ಮೈಕ್ರೋಸಾಫ್ಟ್ ನಿಂದ ಎಚ್ ಸಿಎಲ್ ಗೆ ಬೃಹತ್ ಗುತ್ತಿಗೆ

ಮುಂಬೈ, ಏ. 6 : ಭಾರತೀಯ ಮೂಲದ ಎಚ್ ಸಿಎಲ್ ಸಾಫ್ಟ್ ವೇರ್ ಕಂಪನಿಯೂ ಅಮೆರಿಕದ ಮೈಕ್ರೋಸಾಫ್ಟ್ ಕಂಪನಿಯಿಂದ ಐದು ವರ್ಷಗಳ ಅವಧಿಯ ಸುಮಾರು 170 ಮಿಲಿಯನ್ ಡಾಲರ್ ಹಣದ ಐಟಿ ಸರ್ವೀಸ್ ಗುತ್ತಿಗೆಯನ್ನು ಪಡೆದುಕೊಂಡಿದೆ ಎಂದು ಎಕಾನಾಮಿಕ್ಸ್ ಟೈಮ್ಸ್ ವರದಿ ಮಾಡಿದೆ. ಆದರೆ ಹೆಚ್ಚಿನ ಮಾಹಿತಿ ನೀಡಲು ಎಚ್ ಸಿಎಲ್ ಕಂಪನಿಯೂ ನಿರಾಕರಿಸಿದೆ ಎಂದು ತಿಳಿಸಿದೆ.

ಸದ್ಯ ಮೈಕ್ರೋಸಾಫ್ಟ್ ನ ಆನ್ ಲೈನ್ ಸರ್ವೀಸ್ ಬಿಜಿನೆಸ್ ಟೆಕ್ನಾಲಜಿ ಸರ್ವೀಸ್ ಎಚ್ ಸಿಎಲ್ ಕಂಪನಿ ಸೇವೆ ಒದಗಿಸುತ್ತಿದೆ. ಉಭಯ ಕಂಪನಿಗಳ ನಡುವೆ ಹೊಂದಿರುವ ಉತ್ತಮ ಬಾಂಧವ್ಯ ಹಾಗೂ ವಿಶ್ವಾಸದ ಹಿನ್ನೆಲೆಯಲ್ಲಿ ಮೈಕ್ರೋ ಸಾಫ್ಟ್ ಕಂಪನಿಯೂ ಎಚ್ ಸಿಎಲ್ ಗೆ ಐದು ವರ್ಷ ಅವಧಿ ಪ್ರಾಜೆಕ್ಟ್ ನೀಡಿದೆ ಎನ್ನಲಾಗಿದೆ. ಮೈಕ್ರೋಸಾಫ್ಟ್ ಕಂಪನಿಯ ನೂತನ ಗುತ್ತಿಗೆಗೆ ಎಚ್ ಸಿಎಲ್ ಕಂಪನಿಯೂ ಸುಮಾರು 600 ನುರಿತ ಉದ್ಯೋಗಿಗಳನ್ನು ನೇಮಿಸಲು ಮುಂದಾಗಿದೆ. 250 ಉದ್ಯೋಗಿಗಗಳು ನೂತನ ಪ್ರಾಜೆಕ್ಟ್ ನಲ್ಲಿ ನಿರತರಾಗಿದ್ದಾರೆ.

ಎಚ್ ಸಿಎಲ್ ಕಂಪನಿ ನಾಲ್ಕು ವಾರಗಳ ಅವಧಿಯಲ್ಲಿ ಮೂರು ಬೃಹತ್ ಯೋಜನೆಗಳನ್ನು ತನ್ನ ಮಡಿಲಿಗೆ ಹಾಕಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಆರು ವರ್ಷಗಳ 100 ಮಿಲಿಯನ್ ಡಾಲರ್ ಜೆರಾಕ್ಸ್ ಯೋಜನೆ ಹಾಗೂ ರಿಜರ್ಸ್ ಡೈಜೆಸ್ಟ್ ಕಂಪನಿಯ 350 ಮಿಲಿಯನ್ ಡಾಲರ್ ಇನ್ನೊಂದು ದೊಡ್ಡ ಯೋಜನೆಯನ್ನು ಇತ್ತೀಚೆಗೆ ತನ್ನದಾಗಿಸಿಕೊಂಡಿತ್ತು.

(ದಟ್ಸ್ ಕನ್ನಡ ವಾರ್ತೆ)