸಿದಂತೆ ಮೊಹ್ಮದ್ ಹನೀಫ್ ಸಯ್ಯದ್ (46), ಈತನ ಪತ್ನಿ ಪಹಮೀದಾ(43) ಮತ್ತು ಅಶ್ರತ್ ಶಫೀಕ್ ಅನ್ಸಾರಿ (32) ಅವರ ಮೇಲಿದ್ದ ಆರೋಪ ದೃಡಪಟ್ಟಿದ್ದು, ಈ ಮೂವರು ಅಪರಾಧಿಗಳು ಎಂದು ಪೋಟಾ ನ್ಯಾಯಾಲಯ ಘೋಷಿಸಿದೆ. ಶಿಕ್ಷೆಯ ಪ್ರಮಾಣ ಆಗಸ್ಟ್ 4 ರಂದು ಪ್ರಕಟಿಸಲಾಗುವುದು ಎಂದು ನ್ಯಾಯಾಲಯ ತಿಳಿಸಿದೆ.

ಪಹಮೀದಾ ಅವರನ್ನು ಕಳೆದ ಆರು ವರ್ಷಗಳಿಂದ ಬೈಕುಲ್ಲಾ ಜೈಲಿನಲ್ಲಿ ಇಡಲಾಗಿದೆ. ಹನೀಫ್ ಸಯ್ಯದ್ ಮತ್ತು ಅಶ್ರತ್ ಅನ್ಸಾರಿ ಅವರನ್ನು ಆರ್ಥರ್ ಜೈಲಿನಲ್ಲಿ ಇರಿಸಲಾಗಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುಮಾರು 103 ಸಾಕ್ಷಿಗಳ ವಿಚಾರಣೆ ನಡೆಸಲಾಗಿದೆ. ಗೋಧ್ರಾ ನಂತರದ ಹತ್ಯಾಕಾಂಡಕ್ಕೆ ಸೇಡು ತೀರಿಸಿಕೊಳ್ಳುವುದಕ್ಕಾಗಿ ಮುಂಬೈನಲ್ಲಿ ಅವಳಿ ಸ್ಫೋಟ ನಡೆಸಲು ಪ್ರಮುಖ ಕಾರಣವಾಗಿದೆ. ದುಬೈನಿಂದ ಸಂಚು ರೂಪರೇಷೆಗಳನ್ನು ರೂಪಿಸಲಾಗಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. 2003 ಆಗಸ್ಟ್ 25 ರಂದು ಮುಂಬೈಯಲ್ಲಿ ಅವಳಿ ಸ್ಫೋಟ ಸಂಭವಿಸಿತ್ತು. ಘಟನೆಯಲ್ಲಿ 53 ಸಾವನ್ನಪ್ಪಿದ್ದು, 184 ಮಂದಿ ಗಾಯಗೊಂಡಿದ್ದರು.

(ಏಜನ್ಸೀಸ್)