ರ‌್ಯಾಗಿಂಗ್ ತಡೆಗೆ ನೂತನ ಮಾರ್ಗಸೂಚಿಗಳು

ನವದೆಹಲಿ, ಮೇ. 28 : ರ‌್ಯಾಗಿಂಗ್ ತಡೆ ಕಾನೂನನ್ನು ಇನ್ನಷ್ಟು ಬಲಗೊಳಿಸುವ ನಿಟ್ಟಿನಲ್ಲಿ ಯುಜಿಸಿ ಚಿಂತನೆ ನಡೆಸಿದ್ದು, ಮಾರ್ಗಸೂಚಿ ರೂಪಿಸಿದೆ. ಇದರನ್ವಯ ವಿದ್ಯಾರ್ಥಿಗಳಿಗೆ ಕಠಿಣ ಶಿಕ್ಷೆ, ದಂಡ ವಿಧಿಸುವುದು, ಮಕ್ಕಳಂತೆ ಪೋಷಕರನ್ನು ರ‌್ಯಾಗಿಂಗ್ ಗೆ ಹೊಣೆ ಮಾಡುವ ಕಾನೂನು ಜಾರಿಗೆ ಬರಲಿದೆ. ಹೊಸ ಮಾರ್ಗಸೂಚಿಗಳು ರ‌್ಯಾಗಿಂಗ್ ತಡೆ ಕಾಯ್ದೆಯನ್ನು ಮತ್ತಷ್ಟು ಬಲಗೊಳಿಸಲಿವೆ ಅಲ್ಲದೇ ಕಾನೂನು ಜಾರಿಗೆ ಸುಲಭಗೊಳಿಸಲಿದೆ ಎಂದು ವಿಶ್ವವಿದ್ಯಾಲಯ ಅನುದಾನ ಆಯೋಗದ ಅಧ್ಯಕ್ಷ ಸುಖದೇವ್ ಥೋರಟ್ ತಿಳಿಸಿದ್ದಾರೆ.

ಯುಜಿಸಿಯ ನೂತನ ಮಾರ್ಗಸೂಚಿಗಳು

* ರ‌್ಯಾಗಿಂಗ್ ತಡೆ ನಿಟ್ಟಿನಲ್ಲಿ ಜೂನ್ 15 ರಿಂದ ಕಾರ್ಯನಿರ್ವಹಿಸುವಂತೆ ಕಾಲ್ ಸೆಂಟರ್ ಆರಂಭ. ಇದರಿಂದ ದೇಶದ ಯಾವುದೇ ಭಾಗದಲ್ಲಿ ನಡೆಯುವ ರ್ಯಾಗಿಂಗ್ ಘಟನೆಗಳ ಬಗ್ಗೆ ಮಾಹಿತಿ ಸಂಗ್ರಹ ಮಾಡುವುದು.

* ರ‌್ಯಾಗಿಂಗ್ ಘಟನೆ ಸಂದರ್ಭದಲ್ಲಿ ಈ ಹಿಂದಿನಂತೆ ಪೋಷಕರು ತಪ್ಪಿಸಿಕೊಳ್ಳುವಂತಿಲ್ಲ. ವಿದ್ಯಾರ್ಥಿ ಶಾಲೆಗೆ ಸೇರುವ ಸಂದರ್ಭದಲ್ಲಿ ಆತ ರ‌್ಯಾಗಿಂಗ್ ನಡೆಸಿದರೆ ಅದಕ್ಕೆ ತಾನೂ ಹೊಣೆ ಎಂದು ಪೋಷಕರು ಮುಚ್ಚಳಿಕೆ ಬರೆದುಕೊಡತಕ್ಕದ್ದು.

* ಶಾಲೆಗೆ ಸೇರುವ ವೇಳೆ ವಿದ್ಯಾರ್ಥಿಯೊಬ್ಬ ತಾನು ರ‌್ಯಾಗಿಂಗ್ ನಡೆಸುವುದಿಲ್ಲ ಎಂದು ಮುಚ್ಚಳಿಕೆ ಬರೆದುಕೊಡಬೇಕು. ಅಲ್ಲದೆ, ಈ ಹಿಂದೆ ಯಾವುದೇ ರ‌್ಯಾಗಿಂಗ್ ಘಟನೆಯಲ್ಲಿ ಭಾಗಿಯಾಗಿದ್ದರೆ ಅದರ ಬಗ್ಗೆ ಮಾಹಿತಿ ನೀಡಬೇಕು.

(ಏಜನ್ಸೀಸ್)