ಮಿಯಾಂವ್ ಎಫ್ಎಮ್ ಸಿಓಓ ಅನಿಲ್ ರಾಜೀನಾಮೆ

ನವದೆಹಲಿ, ಜೂ. 1 : 'ಅನಿಲ್ ಕಿ ಆವಾಜ್' ಮುಖಾಂತರ ವಿಶ್ವದಾದ್ಯಂತ ಮನೆಮಾತಾಗಿದ್ದ ಬೆಂಗಳೂರಿನ ಹುಡುಗ ರೇಡಿಯೋ ಜಾಕಿ ಅನಿಲ್ ಶ್ರೀವತ್ಸ್ ಅವರು ಇಂಡಿಯಾ ಟುಡೆ ಕಂಪನಿಯ ಮಿಯಾಂವ್ ಎಫ್ಎಮ್ ಚಾನಲ್ ನ ಚೀಫ್ ಆಪರೇಟಿಂಗ್ ಆಫೀಸರ್ (ಸಿಓಓ) ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ.

ಅತ್ಯಂತ ಕಿರಿಯ ವಯಸ್ಸಿನಲ್ಲಿಯೇ ಆರ್ ಜೆ ಆಗಿ ರೇಡಿಯೋ ಶ್ರೋತೃಗಳ ಮನಗೆದ್ದಿದ್ದ ಅನಿಲ್ ಸಿಓಓ ಆಗಿದ್ದಾಗಲೂ ರೇಡಿಯೋ ಜಾಕಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದರು. 'ಬಿಟ್ವೀನ್ ದಿ ಶೀಟ್ಸ್' ಎಂಬ ಅವರು ಪ್ರಾರಂಭಿಸಿದ ಕಾರ್ಯಕ್ರಮ ಜನಜನಿತವಾಗಿತ್ತು.

ಅಮೆರಿಕಾದಲ್ಲಿ ಡಿಗ್ರಿ ಓದುತ್ತಿದ್ದಾಗಲೇ ರೇಡಿಯೋ ಜಾಕಿಯಾಗಿ ಹೆಸರು ಮಾಡಿದ್ದ ಅನಿಲ್ ಶ್ರೀವತ್ಸ, ಬಲುಬೇಗನೆ ಯಶಸ್ಸಿನ ತುತ್ತತುದಿಯೇರಿದರು. ದೂರದರ್ಶನ, ಕೇಬಲ್ ನೆಟ್ವರ್ಕ್, ಡಿಟಿಎಚ್ ಮತ್ತು ಐಪಿಟಿವಿಗಳಲ್ಲಿಯೂ ಕೈಯಾಡಿಸಿ ಸೈ ಎನಿಸಿಕೊಂಡರು.

ರೇಡಿಯೋ ಬಗೆಗಿನ ಅವರ ಪ್ರೀತಿ ಯಾವ ಮಟ್ಟದ್ದಿತ್ತೆಂದರೆ, ಟಿವಿ ಚಾನಲ್ ಗಾಗಿ ಕಾರ್ಯನಿರ್ವಹಿಸುತ್ತಿದ್ದಾಗಲೂ ದೆಹಲಿಯಲ್ಲಿನ ತಮ್ಮ ಮನೆಯಿಂದಲೇ 'ಅನಿಲ್ ಕಿ ಆವಾಜ್' ಕಾರ್ಯಕ್ರಮ ನಡೆಸಿಕೊಡುತ್ತಿದ್ದರು. ಮಿಯಾಂವ್ ಸಿಓಓ ಆದಮೇಲೆ ಕೂಡ ಅಮೆರಿಕದ ಶ್ರೋತೃಗಳಿಗಾಗಿ ತಮ್ಮ ಮನೆಯಿಂದ ಕಾರ್ಯಕ್ರಮ ಬಿತ್ತರಿಸುತ್ತಿದ್ದರು. ಈ ಕಾರ್ಯಕ್ರಮ ಅಮೆರಿಕದಾದ್ಯಂತ ಭಾರೀ ಜನಪ್ರಿಯತೆ ಗಳಿಸಿತು.

ಮಿಯಾಂವ್ ಎಫ್ಎಮ್ ನಲ್ಲಿ 'ಮಹಿಳೆಯರಿಗಾಗಿ ಮಾತ್ರ' ಚಾನಲ್ ಪ್ರಾರಂಭಿಸಿದ ಶ್ರೇಯಸ್ಸು ಅನಿಲ್ ಅವರಿಗೆ ಸಲ್ಲುತ್ತದೆ. ಮುಂಬೈನ ಬೆಸ್ಟ್ ಬಸ್ ಗಳಲ್ಲೆಲ್ಲ ಇದರ ಬಗ್ಗೆ ಜಾಹೀರಾತು ನೀಡಿ ಭಾರೀ ಸಂಚಲನವನ್ನುಂಟು ಮಾಡಿದ್ದರು.

ಇಂದು ತಮ್ಮ ಕೊನೆಯ ದಿನವನ್ನು ಮಿಯಾಂವ್ ನಲ್ಲಿ ಪೂರೈಸಿರುವ ಅನಿಲ್ ಶ್ರೀವತ್ಸ ತಾವು ನಮ್ಮ ಬೆಂಗಳೂರಿಗೆ ಬರುತ್ತಿರುವುದಾಗಿ ಒನ್ ಇಂಡಿಯಾ.ಇನ್ ಗೆ ಖಚಿತಪಡಿಸಿದ್ದಾರೆ.

(ಏಜೆನ್ಸೀಸ್)