ನೆಮ್ಮದಿ ಬೇಕೇ ? ಹೆಂಡತಿ ಮಾತು ಕೇಳಿ !

ನವದೆಹಲಿ. ಮೇ. 20 : ನಿಮ್ಮ ವೈವಾಹಿಕ ಜೀವನವನ್ನು ನೆಮ್ಮದಿಯಿಂದ ಕಳೆಯಬೇಕು ಎನ್ನುವ ಅಭಿಲಾಷೆ ನಿಮ್ಮದಾಗಿದ್ದರೆ ಸುಮ್ಮನೆ ಹೆಂಡತಿಯ ಮಾತು ಕೇಳಿ, ಆಕೆ ಹೇಳಿದಂತೆ ನಡೆದುಕೊಳ್ಳಿ ಎಂದು ಸುಪ್ರಿಂಕೋರ್ಟ್ ಸಲಹೆ ನೀಡಿದೆ. ಮಾರ್ಕಂಡಯ ಕಟ್ಜು ಮತ್ತು ದೀಪಕ್ ವರ್ಮಾ ಅವರಿದ್ದ ರಜಾ ಅವಧಿಯ ನ್ಯಾಯಪೀಠ ಈ ಕಿವಿಮಾತನ್ನು ಮಂಗಳವಾರ ಹೇಳಿದೆ.

ನಿಮ್ಮ ಹೆಂಡತಿ ಏನು ಹೇಳುತ್ತಾರೋ ಅದನ್ನು ಕೇಳಿ, ಇಲ್ಲದೆ ಹೋದರೆ ಸಮಸ್ಯೆಗೆ ಸಿಲುಕುತ್ತೀರಿ, ನಾವೆಲ್ಲ ಅದನ್ನು ಅನುಭವಿಸಿದವರೇ ಎಂದು ನ್ಯಾಯಪೀಠ ಹೇಳಿದೆ. ಹೆಂಡತಿ ಏನು ಸಲಹೆ ನೀಡಿದರೂ ಗಂಡನಾದವನು ಅದನ್ನು ಸ್ವೀಕರಿಸಬೇಕು. ಇಲ್ಲದೇ ಹೋದರೆ ಅನಗತ್ಯ ತೊಂದರೆಗೆ ಒಳಗಾಗುತ್ತೀರಿ ಎಂದು ನ್ಯಾಯಾಮೂರ್ತಿಗಳು ಹೇಳಿದ್ದಾರೆ.

ವಾಯುಪಡೆಯ ಅಧಿಕಾರಿ ದೀಪಕ್ ವರ್ಮಾ ಅವರ ವೈವಾಹಿಕ ಕೇಸಿನ ವಿಚಾರಣೆ ವೇಳೆ ಈ ಆಸಕ್ತಿದಾಯಕ ಸಲಹೆ ಕೇಳಿ ಬಂದಿದೆ. 7 ವರ್ಷಗಳ ಹಿಂದೆ ವಿವಾಹವಾದ ವರ್ಮಾ, ಪತ್ನಿ ಮೋನಿಷಾಳಿಂದ ವಿಚ್ಛೇದನ ಬಯಸಿ ಅರ್ಜಿ ಸಲ್ಲಿಸಿದ್ದರು. ಅಲ್ಲದೇ, ಆಕೆ ತಮ್ಮ ಕುಟುಂಬಕ್ಕೆ ನಷ್ಟ ಮಾಡಿದ್ದು, ತಮ್ಮ ವಿರುದ್ಧ ಮೊಕದ್ದಮೆ ದಾಖಲಿಸಿದ್ದಾಳೆ ಎಂದು ವರ್ಮಾ ದೂರಿದ್ದರು. ಈ ಪ್ರಕರಣದ ವಿಚಾರಣೆಯನ್ನು ಸುಪ್ರಿಂಕೋರ್ಟ್ ಜುಲೈ ತಿಂಗಳಿಗೆ ಮುಂದೂಡಿದೆ.

(ಏಜನ್ಸೀಸ್)