ಯುಪಿಎ ಕೂಡುಗೆ ಎಸ್ಟಿಡಿ ದರ ಕೇವಲ 25 ಪೈಸೆ!

ನವದೆಹಲಿ, ಮೇ. 29 : ತಮಿಳುನಾಡಿನ ನೀಲಗಿರಿ ಲೋಕಸಭೆ ಕ್ಷೇತ್ರ ಡಿಎಂಕೆ ಪಕ್ಷದಿಂದ ಆಯ್ಕೆಯಾಗಿರುವ ಎ ರಾಜಾ ಅವರು ಮನಮೋಹನ್ ಸಿಂಗ್ ನೇತೃತ್ವದ ಯುಪಿಎ ಸರಕಾರದಲ್ಲಿ ಮತ್ತೊಮ್ಮೆ ದೂರವಾಣಿ ಮತ್ತು ಮಾಹಿತಿ ತಂತ್ರಜ್ಞಾನ ಇಲಾಖೆ ಸಚಿವರಾಗಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಅಧಿಕಾರ ವಹಿಸಿಕೊಂಡು ಇನ್ನು ಎರಡು ದಿನ ಕಳೆದಿಲ್ಲ ಆಗಲೇ ಸರಕಾರಿ ಸ್ವಾಮ್ಯದ ಬಿಎಸ್ಎನ್ಎಲ್ ವತಿಯಿಂದ ಎಸ್ ಟಿಡಿ ಮತ್ತು ಸ್ಥಳೀಯ ಕರೆ ಮಾಡುವ ಗ್ರಾಹಕರಿಗೆ ಭಾರಿ ಪ್ರಮಾಣದ ಅಚ್ಚರಿ ಬಹುಮಾನ ನೀಡಲು ಮುಂದಾಗಿದ್ದಾರೆ.

ಶೀಘ್ರದಲ್ಲಿ ದೂರವಾಣಿ ಕರೆಗಳನ್ನು ಇನ್ನಷ್ಟು ಅಗ್ಗಗೊಳಿಸಲು ಮುಂದಾಗಿದ್ದು, ಎಸ್ ಟಿಡಿ ಪ್ರತಿ ನಿಮಿಷದ ಕರೆಯೊಂದಕ್ಕೆ 25 ಪೈಸೆ ಮತ್ತು ಸ್ಥಳೀಯ ಪ್ರತಿ ನಿಮಿಷದ ಕರೆಗೆ ಕೇವಲ 10 ಪೈಸೆ ನಿಗದಿಪಡಿಸಲು ಸರಕಾರ ಚಿಂತನೆ ನಡೆಸಿದೆ ಎಂದು ಎ ರಾಜಾ ತಿಳಿಸಿದ್ದಾರೆ. ಒಟ್ಟಿನಲ್ಲಿ ಮನಮೋಹನ್ ಸಿಂಗ್ ಸರಕಾರ ಜನಪರ ಕಾರ್ಯಗಳನ್ನು ದೂರವಾಣಿ ಇಲಾಖೆಯ ಮೂಲಕ ಆರಂಭಿಸಿದೆ.

ಕಳೆದ ಯುಪಿಎ ಸರಕಾರದಲ್ಲಿ ಕೂಡಾ ಎ ರಾಜಾ ಅವರು ದೂರವಾಣಿ ಮತ್ತು ಮಾಹಿತಿ ತಂತ್ರಜ್ಞಾನ ಖಾತೆ ಸಚಿವರಾಗಿ ಕಾರ್ಯನಿರ್ವಹಿಸಿದ್ದಾರೆ. ಕಳೆದ ಲೋಕಸಭೆ ಚುನಾವಣೆಯಲ್ಲಿ ತಮಿಳುನಾಡಿನಿಂದ ಡಿಎಂಕೆ ಪಕ್ಷದ 18 ಮಂದಿ ಆಯ್ಕೆಯಾಗಿದ್ದಾರೆ. ದಯಾನಿಧಿ ಮಾರನ್, ಎಂ ಕೆ ಅಳಗಿರಿ, ಎ ರಾಜಾ ಸೇರಿ ಒಟ್ಟು ಒಂಬತ್ತು ಡಿಎಂಕೆ ಸಂಸದರು ಕಳೆದ ಗುರುವಾರ ಕೇಂದ್ರ ಸಚಿವರಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದರು.

(ಏಜನ್ಸೀಸ್)